पुणे: पुणे ग्रामीणचे पोलीस अधीक्षक आणि २०१६ च्या बॅचचे आयपीएस (IPS) अधिकारी संदीपसिंग गिल यांनी  ग्रामीण भागातील गुन्हेगारीचे बदलते स्वरूप, केतन अगरवाल हत्याकांड, कोयता गँग, अमली पदार्थांचे नेटवर्क आणि औद्योगिकीकरणासमोरील आव्हाने यावर सविस्तर भाष्य केले. प्रशासकीय सेवेत येण्यापूर्वी इंग्रजी साहित्याचे प्राध्यापक राहिलेल्या संदीपसिंग गिल यांनी गुन्ह्यांचा तपास आणि पोलीस यंत्रणेसमोरील महत्त्वाच्या मुद्द्यांवर प्रकाश टाकला.

केतन अगरवाल हत्याकांडाबाबत बोलताना पोलीस अधीक्षक संदीपसिंग गिल म्हणाले की, “या प्रकरणात कोणताही राजकीय किंवा कौटुंबिक दबाव नव्हता; तर ठोस पुरावे गोळा करणे हेच मुख्य आव्हान होते. १९ जूनच्या ‘दैनिक गुन्हे अहवालात’ (DCR) किल्ल्याच्या भिंतीवरून फोटो काढताना पडून एका तरुणाचा मृत्यू झाल्याची नोंद होती. मात्र, अवघ्या १२ दिवसांपूर्वी (६ जून) त्यांचा बालीचा प्लॅन आणि पासपोर्ट गहाळ होणे, यामुळे संशय बळावला.”

तपासादरम्यान एएसआय (ASI) तिकीट काऊंटरचे सीसीसीटीव्ही (CCTV) फुटेज तपासले असता, सिया आणि केतनचा पाठलाग करणारा एक तिसरा संशयित व्यक्ती दिसला. त्या कडक उन्हात हिवाळी हुडी आणि हेडफोन घातलेल्या या व्यक्तीचे व सियाचे सांकेतिक भाषेत संभाषण चालले होते.

 केतनला किल्ल्यावर आणण्यासाठी मैत्रिणीच्या नावाने बनावट इंस्टाग्राम अकाउंट तयार करण्यात आले होते. ३१ मे, ४ जून, १४ जून आणि शेवटी १८ जून रोजी त्याला फसवून तेथे नेण्यात आले.१९ सप्टेंबर रोजी न्यायालयाने आरोपींच्या विरोधात भक्कम ५,००० पानांचे दोषारोपपत्र (Chargesheet) स्वीकारले आहे. यामध्ये प्रत्यक्षदर्शी, तांत्रिक पुरावे (फोन कॉल्स, व्हॉट्सॲप चॅट्स, इंटरनेट प्रोटोकॉल डिटेल रेकॉर्ड्स) आणि परिस्थितिजन्य पुरावे यांची साखळी अत्यंत भक्कम जोडण्यात आली आहे.

शहरीकरण आणि एमआयडीसी (MIDC) क्लस्टर्स वाढल्याने जमिनीचे भाव प्रचंड वाढले आहेत. त्यामुळे जमिनीशी संबंधित गुन्हे आणि खंडणीचे प्रकार वाढले आहेत. एमआयडीसी उद्योजकांना धमक्या आल्यास तात्काळ पोलीस तक्रार करण्याचे आवाहन त्यांनी केले आहे.  ग्रामीण भागात शेतीसाठी वापरल्या जाणाऱ्या तीक्ष्ण शस्त्रांचा (कोयता) गैरवापर करून गुन्हेगारी टोळ्या दहशत पसरवत आहेत. तसेच बेकायदेशीर बंदुकांचा वापर वाढला असून त्यावर कडक कारवाई केली जात आहे.  ग्रामीण भागात अमली पदार्थांचा वापर ही चिंतेची बाब बनली आहे. एकट्या शिरूर तालुक्यात यंदा मेफेड्रोन (Mephedrone) आणि इतर ड्रग्सचे १० गुन्हे दाखल झाले असून तरुणांमध्ये जागृती मोहीम राबवली जात आहे.अल्पवयीन मुला-मुलींवरील अत्याचाराच्या घटना रोखण्यासाठी केवळ ‘गुड टच – बॅड टच’ न शिकवता मुलांच्या हक्कांचे रक्षण करण्यासाठी गावपातळीवर पोलीस पाटील आणि स्थानिक कमिटीच्या माध्यमातून ‘सक्षम सुरक्षित संकल्प’ ही विशेष मोहीम सुरू करण्यात आली आहे.