उद्यानात उभारण्यात येणारे विरंगुळा केंद्र सामाजिक संवादासाठी व्यासपीठ ठरेल – महापौर रवि लांडगे

पिंपरी चिंचवड प्रतिनिधी बालाजी नवले, ८ मे २०२६ मॅक्स मंथन डेली न्यूज:

पिंपरी: “पिंपरी-चिंचवड शहरातील उद्याने ही शहराचा खऱ्या अर्थाने श्वास आहेत. इतर शहरांच्या तुलनेत आपल्या शहरात उद्यानांची संख्या मोठी असून, त्यांचे संगोपन करणे ही आपली सामूहिक जबाबदारी आहे. उद्यानांमध्ये उभारण्यात येणाऱ्या विरंगुळा केंद्रांमुळे सर्व वयोगटातील नागरिकांना व्यायाम, सांस्कृतिक उपक्रम आणि सामाजिक संवादासाठी एक उत्तम व्यासपीठ उपलब्ध होणार आहे,” असे प्रतिपादन महापौर रवि लांडगे यांनी केले.

पिंपरी-चिंचवड महानगरपालिकेच्या मोरवाडी येथील देऊबाई कापसे उद्यान परिसरात उभारण्यात येणाऱ्या दोन मजली बहुउद्देशीय विरंगुळा केंद्राच्या कामाचे भूमिपूजन आज महापौर रवि लांडगे यांच्या हस्ते उत्साहात संपन्न झाले.

याप्रसंगी बोलताना महापौर लांडगे म्हणाले की, महापालिकेच्या माध्यमातून शहरातील उद्यानांचे आधुनिकीकरण करण्यावर आणि नागरिकांना दर्जेदार सुविधा उपलब्ध करून देण्यावर विशेष भर दिला जात आहे. या नवीन विरंगुळा केंद्रामुळे परिसरातील ज्येष्ठ नागरिक आणि इतर रहिवाशांच्या जीवनमानात सकारात्मक बदल होईल, असा विश्वासही त्यांनी व्यक्त केला.

 या प्रकल्पासाठी ६ लाख ५३ हजार रुपये खर्च अपेक्षित आहे. हे केंद्र दोन मजली असून १८ मीटर बाय ८ मीटर अशा एकूण २८८ चौरस मीटर क्षेत्रात उभारले जाणार आहे. या कामाची मुदत ८ महिने निश्चित करण्यात आली आहे.

या सोहळ्याला उपमहापौर शर्मिला बाबर, नगरसदस्य कुशाग्र कदम, तुषार हिंगे, अनुराधा गोरखे, सुप्रिया चांदगुडे, उपायुक्त अण्णा बोदडे आणि जनता संपर्क अधिकारी प्रफुल्ल पुराणिक यांच्यासह परिसरातील ज्येष्ठ नागरिक व सामाजिक कार्यकर्ते मोठ्या संख्येने उपस्थित होते. कार्यक्रमाचे सूत्रसंचालन प्रफुल्ल पुराणिक यांनी केले.

© २०२६ मॅक्स मंथन डेली न्यूज. सर्व हक्क राखीव.

वाकड-ताथवडेतील पाणीप्रश्न मार्गी लागण्याची चिन्हे; नगरसेवक कुणाल वाव्हळकर यांची आक्रमक भूमिका

पिंपरी चिंचवड प्रतिनिधी लक्ष्मण प्रधान, ८ मे २०२६ मॅक्स मंथन डेली न्यूज:

वाकड–ताथवडे: वाकड आणि ताथवडे परिसरातील वाढत्या पाणीटंचाईच्या प्रश्नावर नगरसेवक कुणाल वाव्हळकर यांनी आक्रमक पवित्रा घेतल्याने नागरिकांच्या आशा पल्लवित झाल्या आहेत. गेल्या काही महिन्यांपासून नियमित पाणीपुरवठा होत नसल्याने नागरिकांना खासगी टँकरवर अवलंबून राहावे लागत असून, या पार्श्वभूमीवर वाव्हळकर यांनी महापालिका प्रशासनाला चांगलेच धारेवर धरले आहे.

ताथवडे परिसरात उभारण्यात येत असलेल्या तब्बल २५ लाख लिटर क्षमतेच्या जलकुंभाचे काम अंतिम टप्प्यात आले आहे. मात्र, तांत्रिक कारणांमुळे प्रत्यक्ष पाणीपुरवठा सुरू न झाल्याने सोसायट्यांना आर्थिक भुर्दंड सोसावा लागत आहे. कुणाल वाव्हळकर यांनी पाणीपुरवठा विभागाच्या अधिकाऱ्यांची तातडीची बैठक घेऊन जलकुंभ कार्यान्वित करण्यासाठी आवश्यक असलेल्या वितरण नलिका, वीज जोडणी आणि पंपिंग यंत्रणेची कामे युद्धपातळीवर पूर्ण करण्याचे आदेश दिले.

“नागरिक नियमितपणे पाणीपट्टी भरत असतानाही त्यांना टँकरवर अवलंबून राहावे लागणे ही अत्यंत गंभीर बाब आहे. प्रशासनाने याकडे गांभीर्याने पाहून टँकर माफियाला आळा घातला पाहिजे. नागरिकांना त्यांचा हक्क असलेला नियमित आणि पुरेसा पाणीपुरवठा वेळेत मिळालाच पाहिजे,” असे ठाम मत कुणाल वाव्हळकर यांनी व्यक्त केले.

नगरसेवकांच्या या आक्रमक भूमिकेमुळे पाणीपुरवठा विभागावर दबाव वाढला असून, रखडलेली कामे वेगाने पूर्ण करण्यासाठी प्रशासनाने हालचाली सुरू केल्या आहेत. येत्या काही दिवसांत हा जलकुंभ प्रकल्प पूर्ण क्षमतेने सुरू झाल्यास वाकड-ताथवडे परिसरातील हजारो नागरिकांचा पाण्याचा प्रश्न कायमस्वरूपी सुटण्याची शक्यता आहे. प्रशासनाने कामात दिरंगाई केल्यास तीव्र आंदोलनाचा इशाराही यावेळी वाव्हळकर यांनी दिला आहे.

© २०२६ मॅक्स मंथन डेली न्यूज. सर्व हक्क राखीव.

पावसाळ्याच्या पार्श्वभूमीवर आपत्तीपूर्व सूक्ष्म नियोजनावर भर द्यावा; आयुक्त डॉ. विजय सूर्यवंशी यांचे स्पष्ट निर्देश

पिंपरी चिंचवड प्रतिनिधी लक्ष्मण प्रधान , ८ मे २०२६ मॅक्स मंथन डेली न्यूज:

पिंपरी: “येत्या पावसाळ्याच्या पार्श्वभूमीवर सर्व विभागांनी आपत्कालीन परिस्थितीला सामोरे जाण्यासाठी यंत्रणा सज्ज ठेवून आपत्तीपूर्व सूक्ष्म नियोजनावर भर द्यावा. शहरात पाणी साचणाऱ्या ठिकाणांची ओळख करून तेथे कायमस्वरूपी उपाययोजना कराव्यात आणि नालेसफाईची कामे पावसाळ्यापूर्वी तातडीने पूर्ण करावीत,” असे स्पष्ट निर्देश महापालिका आयुक्त डॉ. विजय सूर्यवंशी यांनी दिले.

पिंपरी चिंचवड महानगरपालिकेच्या वतीने आयोजित मान्सूनपूर्व तयारी आढावा बैठकीत ते बोलत होते. दिवंगत माजी महापौर मधुकरराव पवळे सभागृहात ही बैठक संपन्न झाली.

 नदीकाठच्या व पाणी शिरण्याचा धोका असलेल्या पूरप्रवण भागांतील नागरिकांच्या स्थलांतराचे पूर्वनियोजन करावे. शाळा व निवारा केंद्रांमध्ये आवश्यक सुविधा सज्ज ठेवाव्यात. शहरातील अनधिकृत व धोकादायक होर्डिंग्ज तातडीने काढून टाकावीत. धोकादायक इमारतींची पाहणी करून संबंधितांना नोटिसा द्याव्यात आणि तेथील नागरिकांना सुरक्षित स्थळी हलवावे. महापालिका रुग्णालयांमध्ये अखंडित विद्युत पुरवठा राहील याची खात्री करावी आणि आपत्कालीन परिस्थितीसाठी बेड्स राखीव ठेवावेत. पावसाळ्यात साथीचे रोग पसरू नयेत म्हणून नियमित निर्जंतुकीकरण व धुरीकरण करावे.आपत्कालीन परिस्थितीत तत्काळ मदतीसाठी आपत्ती व्यवस्थापन, अग्निशमन, आरोग्य, विद्युत आणि उद्यान विभागाच्या कर्मचाऱ्यांचा समावेश असलेली ‘क्विक रिस्पॉन्स टीम’ कार्यरत ठेवावी. रस्त्यांवरील खड्डे पावसाळ्यापूर्वी बुजवावेत. सीसीटीव्ही यंत्रणा तपासून नादुरुस्त कॅमेरे दुरुस्त करावेत आणि मध्यवर्ती पूरनियंत्रण कक्षातून सातत्याने देखरेख ठेवावी.

मान्सूनपूर्व तयारीसोबतच आयुक्तांनी ‘अतिक्रमणमुक्त फुटपाथ’ पंधरवड्याचा आढावा घेतला. फुटपाथवरील अतिक्रमणांवर कारवाई करताना कोणालाही अभय देऊ नका, असे सांगत पादचारी मार्ग मोकळे ठेवण्याच्या कामात कोणतीही तडजोड खपवून घेतली जाणार नाही, असा इशारा त्यांनी क्षेत्रीय अधिकाऱ्यांना दिला.

या बैठकीस अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, सह आयुक्त मनोज लोणकर, मुख्य अभियंता प्रमोद ओंभासे यांच्यासह विविध विभागांचे अधिकारी व कर्मचारी उपस्थित होते. सहाय्यक आयुक्त तानाजी नरळे यांनी उपाययोजनांचे सादरीकरण केले.

© २०२६ मॅक्स मंथन डेली न्यूज. सर्व हक्क राखीव.

पिंपरी-चिंचवड मनपा: शालेय गणवेश वाटपावरून राष्ट्रवादीत ‘ठिणगी’; विरोधी पक्षनेते आणि नगरसेवकांमध्ये जुंपली!

पिंपरी चिंचवड प्रतिनिधी बालाजी नवले, ८ मे २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या प्राथमिक आणि माध्यमिक शाळेतील विद्यार्थ्यांना देण्यात येणाऱ्या शालेय साहित्यावरून सध्या पालिकेच्या राजकारणात मोठा गदारोळ माजला आहे. राष्ट्रवादी काँग्रेस पक्षांतर्गत असलेला अंतर्गत कलह आता चव्हाट्यावर आला असून, विरोधी पक्षनेते आणि नगरसेवकांमध्ये ‘क्रेडिट वॉर’ आणि संशयास्पद शिफारसींच्या चर्चांना उधाण आले आहे.

या प्रकरणाला वाचा फोडली ती राष्ट्रवादी काँग्रेसचे नगरसेवक संदीप वाघेरे यांनी. वाघेरे यांनी स्थायी समिती अध्यक्ष आणि आयुक्तांना दिलेल्या निवेदनात स्पष्ट केले आहे की, शालेय गणवेश वाटपासंदर्भातील कोणत्याही प्रस्तावावर त्यांनी स्वाक्षरी केलेली नाही. जर कोणी त्यांच्या नावाचा किंवा स्वाक्षरीचा परस्पर गैरवापर केला असेल, तर संबंधित व्यक्तीवर कठोर कायदेशीर कारवाई करण्यात यावी, अशी मागणी त्यांनी केली आहे.

संदीप वाघेरे हे नेहमी आपल्या मतदारांच्या प्रश्नांसाठी ठामपणे उभे राहणारे लोकप्रतिनिधी म्हणून ओळखले जातात. महानगरपालिकेच्या कुठल्याही टक्केवारीच्या राजकारणात रस न दाखवता, करदात्या नागरिकांच्या पैशांचा योग्य विनियोग व्हावा, हीच त्यांची भूमिका राहिली आहे. खऱ्या अर्थाने विरोधी पक्षनेते पदासाठी त्यांचे नाव चर्चेत असतानाही, वरिष्ठांच्या पातळीवर झालेल्या हालचालींमुळे ते मागे पडल्याची भावना त्यांच्या समर्थकांमध्ये आहे.

एकीकडे वाघेरे यांनी प्रस्तावापासून अंतर राखले असताना, दुसरीकडे विरोधी पक्षनेते भाऊसाहेब भोईर यांनी आयुक्तांना शिफारस पत्र देऊन नवीन वादाला तोंड फोडले आहे. भोईर यांनी सोलापूर येथील ‘श्री जगदंबा महिला रेडीमेड ड्रेसेस विविध उत्पादन सहकारी औद्योगिक संस्था’ या संस्थेला गणवेश वाटपाचे काम देण्याची शिफारस केली आहे. ही संस्था दिव्यांग आणि अपंगांसाठी कार्यरत असल्याचा दावा त्यांनी केला असला, तरी या शिफारसीच्या वेळेवरून संशय व्यक्त केला जात आहे.

या घडामोडींमुळे पालिकेच्या वर्तुळात उलट-सुलट चर्चा सुरू आहेत. “विरोधी पक्षनेते हे सत्ताधाऱ्यांशी किंवा विशिष्ट संस्थांशी ‘मॅनेज’ झाले आहेत का?” असा प्रश्न दबक्या आवाजात विचारला जात आहे. विशेष म्हणजे, आपल्या ज्येष्ठतेचा हवाला देऊन आपण स्वच्छ आहोत असा दावा करणारे नेते स्वपक्षीय नगरसेवकांना विश्वासात का घेत नाहीत, असा सवाल वाघेरे यांच्या भूमिकेनंतर उपस्थित झाला आहे.

येणाऱ्या शैक्षणिक वर्षासाठी (२०२६-२७) बालवाडी ते १० वीच्या विद्यार्थ्यांना १५ जूनपर्यंत साहित्य मिळणे आवश्यक आहे. मात्र, निविदा प्रक्रियेतील राजकीय हितसंबंध आणि संशयास्पद स्वाक्षऱ्यांच्या आरोपामुळे हा ‘गणवेशाचा खेळ’ आता वादाच्या भोवऱ्यात अडकला आहे. याचा फटका गरीब विद्यार्थ्यांना बसण्याची शक्यता निर्माण झाली असून, पालिका प्रशासन आता यावर काय निर्णय घेणार, याकडे पालकांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव.

रक्षक चौक उड्डाणपुलाचे काम अंतिम टप्प्यात; औंध ते किवळे प्रवास लवकरच होणार सिग्नलमुक्त

पिंपरी चिंचवड प्रतिनिधी लक्ष्मण प्रधान, ७ मे २०२६ मॅक्स मंथन डेली न्यूज:

पिंपरी: पिंपळे निलख येथील रक्षक चौकात सुरू असलेल्या उड्डाणपुलाचे काम आता पूर्णत्वाच्या टप्प्यावर आले आहे. या पुलामुळे औंध ते सांगवी फाटा आणि रावेतपासून पुढे किवळेपर्यंतचा प्रवास लवकरच सिग्नलमुक्त आणि वाहतूककोंडीमुक्त होणार आहे. चिंचवड विधानसभेचे आमदार शंकर जगताप यांच्या मार्गदर्शनाखाली या प्रकल्पाची नुकतीच पाहणी करून सद्यस्थितीचा आढावा घेण्यात आला.

या महत्त्वपूर्ण प्रकल्पाबाबत आमदार शंकर जगताप यांच्या मार्गदर्शनाखाली पिंपळे गुरव येथील जनसंपर्क कार्यालयात संबंधित अधिकाऱ्यांची बैठकही पार पडली. यावेळी स्थायी समिती सभापती अभिषेक बारणे यांनी प्रकल्पाच्या प्रगतीची सविस्तर माहिती दिली.

रक्षक चौक हा शहरातील वाहतुकीच्या दृष्टीने अत्यंत कळीचा टप्पा मानला जातो. या पार्श्वभूमीवर झालेल्या पाहणी दौऱ्यात काही महत्त्वाचे निर्देश देण्यात आले:

 पुलाच्या कामासह संलग्न असलेल्या बीआरटी बस वाहतुकीचे नियोजन करताना प्रवाशांच्या सुरक्षिततेला सर्वोच्च प्राधान्य देण्याचे निर्देश प्रशासनाला दिले आहेत. पुलाचे रेलिंग आणि संपूर्ण कामाचे तातडीने ‘सेफ्टी ऑडिट’ करण्याच्या सूचना संबंधित विभागाच्या अधिकाऱ्यांना देण्यात आल्या आहेत. या उड्डाणपुलामुळे नागरिकांच्या वेळेची आणि इंधनाची मोठी बचत होणार असून, सांगवी-किवळे या संपूर्ण बीआरटी मार्गावरील वाहतूक अधिक वेगवान होणार आहे.

या प्रकल्पाच्या पाहणीवेळी नगरसेविका आरती चोंधे, नगरसेविका स्नेहा कलाटे, महापालिकेचे मुख्य अभियंता प्रमोद ओंभासे, सामाजिक कार्यकर्ते संकेत चोंधे, प्रसाद कस्पटे, सनी बारणे यांच्यासह संबंधित विभागाचे अधिकारी उपस्थित होते.

“आमदार शंकर जगताप यांच्या मार्गदर्शनाखाली या प्रकल्पाचा आढावा घेतला असून, हा पूल लवकरात लवकर नागरिकांच्या सेवेसाठी खुला करण्याचे नियोजन आहे. प्रवाशांचा प्रवास सुखकर आणि सुरक्षित व्हावा, यासाठी सेफ्टी ऑडिटबाबत कडक सूचना दिल्या आहेत. पिंपरी-चिंचवडच्या सुलभ वाहतुकीसाठी आम्ही कटिबद्ध आहोत.”

— अभिषेक बारणे, सभापती, स्थायी समिती, पिंपरी-चिंचवड महापालिका.

© २०२६ मॅक्स मंथन डेली न्यूज. सर्व हक्क राखीव.

युवा खेळाडूंना दर्जेदार व्यासपीठ उपलब्ध करून देण्यासाठी महापालिका कटिबद्ध — महापौर रवि लांडगे

पिंपरी चिंचवड प्रतिनिधी बालाजी नवले, ७ मे २०२६ मॅक्स मंथन डेली न्यूज:

पिंपरी: “कबड्डी हा आपल्या मातीतला आणि महाराष्ट्राच्या संस्कृतीशी जोडलेला खेळ आहे. ग्रामीण भागातील प्रतिभेला संधी देणे आणि युवा खेळाडूंना दर्जेदार व्यासपीठ उपलब्ध करून देणे हाच महापौर चषक स्पर्धेचा मुख्य उद्देश आहे. क्रीडा क्षेत्रात पिंपरी-चिंचवड शहराचा दबदबा निर्माण करण्यासाठी महानगरपालिका कटिबद्ध आहे,” असे प्रतिपादन महापौर रवि लांडगे यांनी केले.

पिंपरी-चिंचवड महानगरपालिकेच्या वतीने भोसरी येथील गावजत्रा मैदानात आयोजित ‘महापौर चषक राज्यस्तरीय कबड्डी स्पर्धा २०२६’ चे उद्घाटन महापौर लांडगे यांच्या हस्ते झाले, त्यावेळी ते बोलत होते.

या सोहळ्याला आमदार महेश लांडगे, आमदार शंकर जगताप, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, पीएमपीएल अध्यक्ष डॉ. महेश आव्हाड, क्रीडा समिती सभापती कैलास कुटे, नगरसदस्य योगेश लांडगे, कुंदन गायकवाड, उपायुक्त पंकज पाटील आणि जनता संपर्क अधिकारी प्रफुल्ल पुराणिक यांच्यासह क्रीडा क्षेत्रातील अनेक मान्यवर उपस्थित होते.

 ही स्पर्धा १० मे २०२६ पर्यंत चालणार आहे. राज्यभरातील ३६ पुरुष आणि २४ महिला संघांतील एकूण ८१२ खेळाडूंचा सहभाग. सामने शिस्तबद्ध पद्धतीने पार पाडण्यासाठी ५५ अनुभवी सामनाधिकारी कार्यरत आहेत. या स्पर्धेतील बक्षिसांची रक्कम एकूण १७ लाख ५० हजार रुपये इतकी असून, ती खालीलप्रमाणे विभागली आहे:

• प्रथम क्रमांक: २ लाख रुपये (पुरुष व महिला गट स्वतंत्र).

• द्वितीय क्रमांक: १ लाख ५० हजार रुपये.

• तृतीय व चतुर्थ क्रमांक: प्रत्येकी १ लाख रुपये.

• वैयक्तिक पुरस्कार: उत्कृष्ट चढाई, उत्कृष्ट पकड आणि अष्टपैलू खेळाडूंना रोख पारितोषिके दिली जाणार आहेत.

आमदार महेश लांडगे यांनी नमूद केले की, अशा स्पर्धांमुळे शहरातील क्रीडा संस्कृती अधिक बळकट होईल, तर आमदार शंकर जगताप यांनी तरुणांना खेळाकडे करिअर म्हणून पाहण्याचे आवाहन केले. या राज्यस्तरीय स्पर्धेमुळे शहरात सध्या क्रीडामय वातावरण निर्माण झाले आहे.

© २०२६ मॅक्स मंथन डेली न्यूज. सर्व हक्क राखीव.