दिव्यांग बांधवांच्या समावेशक रोजगारासाठी महत्त्वाकांक्षी पाऊल; ‘मिशन संधी आरंभ’ उपक्रमाची उद्या होणार सुरुवात

पिंपरी चिंचवड प्रतिनिधी लक्ष्मण प्रधान , ३ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिका दिव्यांग भवन फाऊंडेशन यांच्या वतीने “मिशन संधी आरंभ” या महत्त्वाकांक्षी उपक्रमाचे आयोजन सोमवार, ४ मे रोजी वाकड येथील हॉटेल सयाजी येथे करण्यात आले आहे। दिव्यांग बांधवांसाठी स्वयंपूर्ण व शाश्वत ‘एम्प्लॉयर इकोसिस्टम’ उभारण्याच्या उद्देशाने वर्षभर चालणाऱ्या मोहिमेची ही सुरुवात असणार आहे।

‘मिशन संधी आरंभ’ अंतर्गत कॉर्पोरेट क्षेत्रातील वरिष्ठ अधिकारी, एचआर (HR), सीएसआर (CSR) प्रमुख, स्वयंसेवी संस्था, सामाजिक कार्यकर्ते आणि शासकीय अधिकारी यांना दिव्यांग समावेशन व रोजगार या विषयावर संवादासाठी एकत्र आणले जाणार आहे। हा उपक्रम केवळ चर्चेपुरता मर्यादित नसून, सहभागी संस्थांकडून दिव्यांगांच्या उपजीविकेसाठी औपचारिक प्रतिज्ञा (Pledge) घेतली जाणार आहे।

हा उपक्रम महापौर रवि लांडगे आणि आयुक्त डॉ. विजय सूर्यवंशी यांच्या नेतृत्वाखाली राबविण्यात येत आहे। तसेच, माजी सनदी अधिकारी व दिव्यांग भवन फाऊंडेशनचे व्यवस्थापकीय संचालक ओमप्रकाश देशमुख यांच्या मार्गदर्शनाखाली हा प्रकल्प सक्षमीकरणासाठी एक आदर्श ठरणार आहे।

• नॉलेज पार्टनर: ‘इन्क्लुझ्झा, बेंगळुरू’ ही संस्था दिव्यांग समावेशन आणि ऑपर्च्युनिटी मॉडेल संदर्भात मार्गदर्शन करणार आहे।

• इम्प्लिमेंटेशन पार्टनर: ‘रोहिणी पीपल टेक्नॉलॉजी प्रा. लि.’ ही संस्था कॉर्पोरेट संपर्क आणि प्रत्यक्ष अंमलबजावणीची जबाबदारी पार पाडणार आहे।

‘संधी’ संकल्पनेद्वारे दिव्यांगांना रोजगार, इंटर्नशिप, प्रोक्युअरमेंट आणि लीडरशिप या सर्व स्तरांवर सामावून घेण्यासाठी कॉर्पोरेट क्षेत्राला एक व्यावहारिक मार्ग उपलब्ध करून देण्यात येणार आहे।

• मिशन संधी: कॉर्पोरेट एंगेजमेंट व प्लेज उपक्रम।

• संधी सक्षम: लायझन ऑफिसर प्रशिक्षण व इक्वल ऑपर्च्युनिटी पॉलिसी।

• संधी मेळा: दिव्यांग व कॉर्पोरेट यांच्यातील तिमाही संपर्क उपक्रम।

मान्यवरांच्या प्रतिक्रिया

“दिव्यांग बांधवांना मुख्य प्रवाहात आणणे ही आपली सामाजिक जबाबदारी आहे. ‘मिशन संधी’च्या माध्यमातून त्यांना रोजगार आणि स्वावलंबनाच्या संधी उपलब्ध करून देण्याचा आमचा ठाम प्रयत्न आहे.”

— रवि लांडगे, महापौर, पिंपरी चिंचवड महानगरपालिका

“प्रत्येक नागरिकाला समान संधी मिळेल असे शहर उभारण्याचा आमचा संकल्प आहे. हा उपक्रम समावेशक रोजगाराच्या दिशेने उचललेला महत्त्वपूर्ण टप्पा आहे.”

— डॉ. विजय सूर्यवंशी, आयुक्त, पिंपरी चिंचवड महानगरपालिका

“‘मिशन संधी आरंभ’ सकारात्मक बदलाची सुरुवात आहे. यातून प्राप्त झालेल्या प्रतिज्ञांचे रूपांतर प्रत्यक्ष रोजगाराच्या संधींमध्ये करण्यासाठी आम्ही कटिबद्ध आहोत.”

— ओमप्रकाश देशमुख, व्यवस्थापकीय संचालक, दिव्यांग भवन फाऊंडेशन

© २०२६ मॅक्स मंथन डेली न्यूज. सर्व हक्क राखीव.

उपमहापौर शर्मिला बाबर यांचा पुढाकार; स्वगणनेतून जनगणना २०२७ मोहिमेला गती

पिंपरी चिंचवड प्रतिनिधी बालाजी नवले, ५ मे २०२६ मॅक्स मंथन डेली न्यूज:

पिंपरी: देशातील अत्यंत महत्त्वाच्या जनगणना २०२७ मोहिमेला महाराष्ट्रात १ मे पासून सुरुवात झाली आहे. या मोहिमेत पिंपरी-चिंचवड महानगरपालिकेच्या उपमहापौर सौ. शर्मिला राजेंद्र बाबर यांनी स्वतः ऑनलाईन स्वगणना (Self Enumeration) पूर्ण करून सक्रिय सहभाग नोंदवला आहे. त्यांच्या या पुढाकारामुळे शहरातील नागरिकांमध्ये जनजागृतीला मोठी चालना मिळाली आहे.

उपमहापौर शर्मिला बाबर यांनी अधिकृत संकेतस्थळावर भेट देऊन सर्व प्रश्नांची अचूक माहिती भरली आणि यशस्वी नोंदणीनंतर ‘सेल्फ एन्युमरेशन आयडी (SE ID)’ प्राप्त केला. “जनगणना ही देशाच्या सर्वांगीण विकासासाठी अत्यंत महत्त्वाची प्रक्रिया आहे. नागरिकांकडून मिळणारी विश्वासार्ह माहितीच शासनाच्या भावी नियोजनासाठी उपयुक्त ठरते,” असे मत त्यांनी यावेळी व्यक्त केले.

• १ मे ते १५ मे २०२७: या कालावधीत नागरिकांसाठी ऑनलाईन स्व-जनगणना सुविधा उपलब्ध आहे. नागरिक घरबसल्या मोबाईल किंवा संगणकाद्वारे ही प्रक्रिया पूर्ण करू शकतात.

• १६ मे ते १४ जून २०२७: या काळात प्रगणक (Enumerators) घरोघरी भेट देऊन पुढील टप्प्यातील माहिती संकलित करतील.

उपमहापौर शर्मिला बाबर यांनी पिंपरी चिंचवडकर नागरिकांना आवाहन केले आहे की, शाळा, रस्ते, रुग्णालये, पाणी, वीज आणि रोजगार यांसारख्या मूलभूत सुविधांचे नियोजन जनगणनेच्या माहितीवरच अवलंबून असते. ज्या नागरिकांनी ऑनलाईन स्व-जनगणना पूर्ण केली आहे, त्यांनी प्रगणक घरी आल्यावर फक्त आपला ‘SEID’ क्रमांक दाखवावा, जेणेकरून प्रक्रिया अधिक सुलभ होईल.

नागरिकांनी दिलेली सर्व माहिती पूर्णपणे सुरक्षित आणि गोपनीय राखली जाणार असून, ती केवळ राष्ट्रनिर्माणासाठी वापरली जाणार आहे. त्यामुळे जास्तीत जास्त नागरिकांनी या मोहिमेत सहभागी व्हावे, असे आवाहन उपमहापौरांनी केले आहे.

© २०२६ मॅक्स मंथन डेली न्यूज. सर्व हक्क राखीव.

महापौर रवि लांडगे यांचा ‘हरित पिंपरी-चिंचवड’ संकल्प; वृक्षारोपणाची व्यापक लोकचळवळ उभारणार

पिंपरी चिंचवड प्रतिनिधी आकाश कांबळे, ५ मे २०२६ मॅक्स मंथन डेली न्यूज:

पिंपरी: पिंपरी-चिंचवड शहरातील वाढते नागरीकरण, वायू प्रदूषण आणि उष्णतेच्या लाटा यांसारख्या गंभीर पर्यावरणीय समस्यांवर मात करण्यासाठी महापौर रवि लांडगे यांनी “हरित पिंपरी-चिंचवड अभियान” राबविण्याचा महत्त्वपूर्ण निर्णय घेतला आहे. शहरातील पर्यावरणीय संतुलन पुन्हा प्रस्थापित करून नागरिकांना निरोगी जीवनमान उपलब्ध करून देणे हा या अभियानाचा मुख्य उद्देश आहे.

राज्याचे मुख्यमंत्री देवेंद्र फडणवीस यांनी राज्यभर वृक्ष लागवडीचा जो संकल्प सोडला आहे, त्याच प्रेरणेतून पिंपरी-चिंचवडमध्ये हे अभियान हाती घेण्यात येणार आहे. “निसर्ग वाचविणे म्हणजे आपल्या पुढील पिढ्यांचे भविष्य सुरक्षित करणे होय,” असे मत महापौर रवि लांडगे यांनी व्यक्त केले आहे.

• व्यापक नियोजन: सर्व क्षेत्रीय कार्यालयांमार्फत शहरातील मोकळ्या जागा, उद्याने, रस्ते दुभाजक आणि नदी-नाला परिसराचे सर्वेक्षण करून वृक्षारोपण केले जाईल.

• देशी वृक्षप्रजातींना प्राधान्य: पर्यावरणाशी सुसंगत, कमी पाणी लागणाऱ्या आणि जास्त काळ टिकणाऱ्या देशी वृक्षांची निवड करण्यात येणार आहे.

• संगोपनाची जबाबदारी: केवळ झाडे लावून न थांबता, प्रत्येक रोपाचे किमान तीन वर्षे संगोपन, पाणीपुरवठा आणि संरक्षण सुनिश्चित केले जाईल.

• आधुनिक तंत्रज्ञान: प्रत्येक झाडाची नोंदणी आणि निरीक्षणासाठी आधुनिक तंत्रज्ञानाचा वापर केला जाणार आहे, जेणेकरून झाडे जगण्याचे प्रमाण वाढेल.

हे अभियान केवळ प्रशासकीय स्तरावर मर्यादित न ठेवता ती एक लोकचळवळ बनवण्यावर महापौरांचा भर आहे. “एक झाड लावा, प्रदूषण दूर पळवा!” आणि “एक नागरिक – एक झाड” हा संकल्प शहरभर रुजवण्यासाठी स्वयंसेवी संस्था, गृहनिर्माण संस्था, शैक्षणिक संस्था आणि पर्यावरण प्रेमींना सहभागी करून घेतले जाणार आहे.

पावसाळ्यापूर्वी आवश्यक तयारी पूर्ण करून पावसाळ्यात मोठ्या प्रमाणावर वृक्ष लागवड केली जाईल, ज्यामुळे शहराचे तापमान नियंत्रित राहण्यास आणि ऑक्सिजनचे प्रमाण वाढण्यास मदत होईल.

© २०२६ मॅक्स मंथन डेली न्यूज. सर्व हक्क राखीव.

देशाच्या विकासामध्ये श्रमिकांचा सिंहाचा वाटा हे कदापी विसरून चालणार नाही – कामगार नेते यशवंतभाऊ भोसले

पिंपरी चिंचवड प्रतिनिधी लक्ष्मण प्रधान , १ मे २०२६ मॅक्स मंथन डेली न्यूज:

पिंपरी: “श्रमिकांचे कष्ट, त्याग आणि संघर्ष यामुळेच भारत देशाचा विकास झाला असून त्यांचे योगदान कधीही विसरता येणार नाही. महाराष्ट्राचा इतिहास जेव्हा लिहिला जाईल, तेव्हा सर्वात मोठे बलिदान हे श्रमिकांचेच दिसून येईल,” असे गौरवोद्गार राष्ट्रीय श्रमिक आघाडीचे संस्थापक अध्यक्ष यशवंतराव भोसले यांनी काढले.

१ मे, कामगार दिन आणि महाराष्ट्र दिनाच्या औचित्याने पिंपरीतील संत तुकाराम नगर येथे राष्ट्रीय श्रमिक आघाडीच्या वतीने भव्य कामगार मेळाव्याचे आयोजन करण्यात आले होते. यावेळी यशवंतभाऊ भोसले बोलत होते.

कार्यक्रमाची सुरुवात झेंडावंदनाने करण्यात आली. यावेळी मनोगत व्यक्त करताना भोसले म्हणाले की, शहरांच्या उभारणीत आणि उद्योगांच्या प्रगतीत श्रमिकांचा मोलाचा वाटा आहे. प्रत्येक इमारतीच्या पायाभरणीत त्यांचा घाम दडलेला आहे. मात्र, सध्या संघटित कामगारांचे प्रमाण कमी होऊन असंघटित कामगारांची संख्या वाढत आहे. यामुळे समाजात आर्थिक दरी वाढण्याची भीती असून त्याचा परिणाम रोजगारावर आणि छोट्या उद्योगांवर होईल, असेही त्यांनी नमूद केले.

केंद्रातील मोदी सरकार आणि राज्यातील फडणवीस सरकारमुळे श्रमिकांच्या जीवनात सकारात्मक बदल झाले असल्याचे भोसले यांनी सांगितले. ‘पंतप्रधान आवास योजना’ आणि ‘एसआरए’ प्रकल्पांमुळे लाखो श्रमिकांना हक्काची घरे मिळाली, याबद्दल त्यांनी पंतप्रधान नरेंद्र मोदी आणि मुख्यमंत्री देवेंद्र फडणवीस यांचे आभार मानले. श्रमिकांच्या हक्कांच्या संरक्षणासाठी आणखी सक्षम कायद्यांची आवश्यकता असल्याचेही त्यांनी स्पष्ट केले.

या मेळाव्यात विविध क्षेत्रातील मान्यवर मोठ्या संख्येने उपस्थित होते. यामध्ये खालील मान्यवरांचा समावेश होता:

• यशवंतभाऊ भोसले (अध्यक्ष, संत तुकाराम नगर सहकारी गृहरचना संस्था)

• शंकरराव शितोळे

• जयदेव अक्कलकोट (अध्यक्ष, चाकण उद्योजक संघटना)

• दीपक पाटील, दिनेश पाटील, ओमकार जोकारे

• अंकुश वाघमारे, लताताई पाटील, अमोल घोरपडे

• दत्तात्रय गायकवाड, कैलास गव्हाणे, शिरीष सासवडे

कार्यक्रमाच्या शेवटी सर्व कामगार माता-भगिनींना अल्पोपहार देऊन सन्मानपूर्वक निरोप देण्यात आला. या मेळाव्यातून श्रमिकांच्या कष्टांना खऱ्या अर्थाने सलाम करण्यात आला.

© २०२६ मॅक्स मंथन डेली न्यूज. सर्व हक्क राखीव.

पिंपरी चिंचवड महानगरपालिकेच्या सेवेतून एप्रिल २०२६ अखेर ३० अधिकारी-कर्मचारी सेवानिवृत्त

पिंपरी चिंचवड प्रतिनिधी बालाजी नवले, १ मे २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या सेवेतून सेवानिवृत्त होणाऱ्या अधिकारी आणि कर्मचाऱ्यांनी कार्यरत असताना प्रामाणिकपणा व निष्ठेने दिलेल्या सेवेमुळेच संस्थेची भक्कम पायाभरणी झाली आहे, असे प्रतिपादन उपमहापौर शर्मिला बाबर यांनी केले. महानगरपालिकेच्या वतीने आयोजित विशेष सन्मान सोहळ्यात त्या बोलत होत्या.

माहे एप्रिल २०२६ अखेर नियत वयोमानानुसार तसेच स्वेच्छानिवृत्ती घेतलेल्या ३० अधिकारी व कर्मचाऱ्यांचा मुख्य प्रशासकीय इमारतीतील दिवंगत मधुकर पवळे सभागृहात उपमहापौर शर्मिला बाबर यांच्या हस्ते सत्कार करण्यात आला.

या कार्यक्रमास सत्तारूढ पक्षनेते प्रशांत शितोळे, नगरसेवक कुशाग्र कदम, उत्तम केंदळे, सहाय्यक आयुक्त तानाजी नरळे, मुख्य कामगार कल्याण अधिकारी प्रमोद जगताप, जनता संपर्क अधिकारी प्रफुल्ल पुराणिक यांच्यासह विविध विभागांतील अधिकारी-कर्मचारी आणि सेवानिवृत्त कर्मचाऱ्यांचे नातेवाईक उपस्थित होते.

उपमहापौर शर्मिला बाबर म्हणाल्या की, “सेवानिवृत्त झालेल्या अधिकारी व कर्मचाऱ्यांनी उत्कृष्ट सेवा बजावत आपली जबाबदारी पार पाडली आहे. सेवानिवृत्तीनंतरचा काळ हा नव्या संधींचा असल्याने त्यांनी समाजकार्यात सक्रिय सहभाग घेऊन आनंदी आयुष्य जगावे”. तसेच, कुटुंबानेही या कर्मचाऱ्यांना सन्मानपूर्वक वागणूक द्यावी, अशी अपेक्षा त्यांनी व्यक्त केली.

सत्तारूढ पक्षनेते प्रशांत शितोळे यांनी “सेवानिवृत्ती ही केवळ कागदावर असते, मनाची नसते” असे नमूद करत, सेवानिवृत्त कर्मचाऱ्यांनी आपल्या अनुभवाचा लाभ नव्या पिढीला करून द्यावा, असे आवाहन केले.

• नियत वयोमानानुसार सेवानिवृत्त: कार्यकारी अभियंता सुनील वाघमारे, ज्येष्ठ वैद्यकीय अधिकारी डॉ. राजेंद्र फिरके, मुख्याध्यापक जयमाला गावडे, चंदा काकडे, सिस्टर इन्चार्ज रोहिणी काकडे, मुख्य लिपिक प्रकाश बाणेकर, राजकुमार यादव, मुरगू बोटे, माया गिते, उपशिक्षक सुनीता इंगळे, फार्मासिस्ट मिलिंद पंडित, सांख्यिकी सहाय्यक प्रशांत उमराणी, वाहन चालक विलास ढोरे, रखवालदार गुलाब हिले, शिपाई विजय कदम, मजूर राजू कुटे, सुरेश देवकर, भिमाजी देवकर, सफाई कामगार पुष्पा ओव्हाळ, आणि रामलिंग गायकवाड.

• स्वेच्छानिवृत्ती घेतलेले: कार्यकारी अभियंता राजेंद्र मोराणकर, स्टाफनर्स मंगल डफळ, मुकादम सुनील माने, प्रवीण डोळस, सफाई कामगार शाम मासरे, कांता शितोळे, मच्छिंद्र सोनवणे, सफाई सेवक महंमद कादर, तुकाराम गोफणे, आणि दीपक उबाळे.

कार्यक्रमाचे प्रास्ताविक प्रमोद जगताप यांनी केले, तर सूत्रसंचालन आणि आभार प्रदर्शन प्रफुल्ल पुराणिक यांनी मानले.

© २०२६ मॅक्स मंथन डेली न्यूज. सर्व हक्क राखीव.

‘ड’ क्षेत्रीय कार्यालयाअंतर्गत प्रभाग क्र. २५ व २६ मधील अनधिकृत पत्राशेडवर महापालिकेची निष्कासनाची कारवाई

पिंपरी चिंचवड प्रतिनिधी लक्ष्मण प्रधान , ३० एप्रिल २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या ‘ड’ क्षेत्रीय कार्यालयाअंतर्गत प्रभाग क्र. २६ मधील जगताप डेअरी ते कस्पटे वस्ती आणि प्रभाग क्र. २५ मधील वाकड चौक ते भुजबळ चौक या परिसरातील अनधिकृत बांधकामांवर प्रशासनाने आज पुन्हा एकदा धडक कारवाई केली. आज सकाळी १० वाजल्यापासून राबविण्यात आलेल्या या व्यापक मोहिमेत एकूण ४३ अनधिकृत पत्रा शेड जमीनदोस्त करण्यात आले.

• निष्कासित बांधकामे: प्रभाग क्र. २६ मधील जगताप डेअरी ते कस्पटे वस्ती दरम्यानची २७ आणि प्रभाग क्र. २५ मधील वाकड चौक ते भुजबळ चौक दरम्यानची १६ अशी एकूण ४३ पत्रा शेड निष्कासित करण्यात आली.

• एकूण क्षेत्रफळ: या कारवाईत सुमारे ६३ हजार १८४ चौ. फूट अतिक्रमण आणि अनधिकृत बांधकाम हटवण्यात आले आहे.

• पूर्वसूचना: संबंधित अनधिकृत पत्राशेड धारकांना महापालिकेने आधीच नोटिसा बजावल्या होत्या, त्यातील मुदत संपल्यानंतर ही कारवाई करण्यात आली.

ही कारवाई आयुक्त डॉ. विजय सूर्यवंशी यांच्या आदेशान्वये आणि अतिरिक्त आयुक्त तृप्ती सांडभोर यांच्या मार्गदर्शनाखाली क्षेत्रीय अधिकारी अश्विनी गायकवाड यांच्या नेतृत्वात पार पडली. या मोहिमेत खालील यंत्रणांचा समावेश होता:

• अधिकारी व कर्मचारी: महापालिकेचे १५० अधिकारी व कर्मचारी, २४ पोलीस अधिकारी, ९० पोलीस कर्मचारी आणि महाराष्ट्र सुरक्षा बलाचे १२० जवान.

• मजूर व यंत्रसामग्री: १६ जेसीबी, २ ट्रॅक्टर ट्रॉली आणि ६० मजूर.

• सुरक्षा व्यवस्था: आपत्कालीन परिस्थितीसाठी अग्निशमन दलाची एक गाडी आणि दोन ॲम्बुलन्स घटनास्थळी सज्ज ठेवण्यात आल्या होत्या.

या मोहिमेत सह शहर अभियंता सुनील भागवानी, उप आयुक्त अतुल पाटील, क्षेत्रीय अधिकारी निवेदिता घारगे, राजाराम सरगर, कार्यकारी अभियंता लक्ष्मीकांत कोल्हे यांच्यासह विविध विभागाचे अभियंते व अधिकारी प्रत्यक्ष सहभागी झाले होते.

शहरातील अनधिकृत बांधकामांवर नियंत्रण ठेवून नागरिकांना सुरक्षित आणि नियोजनबद्ध नागरी सुविधा उपलब्ध करून देणे हा या मोहिमेचा मुख्य उद्देश आहे. नियमबाह्य बांधकामे कोणत्याही परिस्थितीत सहन केली जाणार नाहीत, असा स्पष्ट संदेश महापालिका प्रशासनाने दिला आहे.

“शहरातील अनधिकृत बांधकामांवर प्रभावी नियंत्रण ठेवणे आणि नागरिकांना सुरक्षित सुविधा देणे ही आमची प्राथमिकता आहे. नियमबाह्य बांधकामांना कोणतीही मुभा दिली जाणार नाही. ‘ड’ क्षेत्रीय कार्यालयाअंतर्गत सुरू असलेली ही कारवाई पुढील काही दिवस सातत्याने सुरू राहणार आहे.”

— डॉ. विजय सूर्यवंशी, आयुक्त, पिंपरी चिंचवड महानगरपालिका

© २०२६ मॅक्स मंथन डेली न्यूज. सर्व हक्क राखीव.

थेरगाव येथे होणाऱ्या भव्य कॅन्सर हॉस्पिटलचा सभापती अभिषेक बारणे यांनी घेतला आढावा

पिंपरी चिंचवड प्रतिनिधी आकाश कांबळे, ३० एप्रिल २०२६ मॅक्स मंथन डेली न्यूज:

पिंपरी: पिंपरी-चिंचवड शहरातील सर्वसामान्य आणि आर्थिकदृष्ट्या दुर्बळ घटकातील रुग्णांना कर्करोगावर सुलभ आणि परवडणाऱ्या दरात उपचार उपलब्ध करून देण्यासाठी थेरगाव येथे महानगरपालिकेच्या वतीने भव्य कॅन्सर हॉस्पिटल उभारण्यात येत आहे. या हॉस्पिटलच्या उभारणीचा आणि विविध सुविधांचा आढावा घेण्यासाठी स्थायी समिती सभापती अभिषेक बारणे यांनी आज, ३० एप्रिल रोजी संबंधित अधिकाऱ्यांसमवेत प्रत्यक्ष कामाची पाहणी केली.

हे रुग्णालय जागतिक दर्जाच्या अत्याधुनिक तंत्रज्ञानाने सुसज्ज असणार आहे. यामध्ये खालील महत्त्वाच्या सुविधा उपलब्ध असतील:

• यंत्रसामग्री: लिनियर ॲक्सिलरेटर, ब्रॅकीथेरपी युनिट्स आणि पीईटी-सीटी स्कॅनर यांसारखी महागडी यंत्रे येथे बसवण्यात येणार आहेत.

• उपचार: प्रामुख्याने स्तनाचा, फुफ्फुसाचा, कोलोरेक्टल, प्रोस्टेट आणि गर्भाशयाच्या मुखाच्या कर्करोगावर विशेष उपचार केले जातील.

• एकाच छताखाली सेवा: केमोथेरपी, रेडिएशन थेरपी, शस्त्रक्रिया, समुपदेशन आणि पुनर्वसन या सर्व सेवा एकाच ठिकाणी मिळतील.

येथील उपचारांचे शुल्क ‘महात्मा ज्योतिबा फुले जन आरोग्य योजना’ आणि केंद्र सरकारच्या आरोग्य योजनांशी सुसंगत ठेवले जाणार आहे. यामुळे गरीब रुग्णांसाठी हे उपचार अत्यंत स्वस्त किंवा मोफत ठरणार आहेत.

या पाहणी दौऱ्याचे औचित्य साधून अभिषेक बारणे यांच्या हस्ते थेरगाव हॉस्पिटलमध्ये अनेक वर्षे सेवा देणारे ज्येष्ठ वैद्यकीय अधिकारी डॉ. राजेंद्र फिरके यांचा सेवानिवृत्तीनिमित्त विशेष गौरव करून कृतज्ञता व्यक्त करण्यात आली. यावेळी आरोग्य अधिकारी डॉ. लक्ष्मण गोफणे, डॉ. मुसलगी, डॉ. सोनेकर, डॉ. कुलकर्णी यांसह पालिकेचे वरिष्ठ अधिकारी उपस्थित होते.

“कर्करोगाचा उपचार सामान्यांच्या आवाक्याबाहेर जातो, म्हणूनच आम्ही हे अत्याधुनिक हॉस्पिटल उभारत आहोत. पीईटी-सीटी स्कॅनरसारख्या जागतिक दर्जाच्या सुविधा येथे असतील. महात्मा फुले योजनेमुळे गोरगरीब रुग्णांना मोफत सेवा मिळेल. शहरातील एकही रुग्ण पैशाअभावी उपचारांपासून वंचित राहू नये, हेच आमचे उद्दिष्ट आहे.”

— अभिषेक बारणे (सभापती, स्थायी समिती, पिंपरी चिंचवड महापालिका)

© २०२६ मॅक्स मंथन डेली न्यूज. सर्व हक्क राखीव.

‘मी रमाई’ या एकपात्री नाट्यप्रयोगातून रमाईंच्या त्यागमय जीवनाला भावपूर्ण अभिवादन

पिंपरी चिंचवड प्रतिनिधी लक्ष्मण प्रधान , ३० एप्रिल २०२६ मॅक्स मंथन डेली न्यूज:

पिंपरी: त्याग, संघर्ष आणि समर्पणाच्या असामान्य जीवनप्रवासाला रंगमंचावरून सजीव रूप देणारा ‘मी रमाई’ हा एकपात्री नाट्यप्रयोग पिंपरी चिंचवडकरांसाठी एक हृदयस्पर्शी आणि विचारप्रवर्तक अनुभव ठरला. पिंपरी-चिंचवड महानगरपालिकेच्या वतीने पिंपरी येथे उभारण्यात येणाऱ्या ‘त्यागमूर्ती माता रमाई भीमराव आंबेडकर सृष्टी’ प्रकल्पाच्या भूमिपूजन सोहळ्याचे औचित्य साधून या कार्यक्रमाचे आयोजन करण्यात आले होते. मराठी अभिनेत्री प्रियांका उबाळे यांच्या प्रभावी सादरीकरणातून माता रमाईंच्या जीवनातील महान संघर्ष प्रेक्षकांसमोर उलगडला.

पिंपरी येथील भीमसृष्टी जवळील मोकळ्या जागेत आयोजित या कार्यक्रमाला नागरिकांचा उत्स्फूर्त प्रतिसाद लाभला. प्रस्तावित सृष्टी प्रकल्पाच्या माध्यमातून रमाईंच्या कार्याची स्मृती जपण्याचा प्रयत्न होत असताना, या नाट्यप्रयोगाने त्या संकल्पनेला भावनिक आधार दिला.

या एकपात्री प्रयोगामध्ये रमाईंच्या आयुष्याचा संपूर्ण पट प्रभावीपणे मांडण्यात आला:

• बालपण: लहानपणातील गरिबी आणि बालवयात आलेल्या जबाबदाऱ्यांचे चित्रण समाजातील कठोर वास्तवाची जाणीव करून देणारे होते.

• संसार आणि संघर्ष: डॉ. बाबासाहेब आंबेडकरांशी विवाहानंतरचा कठीण प्रवास आणि आर्थिक संकटांचे वास्तववादी सादरीकरण मन हेलावून टाकणारे होते.

• अखंड साथ: बाबासाहेब परदेशात असताना रमाईंची एकटेपणाशी चाललेली झुंज आणि मुलांच्या मृत्यूचे दुःख पचवून “तुम्ही शिकत राहा, मी सगळं सहन करते” हा त्यांचा निश्चय प्रेक्षकांना अंतर्मुख करणारा ठरला.

• प्रेरणादायी संदेश: आपल्या वैयक्तिक वेदना बाजूला ठेवून बाबासाहेबांच्या सामाजिक चळवळीत दिलेली महत्त्वाची साथ हे त्यांच्या व्यक्तिमत्त्वाचे वैशिष्ट्य यात ठळकपणे मांडले गेले.

नाट्यप्रयोगाच्या शेवटी रमाईंच्या आजारपणाचा आणि अखेरच्या टप्प्याचा भावनिक आविष्कार सादर करताना प्रेक्षक स्तब्ध झाले होते. “महापुरुष घडवणारी शक्ती कोण?” हा प्रश्न उपस्थित करत समाजातील स्त्रियांच्या अदृश्य योगदानाची जाणीव या प्रयोगातून करून देण्यात आली. प्रियांका उबाळे यांनी एकहाती साकारलेला हा प्रयोग केवळ भावनिकच नाही, तर सामाजिक भान तीव्र करणारा ठरला.

या नाट्यप्रयोगास नगरसदस्य डॉ. सुहास कांबळे, उप आयुक्त अण्णा बोदडे, विशेष अधिकारी किरण गायकवाड यांच्यासह सामाजिक कार्यकर्ते आणि नागरिक मोठ्या संख्येने उपस्थित होते. या माध्यमातून माता रमाईंच्या त्यागमय जीवनाची प्रेरणा नव्या पिढीपर्यंत पोहोचविण्याचा महानगरपालिकेचा प्रयत्न यशस्वी ठरला.

© २०२६ मॅक्स मंथन डेली न्यूज. सर्व हक्क राखीव.

महानगरपालिकेच्या वतीने राष्ट्रसंत तुकडोजी महाराज यांच्या जयंतीनिमित्त अभिवादन

पिंपरी चिंचवड प्रतिनिधी बालाजी नवले, ३० एप्रिल २०२६ मॅक्स मंथन डेली न्यूज:

पिंपरी: “राष्ट्रसंत तुकडोजी महाराज यांचे जीवन म्हणजे सेवा, साधेपणा आणि समाजजागृती यांचा आदर्श आहे. त्यांनी दिलेला स्वच्छता, श्रमसंस्कार आणि एकात्मतेचा संदेश आजच्या काळातही अत्यंत महत्त्वाचा ठरतो,” असे प्रतिपादन महापौर रवि लांडगे यांनी केले.

पिंपरी-चिंचवड महानगरपालिकेच्या वतीने राष्ट्रसंत तुकडोजी महाराज यांच्या जयंतीनिमित्त पिंपरी येथील मुख्य प्रशासकीय भवनात अभिवादन कार्यक्रमाचे आयोजन करण्यात आले होते. यावेळी महापौर लांडगे यांच्या हस्ते महाराजांच्या प्रतिमेस पुष्पहार अर्पण करून विनम्र अभिवादन करण्यात आले.

राष्ट्रसंत तुकडोजी महाराज हे महाराष्ट्रातील एक थोर संत, समाजसुधारक आणि राष्ट्रभक्त होते. त्यांनी कीर्तन आणि भजनाच्या माध्यमातून समाजाचे प्रबोधन केले. विशेषतः त्यांनी लिहिलेल्या ‘ग्रामगीता’ या ग्रंथातून आदर्श ग्रामविकास, स्वच्छता, श्रमसंस्कार आणि नैतिक जीवनाचा महत्त्वपूर्ण संदेश दिला आहे. त्यांनी स्वातंत्र्य चळवळीतही सक्रिय सहभाग नोंदवत जनमानसात देशभक्तीची भावना रुजवली. त्यांच्या या अफाट कार्यामुळेच त्यांना ‘राष्ट्रसंत’ ही उपाधी देऊन गौरविण्यात आले.

या प्रसंगी उपआयुक्त अण्णा बोदडे, विशेष अधिकारी किरण गायकवाड, जनता संपर्क अधिकारी प्रफुल्ल पुराणिक, कार्यकारी अभियंता सुनीलदत्त नरोटे, सुनील पवार, सहाय्यक आरोग्य अधिकारी शांताराम माने आणि कामगार नेते नागेश जाधव आदी अधिकारी व कर्मचारी उपस्थित होते.

© २०२६ मॅक्स मंथन डेली न्यूज. सर्व हक्क राखीव.

महिलांच्या त्यागामुळेच कुटुंबाची व देशाची प्रगती – उपमहापौर शर्मिला बाबर

पिंपरी चिंचवड प्रतिनिधी आकाश कांबळे, ३० एप्रिल २०२६ मॅक्स मंथन डेली न्यूज:

पिंपरी: कुटुंबाच्या प्रगतीसाठी महिलांना अनेक गोष्टींचा त्याग करावा लागतो. महिलांच्या त्यागामुळेच त्यांच्या कुटुंबाची आणि देशाची प्रगती होते. आज देशाच्या राष्ट्रपती पदावर, राज्याच्या उपमुख्यमंत्री पदावर आणि स्थानिक स्वराज्य संस्थांमध्ये महिला कार्यरत आहेत. या सर्व सावित्रीच्या, जिजाऊंच्या आणि रमाईच्या लेकींमुळेच देशातील लोकशाही बळकट होत आहे, असे प्रतिपादन पिंपरी-चिंचवड महानगरपालिकेच्या उपमहापौर शर्मिला बाबर यांनी केले.

पिंपरी-चिंचवड महिला पत्रकार संघाच्या वतीने जागतिक महिला दिनाचे औचित्य साधून मंगळवारी (दि. २८) स्नेह मेळावा व नवनिर्वाचित नगरसेविका, बचत गटांच्या अध्यक्षा आणि महिला पत्रकारांच्या सत्काराचे आयोजन करण्यात आले होते. यावेळी उपमहापौर बाबर बोलत होत्या. वर्षातील केवळ एक दिवस महिला दिन साजरा करण्याऐवजी रोज महिलांचा मान-सन्मान राखून त्यांचे कौतुक केले पाहिजे, असेही त्यांनी यावेळी नमूद केले.

या कार्यक्रमास पिंपरी-चिंचवड मनपा स्थायी समितीचे अध्यक्ष अभिषेक बारणे, पक्षनेते प्रशांत शितोळे, नगरसेविका सारिका मासुळकर, शीतल वर्णेकर, सुप्रिया चांदगुडे, वर्षा जगताप, अनुराधा गोरखे, शालिनी गुजर, अर्चना सस्ते, रवीना आंगोळकर, सुजाता बोराटे, स्नेहा कलाटे, तृप्ती कांबळे, शिवानी नरळे आणि महिला पत्रकार संघाच्या अध्यक्ष अर्चना मेंगडे उपस्थित होत्या.

तसेच श्रद्धा प्रभुणे, सायली कुलकर्णी, माधुरी कोराड, मंदा बनसोडे, प्राजक्ता जाधव, श्रद्धा कोतवडेकर, लीना माने, ज्येष्ठ पत्रकार माधव सहस्त्रबुद्धे, बाळासाहेब ढसाळ, अनिल कातळे, प्रवीण शिर्के, देवा भालके, सुनील उर्फ बाबू कांबळे, अविनाश कांबीकर, विनय लोंढे, दिनेश दुधाळ, रोहित खर्गे, विशाल जाधव आणि दादाराव आढाव आदी मान्यवर उपस्थित होते.

महिला पत्रकार संघाच्या वतीने सर्व नगरसेविका, बचत गट अध्यक्ष, सामाजिक कार्यकर्त्या आणि ज्येष्ठ पत्रकारांचा शाल, श्रीफळ, स्मृतिचिन्ह व तुळशीचे रोप देऊन सन्मान करण्यात आला. यावेळी अभिषेक बारणे, प्रशांत शितोळे आणि बाळासाहेब ढसाळ यांनीही उपस्थित महिलांना शुभेच्छा दिल्या. कार्यक्रमाचे स्वागत अर्चना मेंगडे यांनी केले, सूत्रसंचालन संदीप साकोरे यांनी केले तर आभार श्रद्धा प्रभुणे यांनी मानले.

© २०२६ मॅक्स मंथन डेली न्यूज. सर्व हक्क राखीव.