कोंढाणे बुद्ध लेणी धम्म सहल उत्साहात संपन्न: वृक्षारोपण, फलक दुरुस्तीसह प्राचीन लेण्यांचे संवर्धन!
‘बुद्ध लेण्या मुक्ती आंदोलन समिती’ आणि ‘एकजूट लेणी प्रचार प्रसार समूह’ यांचा संयुक्त उपक्रम; २५० हून अधिक उपासक-उपासिकांचा सहभाग!
रायगड, दि. ३० जून २०२५: पुणे जिल्ह्यातील कर्जत तालुक्यात स्थित असलेल्या ऐतिहासिक कोंढाणे बुद्ध लेणी येथे आज (सोमवार, ३० जून) एक दिवसीय धम्म सहल मोठ्या उत्साहात संपन्न झाली. बुद्ध लेण्या मुक्ती आंदोलन समिती (महाराष्ट्र) व एकजूट लेणी प्रचार प्रसार समूह (महाराष्ट्र) यांच्या संयुक्त विद्यमाने आयोजित या धम्म सहलीत विविध सामाजिक आणि संवर्धन उपक्रम राबवण्यात आले, ज्याला महाराष्ट्रभरातून २५० ते ३०० हून अधिक उपासक-उपासिकांनी उत्स्फूर्त प्रतिसाद दिला.
वृक्षारोपण आणि दिशादर्शक फलकांची दुरुस्ती
लेणीच्या पायथ्याशी पोहोचल्यानंतर एकजूट लेणी प्रचार प्रसार समूहाने आणलेल्या झाडांचे/वृक्षांचे धम्म सहलीत आलेल्या सदस्यांना वाटप करण्यात आले. त्यानंतर लेणीकडे जात असताना मधल्या मोकळ्या जागेत या वृक्षांची लागवड करून पर्यावरण संवर्धनाचा संदेश देण्यात आला. तसेच, लेणीकडे जाणाऱ्या मार्गावरील पूर्वी लावण्यात आलेले दिशादर्शक फलक दुरुस्त करण्यात आले आणि काही नवीन दिशादर्शक फलक लावण्यात आले, जेणेकरून पर्यटकांना योग्य दिशा मिळेल. लेणीमध्येही चप्पल किंवा शूज घालून न जाण्याचा सूचनेचा फलक लावण्यात आला, जे लेण्यांच्या पावित्र्य आणि स्वच्छतेसाठी महत्त्वाचे आहे.
धम्म संस्कार आणि लेण्यांविषयी सखोल माहिती
लेणीमध्ये पोहोचल्यानंतर प्रथम आदरणीय भंन्ते राहुल यांच्या समवेत चैत्यगृहातील स्तूपास प्रदक्षिणा घालण्यात आली. त्यानंतर भंन्ते यांना त्रिशरण पंचशील देण्याची याचना करण्यात आली आणि त्रिशरण पंचशील ग्रहण करून पुढील कार्यक्रमास सुरुवात झाली.
कार्यक्रमाची प्रस्तावना व सूत्रसंचालन लेणीप्रेमी आणि इतिहासप्रेमी मनोज गजभार सर यांनी केले. कोंढाणे बुद्ध लेणीची सविस्तर माहिती पालीभाषा अभ्यासक व विविध लिप्यांचे अभ्यासक, लेणीप्रेमी राजू भालेराव सर यांनी सर्व उपस्थितांना व्यवस्थितरित्या समजावून सांगितली. त्यानंतर प्राचीन लिप्यांचे अभ्यासक व लेणीप्रेमी सुरत सोनकांबळे सर यांनी या लेणीतील शिलालेख व त्याचा अर्थ सोप्या भाषेत उपस्थितांना समजावून सांगितला, ज्यामुळे लेण्यांचा ऐतिहासिक आणि सांस्कृतिक वारसा अधिक स्पष्ट झाला.
पूज्य भंन्ते राहुल यांनी हा आपला प्राचीन वारसा कशाप्रकारे संवर्धित करण्यात येईल, याविषयी अनमोल असे मार्गदर्शन केले.
लेणी संवर्धनाचे आवाहन
एकजूट लेणी प्रचार प्रसार समूह, महाराष्ट्र यांचे संस्थापक अध्यक्ष सारीश डोळस सर यांनी सर्व उपस्थितांचे आभार मानले. तसेच यापुढेही अशा उपक्रमांमध्ये मोठ्या संख्येने उपस्थित राहून या लेण्यांचे संवर्धन करण्याचे आवाहन केले. पुणे, मुंबई या ठिकाणाहून ३ विशेष बसेस आल्या होत्या, तर अनेक सदस्य छोट्या फोर-व्हीलर आणि टू-व्हीलर वाहनांमधून सहभागी झाले होते.
या उपक्रमाला यशस्वी करण्यासाठी मनोज गजभार, सारीश डोळस, रवी कांबळे, राम भंडारे, सुरज सोनकांबळे, राजू भालेराव, सुरेश वाघमारे, राहुल बनसोडे आणि प्रफुल पुरलकर यांनी विशेष प्रयत्न केले. कोंढाणे बुद्ध लेणी येथे राबवलेल्या या धम्म सहलीमुळे ऐतिहासिक वारसा आणि पर्यावरणाच्या संवर्धनासाठी एक नवा आदर्श निर्माण झाला आहे.
© २०२५ मॅक्स मंथन डेली न्यूज. सर्व हक्क राखीव.
