पिंपरी-चिंचवडमध्ये राजकीय भूकंपाचे संकेत: राष्ट्रवादीचे माजी नगरसेवक मोरेश्वर भोंडवे यांच्या अनधिकृत ‘अलिशान’ कार्यालयावर हातोडा पडणार?
महापालिकेच्या ७० ते ८० कोटींच्या जागेवर ‘घुसखोरी’चा गंभीर आरोप; युवराज दाखले यांची गुन्हा दाखल करून कार्यालय पाडण्याची आणि ६ वर्षांच्या निवडणूक बंदीची मागणी!
पिंपरी, दि. २७ जून २०२५ (मॅक्स मंथन डेली न्यूज): पिंपरी चिंचवड महानगरपालिकेत सध्या एका मोठ्या वादळाची शक्यता निर्माण झाली आहे! राष्ट्रवादी काँग्रेस पक्षाचे (अजित पवार गट) माजी नगरसेवक मोरेश्वर भोंडवे यांच्यावर रावेत येथील महापालिकेच्या सुमारे दोन एकर जागेत घुसखोरी करून अनधिकृतपणे आलिशान ‘कॉर्पोरेट’ कार्यालय उभारल्याचा गंभीर आरोप झाला आहे. शिवशाही व्यापारी संघटनेचे संस्थापक अध्यक्ष युवराज दाखले यांनी पिंपरी चिंचवड महानगरपालिकेचे आयुक्त शेखर सिंह यांच्याकडे निवेदनाद्वारे या कार्यालयावर तात्काळ कारवाई करण्याची, भोंडवे यांच्यावर गुन्हा दाखल करण्याची, कार्यालय पाडण्याची आणि नगरसेवक पदाचा गैरवापर केल्याबद्दल त्यांना पुढील सहा वर्षांसाठी निवडणूक लढवण्यास बंदी घालण्याची मागणी केली आहे.
७० ते ८० कोटींच्या जागेवर ‘साम्राज्य’ उभारल्याचा आरोप
युवराज दाखले यांनी आपल्या निवेदनात म्हटले आहे की, माजी नगरसेवक मोरेश्वर भोंडवे यांनी सुमारे सहा वर्षांपूर्वी नगरसेवक असताना आपल्या पदाचा गैरवापर केला. रावेत सेक्टर नंबर २९ मधील भोंडवे कॉर्नर ते जाधव वस्ती या रस्त्यावरील एम.एस.ई.बी.च्या प्लॉट शेजारी असणाऱ्या पिंपरी चिंचवड महापालिकेच्या सुमारे दोन एकर जागेत त्यांनी घुसखोरी केली. या जागेचे आजचे बाजार मूल्य सुमारे ७० ते ८० कोटी रुपये आहे.
दाखले यांच्या आरोपानुसार, भोंडवे यांनी महापालिकेचे कंपाऊंड तोडून प्रथम कंटेनर टाकून आपले कार्यालय सुरू केले आणि त्यानंतर हळूहळू अनधिकृत पणे पक्के बांधकाम करून ‘अलिशान कॉर्पोरेट कार्यालय’ उभारले. ही जागा आपली असल्याप्रमाणे गेल्या सहा वर्षांपासून वापरली जात आहे.
‘अलिशान’ कार्यालयाची कार्यपद्धती आणि ‘दहशत’
निवेदनात पुढे म्हटले आहे की, या अलिशान कार्यालयात मोठ्या ‘डील’ केल्या जातात, शहरात मोठ्या ‘सेटलमेंट’ होत आहेत. रावेत, किवळे या भागातील बिल्डरलांना येथे बोलावून अनेक ‘तडजोड’ केल्या जातात. मोरेश्वर भोंडवे यांना या कार्यालयात भेटण्यासाठी शहरातील मोठमोठ्या व्यक्ती, महापालिकेचे अधिकारी, अभियंते आणि कर्मचारी देखील येत असतात. सर्वांना ही जागा महापालिकेच्या मालकीची आहे हे माहीत असूनही, एकाचीही बोलण्याची हिंमत होत नाही, असा दावा दाखले यांनी केला आहे. या कार्यालयात दररोज आलिशान गाड्यांची वर्दळ असते.
वाढदिवसाच्या कार्यक्रमातूनही वाद
नुकताच, २ जून रोजी मोरेश्वर भोंडवे यांनी याच जागेवर आपला वाढदिवस साजरा केला होता. त्यावेळी भव्यदिव्य असा मंडप टाकण्यात आला होता आणि उपमुख्यमंत्री अजित पवार यांचे ओएसडी विकास पाटील यांच्यासह शहरातील अनेक दिग्गज मंडळी शुभेच्छा देण्यासाठी उपस्थित होती. याच कार्यालयात बसून त्यांनी पाहुणचार घेतला होता.
‘अचानक आलेल्या’ संपत्तीवर प्रश्नचिन्ह
युवराज दाखले यांनी भोंडवे यांच्या आर्थिक स्थितीवरही प्रश्नचिन्ह उपस्थित केले आहे. कै. रामकृष्ण मोरे सरांचे जवळचे कार्यकर्ते असलेले मोरेश्वर भोंडवे हे त्यांच्या निधनानंतर (२००३ मध्ये) एकाएकी प्रकाशझोतात आले आणि त्यांच्याकडे अचानक प्रचंड पैसा आला. ज्यावेळी रावेत भागात लोक जाण्यासाठी घाबरत होते, रस्ते अरुंद होते आणि लोकांच्या दारात साधे शौचालय नसायचे, त्यावेळी मात्र मोरेश्वर भोंडवे यांच्या दारात आलिशान गाड्या होत्या, असे दाखले यांनी म्हटले आहे. मोरेश्वर भोंडवे यांचा कोणताही मोठा व्यवसाय नाही, ते उद्योजक किंवा नामवंत बिल्डर नाहीत, तरीही त्यांच्याकडे अचानक एवढी संपत्ती आली, असा आरोप त्यांनी केला.
गेली १५ ते २० वर्षांपासून ते गणेश मंडळ तसेच नवरात्री उत्सवात अनेक मंडळांच्या लाखो रुपयांच्या पावत्या फाडतात. नेत्यांच्या वाढदिवसाला व स्वतःच्या वाढदिवसाला शहरात मोठमोठे होर्डिंग्ज लावून लाखो रुपये खर्च करतात. रावेत, किवळे भागात त्यांची प्रचंड दहशत असून, तेथील बिल्डर आणि ठेकेदार वैतागले आहेत, असेही निवेदनात नमूद केले आहे. गेल्या दहा ते बारा वर्षात नगरसेवक असताना त्यांनी प्रचंड पैसा कमवल्याचा आरोपही दाखले यांनी केला आहे.
महापालिकेच्या जागेचा गैरवापर सुरूच
दाखले यांनी निवेदनात म्हटले आहे की, मोरेश्वर भोंडवे स्वतःसाठी स्वखर्चाने मोठे कार्यालय घेऊ शकतात, मात्र त्यांना महापालिकेच्या मालकी हक्काच्या जागेवर ताबा मारायचा आहे. विशेष म्हणजे, सध्या याच जागेत महापालिकेने ज्येष्ठ नागरिकांसाठी विरंगुळा केंद्र बांधले आहे, ओपन जिमचे साहित्य बसवले आहे आणि येथे शनिवारी व रविवारी आठवडा बाजारही भरतो.
युवराज दाखले यांनी आयुक्त शेखर सिंह यांच्याकडे पुन्हा एकदा मागणी केली आहे की, “माजी नगरसेवक मोरेश्वर भोंडवे यांनी महापालिकेच्या जागेत घुसखोरी करून एक प्रकारे ताबा मारला आहे, त्यामुळे त्यांच्यावर प्रथम गुन्हा दाखल करावा. तसेच, ते आलिशान कार्यालय व कंटेनर ताबडतोब येथून काढून टाकावा आणि मोरेश्वर भोंडवे यांनी आपल्या नगरसेवक पदाचा गैरवापर केला म्हणून त्यांना निवडणूक लढवण्यासाठी सहा वर्षांची बंदी घालावी.”
या गंभीर आरोपामुळे पिंपरी-चिंचवडच्या राजकीय वर्तुळात मोठी खळबळ उडाली असून, आयुक्त शेखर सिंह आता यावर काय कारवाई करतात, याकडे सर्वांचे लक्ष लागले आहे.
© २०२५ मॅक्स मंथन डेली न्यूज. सर्व हक्क राखीव.
