पिंपरी: धम्मचक्र प्रवर्तन दिनाच्या पूर्वसंध्येला सांगवी येथील संविधान चौकातील भारतीय संविधानाची प्रास्ताविका कोणत्याही प्रशासकीय परवानगीशिवाय अचानक तोडून जमीनदोस्त करण्यात आली. हे कृत्य अत्यंत दुर्दैवी, संतापजनक आणि संविधानाचा थेट अवमान करणारे असून, याप्रकरणी संबंधित दोषींवर तातडीने देशद्रोहाचा गुन्हा दाखल करावा, अशी आक्रमक मागणी पिंपरी-चिंचवड शहर जिल्हा काँग्रेस कमिटीने केली आहे.

या संदर्भात पिंपरी-चिंचवड शहर जिल्हा काँग्रेस कमिटीचे अध्यक्ष नरेंद्र बनसोडे यांनी पिंपरी-चिंचवड पोलीस आयुक्तांना थेट लेखी पत्र पाठवून कठोर कारवाईची मागणी नोंदवली आहे.

 धम्मचक्र प्रवर्तन दिनाच्या पवित्र पर्वावर महामानव भारतरत्न डॉ. बाबासाहेब आंबेडकर यांनी दिलेल्या भारतीय संविधानाच्या प्रास्ताविकेची मोडतोड करून ती जमीनदोस्त करण्यात आली. हे कृत्य कोणत्याही पूर्वपरवानगीशिवाय करण्यात आल्याचे महापालिकेच्या संबंधित ‘ह’ प्रभागाच्या अधिकाऱ्यांनी स्पष्ट केले आहे. स्थानिक भाजप नगरसेविका व ‘ह’ क्षेत्रीय कार्यालयाच्या अध्यक्षा तृप्ती संतोष कांबळे यांनी सामूहिक पद्धतीने हे कृत्य घडवून आणले असल्याचा थेट आरोप काँग्रेसने पत्रात केला आहे. कोणत्याही प्रशासकीय परवानगीशिवाय घडलेले हे कृत्य अतिशय गंभीर आणि देशविरोधी स्वरूपाचे असल्याचे त्यांनी म्हटले आहे.  या राष्ट्रविरोधी आणि संविधानाचा अवमान करणाऱ्या कृत्यात सहभागी असलेल्या सर्व दोषी व्यक्तींवर पोलिसांनी तत्काळ कठोर कायदेशीर कारवाई करावी. जर कारवाईस विलंब होत असेल, तर त्याची स्पष्ट कारणे प्रशासनाने जाहीर करावीत, अशी मागणी काँग्रेसने केली आहे.