पिंपरी चिंचवडमध्ये खळबळ! रावेत रोडवरील ‘एजे फर्निचर मॉल’वर गोळीबार; बिश्नोई गँगने स्वीकारली जबाबदारी
पिंपरी चिंचवड प्रतिनिधी बालाजी नवले, १७ मे २०२६ मॅक्स मंथन डेली न्यूज:
पिंपरी-चिंचवड: पिंपरी चिंचवड शहरात पुन्हा एकदा गोळीबाराची थरारक घटना घडल्याने व्यापारी वर्ग आणि नागरिकांमध्ये घबराटीचे वातावरण पसरले आहे. रावेत रोडवरील प्रसिद्ध ‘एजे फर्निचर मॉल’वर (AJ Furniture Mall) शुक्रवारी रात्री अज्ञात दुचाकीस्वारांनी अंदाधुंद गोळीबार केला. या घटनेत सुदैवाने कोणीही जखमी झाले नाही, मात्र गोळीबारामुळे मॉलचे साईनबोर्ड आणि काचा फुटून मोठ्या प्रमाणावर नुकसान झाले आहे. या घटनेची माहिती मिळताच पिंपरी चिंचवड पोलीस आणि गुन्हे शाखेच्या वरिष्ठ अधिकाऱ्यांनी तातडीने घटनास्थळी धाव घेतली.
पोलीसांनी दिलेल्या माहितीनुसार, शुक्रवारी रात्री ९:२० वाजण्याच्या सुमारास दुचाकीवरून आलेल्या दोन अज्ञात हल्खोरांनी शोरूमच्या समोरील भागावर (Facade) ५ ते ६ राऊंड गोळीबार केला आणि तिथून पळ काढला. या घटनेनंतर फॉरेन्सिक तज्ज्ञ आणि गुन्हे शाखेच्या पथकाने घटनास्थळावरून पुराव्यांचे संकलन केले आहे. आरोपींच्या शोधासाठी पोलीसांनी विविध पथके तैनात केली असून परिसरातील सीसीटीव्ही (CCTV) फुटेज तपासण्याचे काम युद्धपातळीवर सुरू आहे.
या गोळीबारानंतर कथित लॉरेन्स बिश्नोई गँगचा सदस्य शुभम लोणकर याने सोशल मीडियावर एक पोस्ट शेअर करून या हल्ल्याची जबाबदारी स्वीकारली आहे. या पोस्टमध्ये हा गोळीबार म्हणजे केवळ एक “ट्रेलर” असल्याचे म्हटले असून मॉलचे मालक अशोक नैन बिश्नोई यांना थेट धमकी देण्यात आली आहे. तसेच अशोक बिश्नोई हे ‘एमडी ड्रग’ (MD Drug) रॅकेटमध्ये सामील असल्याचा गंभीर आरोपही या गँगने पोस्टमध्ये केला आहे. यासोबतच गँगस्टर आरजू बिश्नोई याच्याशी संबंधित एक ऑडिओ क्लिपही सोशल मीडियावर व्हायरल झाली असून पोलीस या दोन्ही गोष्टींची सत्यता पडताळत आहेत.
या संदर्भात माहिती देताना पोलीस उपायुक्त (गुन्हे) शिवाजी पवार यांनी सांगितले की, “या गँगने ७ मे रोजी मॉलचे भागीदार अशोक यांना फोन करून २ कोटी रुपयांची खंडणी मागितली होती. वारंवार येणाऱ्या धमक्यांच्या फोनमुळे अशोक यांनी तो नंबर ब्लॉक केला होता.”
तर पोलीस उपायुक्त गणेश इंगळे यांनी सांगितले की, “एजे फर्निचर मॉल हा जगदीश बिश्नोई आणि अशोक नैन बिश्नोई या भागीदारांद्वारे चालवला जातो. जगदीश हे पिंपरी चिंचवडमधील व्यवसाय सांभाळतात, तर अशोक हे राजस्थानमधून व्यवसायाला पाठबळ देतात.”
तपास अधिकाऱ्यांनी आतापर्यंत गोळीबार करून पळून गेलेल्या संशयितांच्या दुचाकीचा सुमारे ३ ते ४ किलोमीटरपर्यंतचा मार्ग शोधून काढला आहे. याप्रकरणी भोसरी/रावेत पोलीस ठाण्यात भारतीय न्याय संहिता (BNS) आणि आर्म्स ॲक्टच्या संबंधित कलमांनुसार गुन्हा दाखल करण्यात आला असून पुढील तपास सुरू आहे.
© २०२६ मॅक्स मंथन डेली न्यूज. सर्व हक्क राखीव.
