बांधकाम कामगार नोंदणी पूर्णपणे नि:शुल्क! फसवणूक करणाऱ्या मध्यस्थींना पैसे देऊ नका

अमरावती कामगार उप आयुक्त कार्यालयाचे स्पष्टीकरण; लाच मागितल्यास थेट पोलिसांत तक्रार करण्याचे आवाहन

अमरावती, प्रतिनिधी अविनाश वानखेडे, दि.२२ नोव्हेंबर २०२५, मॅक्स मंथन डेली न्यूज:

अमरावती जिल्ह्यात महाराष्ट्र इमारत व इतर बांधकाम कामगार कल्याणकारी मंडळांतर्गत (BOCW) १८ ते ६० वयोगटातील बांधकाम कामगारांसाठी नोंदणी, नूतनीकरण आणि विविध कल्याणकारी योजनांचा लाभ मिळवून देण्याचे काम निरंतर सुरू आहे. मात्र, या प्रक्रियेत मध्यस्थीमार्फत पैशांची मागणी होत असल्याच्या तक्रारींच्या पार्श्वभूमीवर कामगार उप आयुक्त कार्यालयाने महत्त्वाचे स्पष्टीकरण दिले आहे.

कार्यालयाने स्पष्ट केले आहे की, बांधकाम कामगारांच्या नोंदणीची ही संपूर्ण प्रक्रिया www.mahabocw.in या संकेतस्थळाद्वारे नि:शुल्क (Free) ऑनलाईन पद्धतीने केली जाते.

मागील बारा महिन्यांमध्ये ९० दिवसांपेक्षा जास्त दिवस बांधकाम कामगार म्हणून काम केलेल्या व्यक्ती नोंदणीसाठी पात्र आहेत.

• महत्त्वाची अट: कामगारांना या ९० दिवसांच्या कामाचे प्रमाणपत्र सादर करणे आवश्यक आहे.

• अस्थायी कामगार: तात्पुरत्या स्वरूपाचे काम करणाऱ्या कामगारांसाठी ग्रामसेवक किंवा महानगरपालिका, नगरपरिषदेच्या प्राधिकृत अधिकाऱ्याकडून १० दिवसांचे प्रमाणपत्र मिळू शकते.

जिल्ह्यातील अनेक बांधकाम कामगारांकडून मध्यस्थीमार्फत नोंदणी व लाभासाठी अतिरिक्त रकमेची मागणी केली जात असल्याची बाब विभागाच्या निदर्शनास आली आहे. यावर कामगार उप आयुक्त कार्यालयाने ठामपणे सांगितले आहे की, कार्यालयाचा कुठल्याही बाहेरील मध्यस्थींशी संबंध नाही आणि कुठलेही अतिरिक्त शुल्क आकारले जात नाही.

कामगारांना आवाहन:

जिल्ह्यातील कुठल्याही व्यक्तीने किंवा अधिकारी, कर्मचाऱ्याने पैशांची मागणी केल्यास, कामगारांनी त्वरित जवळच्या पोलीस स्टेशनमध्ये किंवा लाच लुचपत प्रतिबंधक विभागास रितसर तक्रार नोंदवावी. यामुळे कामगारांची फसवणूक टळण्यास मदत होईल.

कामगार उप आयुक्त, अमरावती यांनी सर्व कामगारांना www.mahabocw.in या संकेतस्थळावर स्वतःहून नोंदणी, नूतनीकरण करण्याचे आणि मालक, ठेकेदारांनी देखील ‘आपले सरकार’ पोर्टलवर नोंदणी करून कामगारांना नियोक्ता प्रमाणपत्र (Employer Certificate) देण्याचे आवाहन केले आहे.

© २०२५ मॅक्स मंथन डेली न्यूज. सर्व हक्क राखीव.