पिंपरी चिंचवड: जुनी सांगवी येथील ढोरेनगर, गल्ली क्रमांक १ मध्ये गेल्या काही दिवसांपासून भटक्या कुत्र्यांचा वावर मोठ्या प्रमाणात वाढल्याने स्थानिक नागरिक त्रस्त झाले आहेत. या भटक्या कुत्र्यांमुळे परिसरातील महिला, शाळकरी मुले, ज्येष्ठ नागरिक, दुचाकीस्वार, नोकरदार आणि विद्यार्थ्यांच्या सुरक्षेचा प्रश्न निर्माण झाला असून, पिंपरी-चिंचवड महानगरपालिकेने या समस्येवर तातडीने उपाययोजना करावी, अशी तीव्र मागणी नागरिकांकडून केली जात आहे.

दिवसाच्या वेळी ही भटकी कुत्री रस्त्यावरून जाणाऱ्या दुचाकीस्वारांच्या वाहनांचा अचानक पाठलाग करतात. कुत्री अंगावर धावून आल्याने घाबरून अनेक वाहनचालकांचे वाहनावरील नियंत्रण सुटून खाली पडण्याच्या आणि दुखापत होण्याच्या घटना घडत आहेत.

त्याचप्रमाणे, रात्रीच्या वेळी गल्लीमध्ये अनेक कुत्री एकत्र जमून ये-जा करणाऱ्या नागरिकांवर भुंकतात. विशेषतः मध्यरात्रीच्या वेळी त्यांच्या मोठ्या आवाजात भुंकण्यामुळे व भांडणांमुळे संपूर्ण परिसरातील नागरिकांच्या आणि बालकांच्या झोपेत गंभीर व्यत्यय येत आहे.

परिसरातील काही श्वानप्रेमी दररोज या भटक्या कुत्र्यांना दूध, बिस्कीट व इतर खाद्यपदार्थ खाऊ घालतात. यामुळे आजूबाजूच्या परिसरातील कुत्री याच गल्लीत मोठ्या संख्येने एकत्र जमा होतात. खाद्य देणाऱ्यांना स्थानिक नागरिकांनी याबाबत समजावून सांगण्याचा प्रयत्न केला असता, ते ऐकून घेण्याच्या मनस्थितीत नसतात, असा आरोपही रहिवाशांनी केला आहे.

पिंपरी-चिंचवड महापालिका प्रशासनाने या समस्येकडे गांभीर्याने लक्ष देऊन परिसरातील भटक्या कुत्र्यांचे तात्काळ निर्बीजीकरण (Sterilization), लसीकरण (Vaccination) आणि सुरक्षित पद्धतीने व्यवस्थापन करावे. नागरिकांना त्रास होणार नाही आणि कुत्र्यांनाही कोणतीही इजा पोहचणार नाही, अशा पद्धतीने या समस्येवर तातडीने व कायमस्वरूपी तोडगा काढावा, अशी मागणी स्थानिक रहिवासी सुनील मधुकर पोकरे (शिवतीर्थ अपार्टमेंट, ढोरेनगर, जुनी सांगवी) यांच्यासह परिसरातील नागरिकांनी केली आहे.