आंबेडकर जयंतीनिमित्त पिंपरी-चिंचवडमध्ये ट्रॅफिक ॲडव्हायझरी जारी! पाहा कोणते रस्ते राहतील बंद

डॉ. बाबासाहेब आंबेडकर जयंतीनिमित्त पिंपरी-चिंचवडमध्ये वाहतुकीत मोठे बदल; जाणून घ्या पर्यायी मार्ग

पिंपरी चिंचवड प्रतिनिधी बालाजी नवले, ९ एप्रिल २०२६, मॅक्स मंथन डेली न्यूज:

पिंपरी-चिंचवड: भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांच्या जयंतीनिमित्त १४ एप्रिल २०२६ रोजी पिंपरी-चिंचवड शहरात मोठ्या प्रमाणावर मिरवणुका काढण्यात येणार आहेत. विशेषतः पिंपरी आणि दापोडी येथील डॉ. बाबासाहेब आंबेडकर यांच्या पुतळ्यास अभिवादन करण्यासाठी अनुयायांची मोठी गर्दी होणार आहे. या पार्श्वभूमीवर वाहतूक कोंडी टाळण्यासाठी आणि मिरवणुका शांततेत पार पाडण्यासाठी पिंपरी-चिंचवड पोलीस आयुक्तालयाने वाहतुकीत मोठे बदल केले आहेत.

पोलीस उप-आयुक्त (वाहतूक शाखा) विवेक पाटील यांनी मोटार वाहन कायदा कलम ११५, ११६ आणि ११७ अन्वये प्राप्त अधिकारांचा वापर करून हे आदेश निर्गमित केले आहेत. हे बदल १४ एप्रिल २०२६ रोजी दुपारी १२.०० ते रात्री २४.०० वाजेपर्यंत किंवा मिरवणुका संपेपर्यंत लागू राहतील.

देहूरोड, चाकण आणि मोशी परिसरातील बदल

• देहूरोड: शीतलनगर, शिवाजी विद्यालय, जामा मशीद आणि स्वामी चौक परिसर वाहतुकीसाठी बंद राहील. वाहनधारकांनी कॅन्टोन्मेंट हॉस्पिटल – सेंट्रल चौक या अंतर्गत मार्गांचा वापर करावा.

• चाकण: चाकण चौक ते महात्मा फुले चौक आणि नेहरू चौक रस्ता बंद राहील. वाहनधारकांनी माणिक चौक – मेदनकरवाडी किंवा तळेगाव चौक – आंबेठाण चौक मार्गाचा वापर करावा.

• मोशी: नाशिक हायवेवरून छत्रपती शिवाजी महाराज चौक (मोशी) कडे येण्यास बंदी आहे. वाहतूक भारतमाता चौकामार्गे वळवण्यात आली आहे.

• निगडी: भक्ती-शक्ती ओव्हर ब्रिजवरून पिंपरीकडे येणाऱ्या जड वाहनांना बंदी असून, ही वाहतूक अंकुश चौक – त्रिवेणीनगर – केएसबी चौक – भोसरी मार्गे वळवण्यात आली आहे.

सूचना: अत्यावश्यक सेवेतील वाहने (रुग्णवाहिका, अग्निशमन दल इ.) यांना या निर्बंधातून सूट देण्यात आली आहे. नागरिकांनी वाहतूक पोलिसांना सहकार्य करावे आणि पर्यायी मार्गांचा वापर करावा, असे आवाहन पोलीस प्रशासनाकडून करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.