पिंपरी-चिंचवडकरांची तहान भागणार! भामा आसखेड पाणीपुरवठा प्रकल्पाचे काम युद्धपातळीवर पूर्ण करा; महापौर रवि लांडगे आणि आयुक्त डॉ. विजय सूर्यवंशी यांचे निर्देश

पिंपरी-चिंचवड प्रतिनिधी: बालाजी नवले, २५ मार्च २०२६ | मॅक्स मंथन विशेष:

पिंपरी : “वाढत्या लोकसंख्येचा विचार करता शहराला शुद्ध, मुबलक आणि शाश्वत पाणीपुरवठा उपलब्ध करून देण्यासाठी महानगरपालिका कटिबद्ध आहे. भामा आसखेड प्रकल्प हा शहराच्या पाण्याचा प्रश्न कायमस्वरूपी सोडवण्यासाठी अत्यंत कळीचा असून, यातील सर्व कामे कोणत्याही विलंबाशिवाय तातडीने पूर्ण करा,” असे स्पष्ट निर्देश महापौर रवि लांडगे यांनी प्रशासनाला दिले आहेत.

महापौर रवि लांडगे आणि नवनियुक्त आयुक्त डॉ. विजय सूर्यवंशी यांनी आज ‘भामा आसखेड धरण पाणीपुरवठा’ योजनेच्या विविध कामांची प्रत्यक्ष घटनास्थळी जाऊन पाहणी केली आणि सविस्तर आढावा घेतला.

पाहणी दौऱ्यादरम्यान महापौरांनी प्रकल्पातील महत्त्वाच्या टप्प्यांची माहिती घेतली:

• अशुद्ध जल उपसा केंद्र (वाकी): येथून दररोज १६७ दशलक्ष लिटर पाणी शहरासाठी उचलले जाणार आहे. या केंद्राच्या कामाची महापौरांनी बारकाईने पाहणी केली.

• जलवाहिनीचे जाळे: वाकी ते तळेगाव (७.३० किमी) आणि चिखली जलशुद्धीकरण केंद्रापर्यंत (१८.८० किमी) टाकण्यात येणाऱ्या मोठ्या व्यासाच्या जलवाहिन्यांच्या कामाचा वेग वाढवण्याच्या सूचना दिल्या.

• ब्रेक प्रेशर टँक (नऊलाख उंब्रे): या टँकच्या उभारणीची तांत्रिक प्रक्रिया पूर्ण झाली असून, प्रत्यक्ष बांधकाम तातडीने सुरू करण्याचे आदेश दिले.

• चिखली जलशुद्धीकरण केंद्र: चिखली येथे उभारण्यात येत असलेल्या २०० दशलक्ष लिटर क्षमतेच्या केंद्राच्या हायड्रॉलिक आणि स्ट्रक्चरल डिझाईनची माहिती आयुक्तांनी घेतली.

आयुक्त डॉ. विजय सूर्यवंशी यांनी पदभार स्वीकारल्यानंतरच्या पहिल्याच मोठ्या प्रकल्प पाहणीत आपला कडक पवित्रा स्पष्ट केला. ते म्हणाले, “शहराचा पाणीपुरवठा हा अत्यंत संवेदनशील विषय आहे. या प्रकल्पाच्या अंमलबजावणीत कोणतीही दिरंगाई सहन केली जाणार नाही. महापौरांच्या सूचनांनुसार दर्जेदार आणि वेळेत काम पूर्ण करणे हे प्रशासनाचे सर्वोच्च प्राधान्य आहे.”

या पाहणी दौऱ्यात उपमहापौर शर्मिला बाबर, स्थायी समिती सभापती अभिषेक बारणे, विरोधी पक्षनेते भाऊसाहेब भोईर, शहर सुधारणा समिती सभापती संजय काटे, नगरसदस्य धर्मपाल तंतरपाळे, कुणाल वाव्हळकर, नवनाथ जगताप यांच्यासह मुख्य अभियंता प्रमोद ओंभासे, सह शहर अभियंता अनिल भालसाखळे, महेश कावळे आणि जनता संपर्क अधिकारी प्रफुल्ल पुराणिक उपस्थित होते.

© २०२६ मॅक्स मंथन डेली न्यूज. सर्व हक्क राखीव।