वायसीएम रुग्णालयात रक्ताचा पुरेसा साठा उपलब्ध; एकाही रुग्णाला रक्ताविना परतावे लागणार नाही!
पिंपरी चिंचवड प्रतिनिधी बालाजी नवले, ९ एप्रिल २०२६ मॅक्स मंथन डेली:
पिंपरी: पिंपरी चिंचवड महानगरपालिकेच्या यशवंतराव चव्हाण स्मृती (वायसीएम) रुग्णालयातील रक्तकेंद्रात सध्या विविध रक्तघटकांचा मुबलक साठा उपलब्ध असून, शहरातील एकाही गरजू रुग्णाला रक्ताअभावी परत जावे लागलेले नाही. रुग्णालयात दररोज ६० ते ७० रक्तपिशव्यांचे वितरण सुरळीतपणे सुरू असल्याची माहिती प्रशासनाकडून देण्यात आली आहे.
रुग्णालयाचे अधिष्ठाता डॉ. राजेंद्र वाबळे यांनी दिलेल्या माहितीनुसार, आजमितीला रक्तकेंद्रात एकूण ४५० रक्तघटकांचा साठा उपलब्ध आहे. यामध्ये:
-
लाल रक्तपेशी (RBC): २१५ बॅग्ज
-
प्लाझ्मा: २१३ बॅग्ज
-
प्लेटलेट्स: ४ बॅग्ज
-
क्रायो प्रेसिपिटेट: १५ बॅग्ज
वाढत्या मागणीचा विचार करून रक्तकेंद्राने साठ्याचे चोख नियोजन केले आहे. आगामी काळात शहरात ६ ते ७ रक्तदान शिबिरांचे आयोजन करण्यात येणार असून, त्यातून सुमारे ६०० रक्तपिशव्यांचे संकलन होणे अपेक्षित आहे. याशिवाय, दररोज सरासरी ८ ते १० रक्तदाते स्वतःहून केंद्रात येऊन रक्तदान करत आहेत. आपत्कालीन परिस्थिती हाताळण्यासाठी रक्तकेंद्र पूर्णपणे सज्ज असल्याचेही प्रशासनाने स्पष्ट केले आहे.
“नागरिकांना वेळेवर आणि पुरेसा रक्तपुरवठा करणे ही आमची प्राथमिक जबाबदारी आहे. वायसीएम रुग्णालयातील साठा आणि त्याचे नियोजनबद्ध व्यवस्थापन याकडे आमचे विशेष लक्ष आहे. आगामी शिबिरांमुळे भविष्यातील गरजही पूर्ण होईल. नागरिकांनीही या जीवनदायी कार्यात हिरीरीने सहभाग नोंदवावा.”
— डॉ. विजय सूर्यवंशी, आयुक्त, पिंपरी चिंचवड महानगरपालिका
“रुग्णालयात सर्व आवश्यक रक्तघटकांचा साठा उपलब्ध असून वितरण अखंडित सुरू आहे. आतापर्यंत एकाही रुग्णाला ‘रक्त नाही’ या कारणास्तव परतावे लागलेले नाही, ही आमची मोठी उपलब्धी आहे. संभाव्य मागणी पूर्ण करण्यासाठी आम्ही पूर्णपणे सज्ज आहोत.”
— डॉ. राजेंद्र वाबळे, अधिष्ठाता, वायसीएम रुग्णालय
महानगरपालिकेच्या प्रभावी व्यवस्थापनामुळे शहरातील रक्तपुरवठा यंत्रणा अधिक सक्षम झाली असून, नागरिकांनी नियमित मतदानाप्रमाणेच नियमित रक्तदान करून सामाजिक कर्तव्य पार पाडावे, असे आवाहन करण्यात आले आहे.
© २०२६ मॅक्स मंथन डेली न्यूज. सर्व हक्क राखीव.
