पिंपरी-चिंचवडमध्ये काँग्रेस ओबीसी विभाग आणि तिरुमला सोशल फाउंडेशनतर्फे गुणवंत विद्यार्थ्यांचा सत्कार!
दहावी-बारावीच्या ९० विद्यार्थ्यांचा गौरव; ‘खेळाडू वृत्तीच्या लोकांमागे काँग्रेस उभी’ – समिता गोरे
पिंपरी-चिंचवड, दि. ३० जून २०२५: पिंपरी चिंचवड शहर जिल्हा काँग्रेस ओबीसी विभाग आणि तिरुमला सोशल फाउंडेशन यांच्या संयुक्त विद्यमाने आज प्रभाग क्रमांक ११ मधील दहावी आणि बारावीच्या शालेय परीक्षेत उत्तीर्ण झालेल्या गुणवंत विद्यार्थ्यांचा सत्कार समारंभ मोठ्या उत्साहात पार पडला. तळागाळातील गुणवंत विद्यार्थ्यांना प्रोत्साहन मिळावे या उद्देशाने आयोजित या कार्यक्रमात एकूण ९० मुलांचा सत्कार करण्यात आला.
माजी व वर्तमान काँग्रेस नेत्यांची उपस्थिती
या कार्यक्रमाला काँग्रेसचे ज्येष्ठ कामगार नेते विष्णुपंत नेवाळे, शिक्षण मंडळ उपसभापती मनोज कांबळे, महाराष्ट्र प्रदेश काँग्रेसच्या क्रीडा विभागाच्या प्रदेशाध्यक्ष सौ. समिता गोरे, प्रदेश काँग्रेस ओबीसी विभागाचे उपाध्यक्ष रवींद्र जांभळे, शिक्षण मंडळाचे सभापती अभिमन्यू दैतुले, महादेव खाडे, मिलिंद फडतरे यांसह अनेक काँग्रेसचे मान्यवर उपस्थित होते. फाउंडेशनच्या वतीने भविष्यात शहरस्तरीय सत्कार समारंभाचे नियोजन केले जाईल, असे यावेळी सांगण्यात आले.
समिता गोरे यांचा खेळाकडे लक्ष देण्याचा सल्ला
राष्ट्रीय काँग्रेस क्रीडा विभागाच्या प्रदेशाध्यक्ष समिता गोरे यांनी यावेळी विद्यार्थ्यांना मोलाचा सल्ला दिला. त्या म्हणाल्या, “दहावी व बारावी नंतर मुलांनी खऱ्या अर्थाने खेळाकडे लक्ष केंद्रित करायला हवं. कारण, अभ्यासासोबत खेळही महत्त्वाचा आहे. खेळामध्ये प्राविण्य मिळवल्यानंतर शासकीय व निमशासकीय मध्ये नोकरीसाठी अनेक संधी उपलब्ध आहेत. काँग्रेस पक्ष नेहमी खेळाडू वृत्तीच्या लोकांच्या पाठीशी उभा आहे.”
फाउंडेशनचे विविध समाजोपयोगी उपक्रम
तिरुमला सोशल फाउंडेशन गुणवंत विद्यार्थ्यांचा सत्कार, रक्तदान शिबिर, हळदीकुंकवाचे कार्यक्रम यांसारखे विविध समाजोपयोगी कार्यक्रम राबवण्यासाठी नेहमीच कार्यरत असते. यावेळी मान्यवरांनी दहावी आणि बारावीच्या मुलांना त्यांच्या पुढील वाटचालीसाठी शुभेच्छा दिल्या. कार्यक्रमाचे प्रस्तावना व आयोजन काँग्रेस ओबीसी सेल शहराध्यक्ष सोमनाथ शेळके यांनी केले.
© २०२५ मॅक्स मंथन डेली न्यूज. सर्व हक्क राखीव.
