खरातवाडी व कदमवाडी फिडरचे विभाजन होणारच; महावितरणच्या लेखी आश्वासनानंतर मारुती भापकर यांच्या नेतृत्वाखालील धरणे आंदोलन मागे

श्रीगोंदा, अहिल्यानगर प्रतिनिधी आकाश कांबळे , २९ जून २०२६ मॅक्स मंथन डेली न्यूज:

श्रीगोंदा अहिल्यानगर : खरातवाडी आणि कदमवाडी परिसरातील वारंवार खंडित होणाऱ्या वीजपुरवठ्यामुळे संतप्त झालेल्या शेतकऱ्यांनी ज्येष्ठ सामाजिक कार्यकर्ते मारुती भापकर यांच्या नेतृत्वाखाली महाराष्ट्र राज्य विद्युत वितरण कंपनीच्या (महावितरण) बेलवंडी उपविभागीय कार्यालयासमोर आज सकाळी १०.०० वाजता “बेमुदत धरणे आंदोलन” सुरू केले होते. अखेर दुपारच्या सत्रात महावितरणच्या वरिष्ठ अधिकाऱ्यांनी आंदोलकांशी सविस्तर चर्चा करून मागण्या पूर्ण करण्याचे लेखी आश्वासन दिल्यानंतर हे आंदोलन मागे घेण्यात आले.

दुपारी २.०० वाजता महावितरणचे उपकार्यकारी अभियंता संदीप डोळे आणि गणेश चौधरी यांनी आंदोलनस्थळी भेट देऊन आंदोलकांशी सविस्तर चर्चा केली. यावेळी वाढत्या उष्णतेमुळे विजेची मागणी प्रचंड वाढलेली असून तांत्रिक बिघाडामुळे काही प्रकल्प बंद असल्याने महावितरणच्या मुख्य कार्यालयाच्या निर्देशानुसार आपत्कालीन भारनियमन करावे लागत असल्याचे त्यांनी स्पष्ट केले. मात्र, खरातवाडी व कदमवाडी परिसरातील स्थानिक वीज समस्या सोडवण्यासाठी महावितरणने लेखी पत्राद्वारे  मुद्द्यांवर काम सुरू असल्याचे आश्वासित केले. १) खरातवाडी फिडरचे दोन भाग: खरातवाडी फिडरचे दोन भाग करण्यासाठी ‘शेंडगे वस्ती’ नावाने वरिष्ठ कार्यालयात प्रस्ताव पाठवला असून त्यानुसार पोल उभे करण्याचे काम झाले आहे. क्षीरसागर ट्रान्सफॉर्मर शेतीपंपाच्या डीपीला हे फिडर जोडून लोड कमी करण्यात येईल. २) लोड आटोक्यात आणणार: खरातवाडी व पिंपळगाव परिसरात संध्याकाळी ६ ते ९ दरम्यान ३० amp पेक्षा जास्त लोड असल्याने फिडर ट्रिप होते. दोन भाग झाल्यानंतर हा लोड कायमचा कमी होईल. ३) कदमवाडी-खरातवाडी विभाजन: या ठिकाणी पोल उभे करण्याचे काम सुरू असून ठेकेदार व वरिष्ठ कार्यालयाकडे पाठपुरावा सुरू आहे. महावितरणकडून मटेरियल उपलब्ध होताच हे काम तातडीने पूर्ण केले जाईल. ४) रोटेशन वेळेत बदल: पिंपळगाव सपाटे वस्ती, खरातवाडी आणि कदम वस्ती येथील रोटेशनच्या वेळेत होणाऱ्या बदलांची माहिती शेतकऱ्यांना त्वरित दिली जाईल.

चर्चेदरम्यान काही आंदोलक आणि संबंधित अधिकाऱ्यांमध्ये तीव्र खडाजंगी झाली. जर आमच्या समस्या तातडीने सोडवल्या गेल्या नाहीत आणि दिलेल्या आश्वासनाप्रमाणे कामे वेळेत पूर्ण झाली नाहीत, तर थेट महावितरणच्या कार्यालयाला टाळे ठोकू आणि यापुढच्या काळात अधिक तीव्र आंदोलन करू, असा जाहीर इशारा शेतकऱ्यांनी दिला.

 या आंदोलनात पिंपळगाव पिसा गावचे सरपंच किशोर बाप्पू पंदरकर, उपसरपंच बापुराव कदम, सामाजिक कार्यकर्ते मारुती भापकर यांच्यासह लक्ष्मण इथापे, भास्कर कदम, मयूर पंदरकर, सुरेश भापकर, संतोष पंदरकर, गणेश इथापे, महेश यादव, गणेश पंदरकर, सुनील पंदरकर, अप्पासाहेब कदम, तुकाराम पंदरकर, योगेश पारखे, शुभम भापकर, किसन इथापे, दत्तात्रय ओहळ, दत्तात्रय खामकर, सुभाष पंदरकर, विनायक खरात, बबन पंदरकर, अशोक शेलार, सावता हिरवे, संजय डाके, मारुती पारखे, वसंत शिंदे, मनोज इथापे, लक्ष्मण इथापे, संजय इथापे, राहुल खरात, अमोल पंदरकर, संपत देवकाते, दिलीप भापकर, गजेंद्र भापकर, चंद्रकांत शिंदे, अर्जुन भापकर, रामदास शिंदे, रामदास महारनुर, तात्या खरात, दत्तात्रय इथापे, चंद्रकांत भापकर, विठ्ठल शिंदे, शिवाजी गोरे, विलास शेंडगे, देविदास भापकर, बाप्पू पारखे, अनिल दळवी, बंडू सलगर, गणेश जगताप, संतोष कदम, रंगनाथ कदम, प्रकाश कदम, गजानन कुताळ, शिवाजी भोर, संतोष गलबले, विश्वनाथ भापकर, धुराजी भापकर आणि शिवाजी खरात आदी शेकडो शेतकरी मोठ्या संख्येने सहभागी झाले होते.

© २०२६ मॅक्स मंथन डेली न्यूज. सर्व हक्क राखीव.

“फसवी कर्जमाफी देऊन बळीराजाची थट्टा करू नका!” कर्जमुक्तीसाठी दौंड-अहिल्यानगर महामार्गावर शेतकऱ्यांचा ‘रास्ता रोको’ एल्गार!

श्रीगोंदा (अहिल्यानगर) प्रतिनिधी, १९ जून २०२६ मॅक्स मंथन डेली न्यूज:

श्रीगोंदा: “राज्यातील महायुती सरकारने जाहीर केलेली कर्जमाफी ही संपूर्णपणे फसवी असून, याद्वारे कष्टाळू शेतकऱ्यांची घोर फसवणूक आणि क्रूर चेष्टा करण्याचे काम सुरू आहे. अटी व शर्तींच्या जाळ्यात अडकवून शेतकऱ्यांना बँकांच्या उंबरठ्यावर उभे ठेवण्याचे पाप हे सरकार करत आहे. शेतकऱ्यांना जर सन्मानाने जगवायचे असेल, तर तात्काळ बिनशर्त कर्जमुक्ती झाली पाहिजे,” असा घणाघाती आरोप ज्येष्ठ समाजसेवक व माजी नगरसेवक मारुती भापकर यांनी केला आहे.

शेतकऱ्यांच्या या फसव्या कर्जमाफीचा कडाडून निषेध करण्यासाठी आणि श्रीगोंदा तालुक्यातील शेतकऱ्यांच्या हिताच्या विविध प्रलंबित मागण्यांसाठी ‘कष्टकरी शेतकरी संघर्ष समिती’च्या वतीने दौंड-अहिल्यानगर महामार्गावरील अत्यंत गजबजलेल्या कोळगाव फाटा येथे शुक्रवार (दि. १९ जून २०२६) रोजी सकाळी ९:०० वाजता तीव्र “रास्ता रोको आंदोलन” छेडण्यात आले. या आंदोलनात हजारो संतप्त शेतकरी डोक्याला लाल आणि पांढरे रुमाल बांधून रस्त्यावर उतरले होते.

सकाळी ९:०० वाजताच हजारो शेतकऱ्यांनी कोळगाव फाटा येथे महामार्गावर ठिय्या आंदोलन सुरू केले. यामुळे रस्त्याच्या दोन्ही बाजूला वाहनांच्या मैलोन्मैल लांबच लांब रांगा लागल्या होत्या. तब्बल दोन तास शेतकरी तळपत्या उन्हात महामार्गावर पाय रोवून बसले होते. ‘शेतकरी एकजुटीचा विजय असो’, ‘फसवी कर्जमाफी रद्द करा’, ‘अन्यायकारक भारनियमन बंद करा’ अशा गगनभेदी घोषणांनी संपूर्ण परिसर दणाणून गेला होता.

आंदोलनाची भीषणता लक्षात घेऊन कोणताही अनुचित प्रकार घडू नये, यासाठी पोलीस प्रशासनाकडून मोठा पोलीस बंदोबस्त तैनात करण्यात आला होता. अखेर श्रीगोंद्याचे तहसीलदार आणि वरिष्ठ पोलीस अधिकाऱ्यांनी आंदोलनस्थळी धाव घेऊन आंदोलनकर्त्या शेतकऱ्यांशी चर्चा केली आणि मागण्यांचे लेखी निवेदन स्वीकारले.

१) बिनशर्त सरसकट कर्जमाफी: राज्यातील शेतकऱ्यांना कोणत्याही अटी, शर्ती किंवा क्लिष्ट नियमांच्या जाळ्यात न अडकवता थेट दोन लाख रुपयांपर्यंतची सरसकट कर्जमुक्ती मिळालीच पाहिजे. २) जाचक भारनियमन रद्द करा: महावितरण कंपनीने ग्रामीण भागात सुरू केलेले अत्यंत अन्यायकारक भारनियमन (Load Shedding) तातडीने रद्द करावे. शेतकऱ्यांना शेती पंपांसाठी दिवसा अखंडित, नियमित आणि सुरळीत वीजपुरवठा करण्यात यावा. ३) बिबट्यांचा बंदोबस्त करा: श्रीगोंदा परिसरात बिबट्यांच्या वाढत्या वावरामुळे शेतात काम करणारे शेतकरी, महिला आणि त्यांच्या लहान मुलांच्या जीविताला मोठा धोका निर्माण झाला आहे. वनविभागाने तत्परता दाखवून विशेष मोहीम राबवावी, ठिकठिकाणी पिंजरे लावून बिबट्यांचा तात्काळ बंदोबस्त करावा आणि शेतकरी कुटुंबांना सुरक्षित जीवन द्यावे.

तहसीलदारांना निवेदन दिल्यानंतर शेतकरी नेत्यांनी सरकारला कडक शब्दांत चेतावणी दिली आहे. जर या मागण्यांवर प्रशासनाने आणि सरकारने शनिवार व रविवार या दोन दिवसांत तातडीने सकारात्मक निर्णय घेतला नाही, तर सोमवार (दि. २२ जून २०२६) रोजी सकाळी १०:०० वाजता ‘संत शेख महाराज मंदिर’ येथून हजारो शेतकऱ्यांचा एक विराट मोर्चा थेट श्रीगोंदा तहसीलदार कार्यालयावर धडकेल आणि तिथे बेमुदत ठिय्या आंदोलन सुरू केले जाईल, असा आक्रमक इशारा ज्येष्ठ शेतकरी नेत्यांनी दिला आहे.

या आंदोलनाचे नेतृत्व करताना ज्येष्ठ समाजसेवक मारुती भापकर अत्यंत आक्रमक शब्दात म्हणाले:

“शेतकरी हा या देशाचा आणि मातीचा खरा कणा आहे. पण आज त्याच बळीराजाला विजेसाठी, पाण्याासाठी आणि स्वतःच्या हक्काच्या कर्जमाफीसाठी रस्त्यावर उन्हातान्हात बसावे लागत आहे, ही या राज्याची सर्वात मोठी शोकांतिका आहे. एका बाजूला वीज नाही, बँकेचे कर्ज डोक्यावर आहे, तर दुसऱ्या बाजूला शेतात काम करायला जावे तर बिबट्याची भीती आहे! अशा तिहेरी संकटात सापडलेल्या शेतकऱ्याकडे सरकार जाणीवपूर्वक दुर्लक्ष करत आहे. हा अन्याय आम्ही सहन करणार नाही. जर सोमवारपर्यंत आमच्या मागण्यांवर निर्णय झाला नाही, तर सोमवारचा मोर्चा हा या सरकारची झोप उडवणारा ठरेल. शेतकऱ्यांच्या प्रत्येक न्याय्य हक्कासाठी आणि या लढ्यासाठी ‘मॅक्स मंथन’ डेली न्यूज ‘ हे चॅनल नेहमीच आमची ताकद बनून खंबीरपणे उभे राहिले आहे आणि भविष्यातही राहील!”

© २०२६ मॅक्स मंथन डेली न्यूज. सर्व हक्क राखीव.

महाराष्ट्र अंनिसच्या राज्य बैठकीत अमरावती शाखेचा झेंडा; ‘लक्ष्यवेधी शाखा’ आणि प्रफुल्ल कुकडे यांना ‘लक्ष्यवेधी कार्यकर्ता’ पुरस्कार बहाल!

अमरावती/अहिल्यानगर, अविनाश वानखेडे ८ जून २०२६ मॅक्स मंथन डेली न्यूज:

अमरावती/अहिल्यानगर: महाराष्ट्र अंधश्रद्धा निर्मूलन समितीच्या (अंनिस) विस्तारित राज्य बैठकीत अमरावती शाखेच्या गेल्या वर्षभरातील अत्यंत उल्लेखनीय आणि सातत्यपूर्ण सामाजिक कार्याची दखल घेऊन अमरावतीचा राज्यस्तरावर दुहेरी गौरव करण्यात आला आहे. अमरावती शाखेला “लक्ष्यवेधी शाखा २०२६” हा सर्वोच्च बहुमानाचा पुरस्कार बहाल करण्यात आला आहे. तसेच अमरावती जिल्हा कार्याध्यक्ष साथी प्रफुल्ल मंदा श्रीधर (कुकडे) यांना त्यांच्या अत्यंत प्रभावी, संघटनात्मक, प्रबोधनात्मक आणि विज्ञाननिष्ठ कार्याबद्दल “लक्ष्यवेधी कार्यकर्ता २०२६” या अतिशय प्रतिष्ठेच्या पुरस्काराने सन्मानित करण्यात आले आहे. या दुहेरी यशामुळे अमरावती जिल्ह्यातील अंनिसच्या चळवळीला मोठे बळ लाभले असून कार्यकर्त्यांमध्ये एक नवे चैतन्य निर्माण झाले आहे.

अहिल्यानगर येथील प्रसिद्ध बडी साजन मंगल कार्यालयात ६ जून २०२६ रोजी आयोजित करण्यात आलेल्या महाराष्ट्र अंधश्रद्धा निर्मूलन समितीच्या तीन दिवशीय विस्तारित राज्य बैठकीच्या मुख्य सत्रात हा भव्य पुरस्कार वितरण सोहळा पार पडला. पुण्याचे ज्येष्ठ सामाजिक कार्यकर्ते मा. सुभाष वारे यांच्या शुभहस्ते आणि ज्येष्ठ सामाजिक कार्यकर्ते मा. सुभाष लोमटे यांच्या प्रमुख उपस्थितीत हे दोन्ही महत्त्वाचे पुरस्कार प्रदान करण्यात आले.

गेल्या वर्षभरात अमरावती जिल्ह्यामध्ये अंधश्रद्धा निर्मूलन, वैज्ञानिक दृष्टिकोनाचा गतिमान प्रचार-प्रसार, संविधानातील पायाभूत मूल्यांची जपणूक, सामाजिक प्रबोधन, गावोगावी राबविण्यात आलेली प्रबोधन अभियाने, संघटन विस्तार, कार्यकर्ता प्रशिक्षण उपक्रम तसेच विविध स्थानिक सामाजिक प्रश्नांवरील यशस्वी हस्तक्षेपाची राज्यस्तरीय समितीने सखोल दखल घेतली. या सर्वांगीण कार्याचा गौरव म्हणून अमरावती शाखेला हा मानाचा पुरस्कार देण्यात आला.

हा भव्य “लक्ष्यवेधी शाखा २०२६” पुरस्कार अमरावती शाखेच्या वतीने नरेंद्र धर्माळे, विजय डवरे, दिलीप लाडे, सचिन खोब्रागडे, मंजू वासनिक, दिगंबर मेश्राम, निखिल विल्हेकर, कुलदीप घरडे, प्रफुल्ल मंदा श्रीधर (कुकडे), विनोद चोंडके, कीर्तिका सयामे आणि महिला कार्यवाह (राज्य) गायत्री आडे यांनी स्वीकारला.

तसेच जिल्हा कार्याध्यक्ष साथी प्रफुल्ल मंदा श्रीधर (कुकडे) यांना अंधश्रद्धा निर्मूलन चळवळ, वैज्ञानिक जाणीव जागृती, खंबीर संघटन उभारणी, स्थानिक सामाजिक प्रश्नांवर घेतलेली धाडसी भूमिका, महिला संघटन बळकट करण्याबाबतचे प्रयत्न आणि सातत्यपूर्ण लोकसंपर्क यामधील अतुलनीय योगदानाबद्दल “लक्ष्यवेधी कार्यकर्ता २०२६” या पुरस्काराने विशेषरित्या गौरविण्यात आले.

या राज्यस्तरीय बैठकीच्या पहिल्याच दिवशी अमरावती जिल्ह्याचा सविस्तर वार्षिक अहवाल जिल्हा कार्याध्यक्ष प्रफुल्ल मंदा श्रीधर (कुकडे) यांनी राज्यातील सर्व प्रमुख पदाधिकारी व कार्यकर्त्यांच्या उपस्थितीत सादर केला. जिल्ह्यात वर्षभरात राबविण्यात आलेल्या विविध सामाजिक, प्रबोधनात्मक आणि विज्ञाननिष्ठ उपक्रमांचा अभ्यासपूर्ण आढावा त्यांनी सर्वांसमोर मांडला. या उत्कृष्ट अहवालाचे उपस्थितांनी मनापासून कौतुक करत अमरावती जिल्ह्याच्या शिस्तबद्ध कामाची विशेष नोंद घेतली.

कार्यक्रमाचे अत्यंत अभ्यासपूर्ण प्रास्ताविक ‘अनिप’चे कार्यकारी संपादक मा. उत्तम जोगदंड यांनी केले. उपस्थितांचा सविस्तर परिचय मा. प्रल्हाद मेस्त्री (सदस्य, संपादक मंडळ अंनिप) यांनी करून दिला, तर संपूर्ण सोहळ्याचे आभार प्रदर्शन मा. राजेंद्र फेंगडे (सदस्य, संपादक मंडळ अंनिप) यांनी मानले.

या सुवर्ण सोहळ्यासाठी महाराष्ट्र अंधश्रद्धा निर्मूलन समितीचे राज्याध्यक्ष मा. माधव बावगे यांची प्रमुख उपस्थिती होती, तर कार्यक्रमाच्या अध्यक्षस्थानी राज्य कार्याध्यक्ष मा. संजय बनसोडे होते. याप्रसंगी अमरावती शाखेच्या कार्याला सातत्याने दिशा व मार्गदर्शन करणारे मा. गजेंद्र सुरकार (राज्य प्रधान सचिव) आणि मा. विनायक सावळे (राज्य प्रधान सचिव) यांची विशेष उपस्थिती लाभली.

तसेच मा. अजय भालकर (व्यवस्थापकीय संपादक, अनिप पत्रिका), मा. अशोक निकम (राज्यकार्यवाह, दस्तऐवज संकलन विभाग), प्रकाश कांबळे (राज्य सहकार्यवाह, वैज्ञानिक जाणीव विभाग) आणि सारिका डेहणकर (राज्य कार्यवाह, व्यसनप्रबोधन संघर्ष विभाग) या राज्य पदाधिकाऱ्यांसह मा. रजनी सुरकार, कल्पना सातव आणि राज्यातील सर्व विभागांतील कार्याध्यक्ष व प्रधान सचिव मोठ्या संख्येने उपस्थित होते.

पुरस्कार स्वीकारल्यानंतर अमरावती शाखेच्या वतीने मनोगत व्यक्त करताना प्रतिनिधींनी सांगितले की, “हा सन्मान केवळ वैयक्तिक नसून अमरावती विभागातील सर्व सन्माननीय देणगीदार, वर्गणीदार, जाहिरातदार, सहकर्ते, स्थानिक पदाधिकारी, साथी सदस्य आणि आमच्या खांद्याला खांदा लावून काम करणाऱ्या सर्व समविचारी संघटनांच्या सामूहिक संघर्षाचा व परिश्रमाचा विजय आहे. सर्वांच्या सातत्यपूर्ण सहकार्यामुळेच हा संदेश अधिक प्रबळ बनला.” तसेच आगामी काळात अंधश्रद्धा निर्मूलनाचा लढा आणि वैज्ञानिक दृष्टिकोनाचा प्रसार आणखी व्यापक केला जाईल, तसेच येत्या काही महिन्यांत विशेष लेखन व वाचन कार्यशाळा आयोजित करून नवीन दमाचे लेखक व कार्यकर्ते तयार करण्याचे महत्त्वपूर्ण नियोजन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.