अमरावती: समाजकल्याण स्थापना दिनाचे औचित्य साधून नशाबंदी मंडळ महाराष्ट्र राज्य (जिल्हा अमरावती) यांच्या वतीने समाजकल्याण विभागाचे प्रादेशिक उपायुक्त राजेंद्र जाधवर यांना कृतज्ञता सन्मानपत्र प्रदान करून गौरविण्यात आले. तसेच समाजकल्याण विभागातील अधिकारी व कर्मचाऱ्यांचे स्वागत करत त्यांच्या सामाजिक योगदानाप्रती कृतज्ञता व्यक्त करण्यात आली. हा प्रेरणादायी कार्यक्रम अमरावती येथील समाजकल्याण कार्यालयीन सभागृहात उत्साहात पार पडला.

नशाबंदी मंडळ महाराष्ट्र राज्याचे जिल्हा संघटक प्रफुल्ल मंदा श्रीधर कुकडे यांच्या मार्गदर्शनाखाली व आयोजनातून हा उपक्रम राबविण्यात आला. समाजातील वंचित, दुर्बल आणि गरजू घटकांसाठी अहोरात्र कार्य करणाऱ्या समाजकल्याण विभागाच्या अधिकारी-कर्मचाऱ्यांच्या कार्याचा गौरव करणे आणि सामाजिक बांधिलकी दृढ करणे, हा यामागील मुख्य उद्देश होता.

या कार्यक्रमास महाराष्ट्र अंधश्रद्धा निर्मूलन समितीचे अमरावती जिल्हा प्रधान सचिव विजय डवरे, महिला राजसत्ता आंदोलनाच्या जिल्हा समन्वयक प्रतिभा खापरे, क्रांती मीडियाचे सचिन वासनिक आणि नशाबंदी मंडळ महाराष्ट्र राज्याचे संजय खापरे प्रामुख्याने उपस्थित होते. मान्यवरांच्या हस्ते उपायुक्त राजेंद्र जाधवर यांचा सत्कार करण्यात आला.

या कार्यक्रमाचे औचित्य साधून ‘वाचन प्रेरणा दिन’ देखील साजरा करण्यात आला. वाचनाची आवड निर्माण व्हावी, ज्ञानाचा प्रसार व्हावा आणि समाजात वैचारिक जागृती घडावी, यासाठी उपस्थितांना जनजागृतीपर पत्रकांचे वितरण करण्यात आले.

यावेळी बोलताना मान्यवरांनी सांगितले की, वाचन माणसाला योग्य विचार करायला शिकवते, तर सामाजिक प्रबोधन माणसाला विवेकाने जगण्याची दिशा देते. व्यसनांचे दुष्परिणाम समजावून सांगून एक आरोग्यदायी आणि व्यसनमुक्त जीवनशैली अंगीकारण्याचा संदेश यावेळी देण्यात आला. समाजकल्याण विभागातील अधिकाऱ्यांचा सन्मान, वाचन संस्कृतीचा प्रसार आणि व्यसनमुक्ती जनजागृतीच्या माध्यमातून सकारात्मक समाजनिर्मितीचा विचार या कार्यक्रमातून प्रभावीपणे अधोरेखित करण्यात आला.