शेअर मार्केटमध्ये जादा परताव्याचे आमिष दाखवून ५ कोटींना चुना लावणारे ‘आहेरकर कुटुंबीय’ गजाआड! पिंपरी-चिंचवड आर्थिक गुन्हे शाखेचा नेवासामध्ये ‘धडक सर्जिकल स्ट्राईक’

पिंपरी चिंचवड प्रतिनिधी लक्ष्मण प्रधान, २१ जून २०२६ मॅक्स मंथन डेली न्यूज:

पिंपरी: शेअर बाजार (Share Market) आणि भिशी (Kitty Scheme) मध्ये गुंतवणूक करून दरमहा ४ ते ५ टक्के इतका अवाढव्य परतावा देण्याचे खोटे आमिष दाखवून पिंपरी-चिंचवड परिसरातील शेकडो सुजाण नागरिकांची तब्बल ५ कोटी ३ लाख १४ हजार ३६८ रुपयांची प्रचंड आर्थिक फसवणूक करणाऱ्या आहेरकर कुटुंबाला पोलिसांनी अखेर गजाआड केले आहे. पिंपरी-चिंचवड पोलीस आयुक्तालयाच्या आर्थिक गुन्हे शाखेने (EOW) अत्यंत तांत्रिक आणि गुप्त माहितीच्या आधारे नेवासा (जि. अहिल्यानगर) येथून या संपूर्ण कुटुंबाला बेड्या ठोकल्या आहेत.

या कारवाईमुळे पिंपरी-चिंचवड परिसरात बेकायदेशीर आर्थिक गुंतवणूक योजना चालवणाऱ्या टोळ्यांचे धाबे दणाणले आहेत.

तपास अधिकाऱ्यांनी दिलेल्या माहितीनुसार, अटक करण्यात आलेले सर्व आरोपी एकाच कुटुंबातील असून त्यांची नावे खालीलप्रमाणे आहेत: १) रमेश पुंजा आहेरकर २) सौ. छाया रमेश आहेरकर ३) वेदांत रमेश आहेरकर ४) आदित्य रमेश आहेरकर हे सर्व आरोपी मूळचे शुभारंभ रेसिडेन्सी (फ्लॅट नं. ३०२, दत्त मंदिराजवळ, माण, ता. मुळशी, जि. पुणे) येथील रहिवासी आहेत. या आरोपींनी मिळून आपापसात संगणमत करून गुंतवणूकदारांना जाळ्यात ओढण्यासाठी  वेदांत फायनान्स सर्व्हिस (Vedant Financial Services), आदित्य इंटरप्रायझेस (Aditya Enterprises), त्रिवेणी पुजा भांडार (Triveni Puja Bhandar) या तीन बनावट आणि अनधिकृत फर्म्सची स्थापना केली होती.

आरोपींनी फिर्यादी हनुमंत भागवत जाधव आणि इतर अनेक गुंतवणूकदारांना दरमहा ४ ते ५ टक्के व्याज देण्याचे आमिष दाखवून पैसे गोळा केले. सुरुवातीला काही दिवस परतावा दिल्याचे भासवून नंतर मूळ रक्कमेसह कोणताही परतावा न देता तब्बल ४ कोटी १८ लाख २० हजार ८९० रुपयांचा विश्वासघात केला. पैसे बुडाल्याचे लक्षात आल्यावर जेव्हा गुंतवणूकदारांनी तगादा लावला, तेव्हा हे आहेरकर कुटुंबीय हिंजवडी येथील आपले घर बंद करून आणि मोबाईल बंद करून फरार झाले होते. फिर्यादी जाधव यांच्या तक्रारीवरून हिंजवडी पोलीस ठाण्यात भारतीय न्याय संहिता (BNS) २०२३ च्या विविध कलमांखाली आणि ‘महाराष्ट्र ठेवीदारांचे हितसंरक्षण अधिनियम १९९९’ (MPID Act) च्या कलम ३ व ४ अन्वये गुन्हा दाखल करण्यात आला होता.

या गुन्ह्याचे गांभीर्य ओळखून आर्थिक गुन्हे शाखेच्या वरिष्ठ पोलीस निरीक्षक वनिता धुमाळ आणि पोलीस निरीक्षक सचिन शिर्के यांच्या मार्गदर्शनाखाली सहायक पोलीस निरीक्षक युवराज कलकुटगे यांच्या पथकाने तांत्रिक विश्लेषण आणि गुप्त माहितीच्या आधारे आरोपींचा माग काढला. आरोपी नेवासा (जि. अहिल्यानगर) येथे नाव बदलून राहत असल्याची खात्रीलायक माहिती मिळताच पथकाने तेथे छापा टाकून चारही आरोपींना बेड्या ठोकल्या.

न्यायालयासमोर हजर केले असता आरोपींना २२ जून २०२६ पर्यंत पोलीस रिमांड मंजूर करण्यात आला असून सध्या त्यांची कसून चौकशी सुरू आहे.  तपासादरम्यान पोलिसांनी तातडीने पावले उचलत आरोपींच्या वेगवेगळ्या बँकांमधील एकूण ११ बँक खाती (Debit Freeze) सील केली आहेत.  आरोपींनी या फसवणुकीच्या पैशांमधून खरेदी केलेल्या सर्व चल आणि अचल (स्थावर) मालमत्तेचा शोध पोलीस घेत असून लवकरच या मालमत्ता जप्त करून न्यायालयाच्या माध्यमातून नागरिकांचे पैसे परत मिळवून देण्याची प्रक्रिया सुरू केली जाईल.

पिंपरी-चिंचवड पोलीस आयुक्तालयाच्या वतीने जाहीर आवाहन करण्यात आले आहे की, जर पिंपरी-चिंचवड शहर परिसरात ‘वेदांत फायनान्स सर्व्हिसेस’, ‘त्रिवेणी पुजा भांडार’ किंवा ‘आदित्य इंटरप्रायझेस’ या फर्म्सच्या माध्यमातून इतर कोणाची फसवणूक झाली असेल, तर त्यांनी तात्काळ पुराव्यांसह आर्थिक गुन्हे शाखेकडे संपर्क साधावा.

• संपर्क अधिकारी: सहायक पोलीस निरीक्षक युवराज कलकुटगे (आर्थिक गुन्हे शाखा)
• संपर्क भ्रमणध्वनी क्रमांक: ९६८९०५१५९० (9689051590)

या धडक कारवाईनंतर नागरिकांना सतर्क राहण्याचा इशारा देताना पिंपरी-चिंचवडचे पोलीस आयुक्त मा. श्री. विनयकुमार चौबे म्हणाले:

“शहरातील सुजाण नागरिकांनी नेहमी शेअर बाजारात कमी कालावधीत अवास्तव आणि प्रचंड नफा मिळवून देण्याचे आमिष दाखवणाऱ्या व्यक्ती आणि संस्थांपासून सावध राहिले पाहिजे. अल्प कालावधीत दुप्पट किंवा तिप्पट परतावा देण्याचे खोटे आश्वासन देणाऱ्या कोणत्याही बेकायदेशीर योजना तसेच अनधिकृत मासिक भिशी किंवा किटी योजनांमध्ये नागरिकांनी आपली कष्टाची पुंजी गुंतवू नये. कोणतीही गुंतवणूक करण्यापूर्वी त्या संस्थेची अधिकृतता तपासावी आणि संशय आल्यास तात्काळ पोलिसांशी संपर्क साधावा.”

© २०२६ मॅक्स मंथन डेली न्यूज. सर्व हक्क राखीव.