देशातील महागाई कमी करण्यात केंद्र सरकार अपयशी — कामगार नेते काशिनाथ नखाते यांची टीका!
पिंपरी-चिंचवड प्रतिनिधी लक्ष्मण प्रधान, दि. २२ नोव्हेंबर २०२६ मॅक्स मंथन डेली न्यूज:
पिंपरी: देशातील वाढत्या महागाईमुळे सर्वसामान्य नागरिकांचे आर्थिक गणित पूर्णपणे कोलमडले असून महागाईला आळा घालण्यात केंद्र सरकार अपयशी ठरले आहे, अशी घणाघाती टीका कामगार नेते काशिनाथ नखाते यांनी केली. ऑक्टोबर २०२६ मध्ये देशाचा घाऊक महागाई दर १२.२९ टक्क्यांवर पोहोचला असून, सप्टेंबर महिन्याच्या (११.३९ टक्के) तुलनेत अवघ्या एका महिन्यात ०.९० टक्क्यांची वाढ झाल्याने नागरिकांवरील आर्थिक ताण असह्य झाला असल्याचे त्यांनी सांगितले.
वाढत्या महागाईच्या निषेधार्थ कष्टकरी संघर्ष महासंघ महाराष्ट्र आणि कष्टकरी रिक्षा-टॅक्सी चालक संघर्ष महासंघाच्या वतीने चिंचवड येथील थरमॅक्स चौकात जोरदार निषेध आंदोलन करण्यात आले.
आंदोलनादरम्यान नखाते यांनी महागाईच्या वाढत्या आकडेवारीकडे लक्ष वेधले. जानेवारीमध्ये १.८१ टक्के असलेला घाऊक महागाई दर जूनमध्ये ९.८७ टक्क्यांवर गेला आणि आता ऑक्टोबरमध्ये १२.१९ ते १२.२९ टक्क्यांच्या पातळीवर पोहोचला आहे. घाऊक मूल्य निर्देशांकाचे आधार वर्ष २०२२-२३ असून, सप्टेंबरच्या तुलनेत ऑक्टोबरमध्ये त्यात ०.७१ टक्क्यांची वाढ होऊन हा निर्देशांक ११३.३ वर पोहोचला आहे. ऑक्टोबरमध्ये इंधन आणि वीज क्षेत्रातील किमतींत ४.७१ टक्क्यांची वाढ झाली असून, कच्चे तेल व नैसर्गिक वायूच्या किमतीही कडाडल्या आहेत. घाऊक बाजारात कच्चा माल, इंधन आणि धातू महागल्याने कंपन्यांचा उत्पादन खर्च वाढतो. परिणामी, दुकानांतील आणि मॉलमधील वस्तू महाग होऊन त्याची थेट झळ किरकोळ ग्राहकांना बसत आहे.
केंद्र सरकार केवळ मोठमोठ्या जाहिराती आणि घोषणांमध्ये व्यस्त असून इंधन, खाद्यपदार्थ व जीवनावश्यक वस्तूंच्या वाढत्या किमतींमुळे कष्टकरी, कामगार आणि रिक्षाचालकांचे जगणे कठीण झाले आहे. सरकारने महागाई कमी करण्यासाठी तातडीने ठोस पावले उचलावीत, अशी मागणी यावेळी करण्यात आली.
या निषेध आंदोलनात प्रदेश उपाध्यक्ष राजेश माने, निमंत्रक लाला राठोड, अंजना जाधव, लता साळुंखे, वहिदा शेख, विजय कोरे, विनय कदम यांच्यासह पदाधिकारी व कष्टकरी मोठ्या संख्येने उपस्थित होते.
© २०२६ मॅक्स मंथन डेली न्यूज. सर्व हक्क राखीव.

