30
पिंपरी चिंचवड महापालिकेच्या वतीने थेरगाव येथे ‘सफाई मित्र सुरक्षा शिबिर’ संपन्न; १,५०० हून अधिक सफाई सेवकांचा सहभाग!
पिंपरी चिंचवड प्रतिनिधी आकाश कांबळे, दि. २८ सप्टेंबर २०२६ मॅक्स मंथन डेली न्यूज:
पिंपरी: शहराच्या स्वच्छतेची महत्त्वाची जबाबदारी पार पाडणाऱ्या सफाई सेवकांच्या आरोग्याची नियमित तपासणी आणि सुरक्षित कामकाजाबाबत जनजागृती करण्यासाठी पिंपरी चिंचवड महानगरपालिकेच्या आरोग्य विभागाच्या वतीने ‘स्वच्छता ही सेवा २०२६’ अंतर्गत भव्य ‘सफाई मित्र सुरक्षा शिबिरा’चे आयोजन करण्यात आले. थेरगाव येथील कै. शंकरराव गावडे कामगार भवन येथे पार पडलेल्या या शिबिरात ‘अ’, ‘ब’, ‘ड’, ‘ग’ आणि ‘ज’ या पाच क्षेत्रीय कार्यालयांतर्गत कार्यरत १,५०० हून अधिक सफाई सेवकांनी उत्स्फूर्त सहभाग नोंदवला. शिबिराचे उद्घाटन ‘ग’ क्षेत्रीय अधिकारी मुकेश कोळप यांच्या हस्ते पार पडले.
या शिबिरात सर्व सफाई सेवकांची हिमोग्लोबिन, रक्तदाब (BP) आणि मधुमेहाची (Diabetes) मोफत तपासणी करण्यात आली. काम करताना आरोग्य जपण्यासाठी संतुलित आहार, नियमित व्यायाम, योगासने, ताणतणाव व्यवस्थापन आणि सुरक्षा साधनांचा वापर या विषयांवर तज्ज्ञांनी मार्गदर्शन केले.
“सफाई सेवकांचे काम शारीरिकदृष्ट्या आव्हानात्मक असल्याने आरोग्य तपासणी आणि संतुलित आहार आवश्यक आहे. समस्या वेळीच समजल्यास योग्य उपचार शक्य होतात.” – उप आयुक्त डॉ. प्रदीप ठेंगल
“आरोग्य तपासणीसोबतच सफाई सेवकांनी मानसिक आरोग्य आणि ताणतणाव व्यवस्थापनाकडेही विशेष लक्ष दिले पाहिजे.” – आरोग्य वैद्यकीय अधिकारी डॉ. लक्ष्मण गोफणे
सफाई सेवकांच्या आरोग्याबरोबरच त्यांच्या कुटुंबातील १८ ते ३५ वयोगटातील युवक-युवतींना रोजगाराच्या संधी उपलब्ध करून देण्यासाठी समाजविकास विभागाच्या वतीने ‘लाइट हाऊस कौशल्य’ माहिती केंद्र उभारण्यात आले होते.
या केंद्राद्वारे वैशाली खरात यांनी अकाउंटिंग, ईव्ही व्हेईकल टेक्निशियन, बँकिंग, डेटा ॲनालिस्ट, हॉटेल मॅनेजमेंट, मोबाईल रिपेअरिंग, रिटेल मॅनेजमेंट, आणि संगणक प्रशिक्षण अशा विविध मोफत कौशल्य अभ्यासक्रमांची माहिती देऊन तरुणांना मार्गदर्शन केले.
‘सेवा संकल्प अभियाना’अंतर्गत बुधवार, दि. ३० सप्टेंबर २०२६ रोजी ‘क’, ‘इ’, ‘फ’, ‘ह’ आणि ‘ल’ या उर्वरित ५ क्षेत्रीय कार्यालयांतर्गत कार्यरत सफाई सेवकांसाठी पुढील शिबिर आयोजित केले जाणार आहे.
“सफाई सेवक शहर स्वच्छ ठेवण्यासोबतच नागरिकांच्या आरोग्याचे रक्षण करतात. सफाई सेवकांचे आरोग्य जपणे म्हणजेच संपूर्ण शहराच्या आरोग्याची काळजी घेणे होय.”— डॉ. विजय सूर्यवंशी, आयुक्त, पिंपरी चिंचवड महानगरपालिका“सफाई सेवकांच्या कुटुंबातील युवक-युवतींना त्यांच्या आवडीनुसार कौशल्य प्रशिक्षण देऊन त्यांना रोजगारक्षम बनवण्यासाठी महापालिका कटिबद्ध आहे.”— कुलदीप जंगम, अतिरिक्त आयुक्त, पिंपरी चिंचवड महानगरपालिका
या प्रसंगी अतिरिक्त आरोग्य वैद्यकीय अधिकारी डॉ. अभयचंद्र दादेवार, जनता संपर्क अधिकारी प्रफुल्ल पुराणिक, सहाय्यक आरोग्य अधिकारी श्रीराम गायकवाड, सुधीर वाघमारे, अंकुश झिटे, अतुल सोनवणे, राजू साबळे, शांताराम माने, डॉ. संजय सोनेकर, डॉ. शंकर मोसलगी आदी उपस्थित होते. कार्यक्रमाचे प्रास्ताविक सहाय्यक आरोग्याधिकारी अतुल सोनवणे यांनी केले, सूत्रसंचालन प्रफुल्ल पुराणिक यांनी तर आभार प्रदर्शन सुधीर वाघमारे यांनी केले.
© २०२६ मॅक्स मंथन डेली न्यूज. सर्व हक्क राखीव.
