“दोन थेंब आयुष्याचे, पोलिओमुक्तीचे!” २८ जून रोजी पिंपरी-चिंचवडमध्ये राष्ट्रीय पल्स पोलिओ मोहीम; १,१२३ केंद्रांवर ५ वर्षांखालील बालकांना लस देण्याचे मनपाचे आवाहन

पिंपरी चिंचवड प्रतिनिधी बालाजी नवले , २४ जून २०२६ मॅक्स मंथन डेली न्यूज:

पिंपरी: पिंपरी-चिंचवड शहरातील भावी पिढीचे आरोग्य सुदृढ राखण्यासाठी आणि देशाला पोलिओमुक्त ठेवण्याच्या राष्ट्रीय संकल्पाला बळ देण्यासाठी महानगरपालिका सज्ज झाली आहे. जागतिक आरोग्य संघटनेच्या (WHO) निर्देशानुसार, पिंपरी-चिंचवड महानगरपालिकेच्या वैद्यकीय व आरोग्य विभागामार्फत येत्या रविवार, २८ जून २०२६ रोजी संपूर्ण शहरात “राष्ट्रीय पल्स पोलिओ लसीकरण मोहीम” अत्यंत व्यापक पातळीवर राबविण्यात येणार आहे. शहरातील ० ते ५ वर्षे वयोगटातील प्रत्येक बालकापर्यंत पोलिओ लसीकरणाचे दोन थेंब पोहोचविण्यासाठी प्रशासनाने सूक्ष्म नियोजन केले आहे, अशी माहिती महापौर श्री. रवि लांडगे यांनी दिली.

या विशेष मोहिमेअंतर्गत २८ जून रोजी सकाळी ८:०० ते सायंकाळी ५:०० वाजेपर्यंत शहरातील विविध बुथवर बालकांना पोलिओचे दोन थेंब पाजले जातील. त्यानंतर जे बालक काही कारणास्तव २८ जून रोजी लसीकरणापासून वंचित राहतील, अशा बालकांसाठी २९ जून ते ३ जुलै २०२६ या पाच दिवसांच्या कालावधीत आरोग्य पथकामार्फत ‘घर-घर दस्तक’ मोहीम राबवून लसीकरण पूर्ण केले जाईल.

शहरातील कोणताही परिसर किंवा स्थलांतरित कुटुंब लसीकरणापासून सुटू नये, यासाठी महानगरपालिकेने शहरातील विविध भागात १,१२३ केंद्रांची (बूथ) स्थापना केली आहे. यामध्ये संवेदनशील रचना करण्यात आली आहे.

• स्थायी केंद्रे (१०२८ केंद्रे): महापालिकेचे सर्व दवाखाने, प्राथमिक आरोग्य केंद्रे, मोठी खाजगी व सरकारी रुग्णालये आणि अंगणवाडी केंद्रांमध्ये १,००८ स्थायी केंद्रे कार्यरत राहतील.
• ट्रान्झिट केंद्रे (३५ केंद्रे): शहरातील महत्त्वाचे बस थांबे, रेल्वे स्थानके, मुख्य चौक आणि नवविकसित मेट्रो स्थानकांवर ३५ ट्रान्झिट केंद्रे उभारण्यात आली आहेत, जेणेकरून प्रवासात असणाऱ्या बालकांनाही लस देता येईल.
• फिरती केंद्रे (७७ केंद्रे): बांधकाम साईट्स, वीटभट्ट्या, दगडखाणी आणि स्थलांतरित नागरिकांच्या वस्त्यांमध्ये ७७ फिरती लसीकरण पथके (Mobile Teams) थेट जागेवर जाऊन बालकांना डोस देतील.
• नाईट टीम्स (३ पथके): रात्रीच्या वेळेस स्थलांतरित होणाऱ्या किंवा कामावरून परतणाऱ्या कुटुंबातील बालकांपर्यंत पोहोचण्यासाठी विशेष ३ रात्रीच्या चमू कार्यरत असतील.

या विराट आरोग्य यज्ञाला यशस्वी करण्यासाठी पिंपरी-चिंचवड मनपाने सुमारे ५,००० आरोग्य सेवक आणि डॉक्टरांचा ताफा मैदानात उतरवला आहे. यामध्ये ८ विभागीय प्रभारी वैद्यकीय अधिकारी, ९५ वैद्यकीय अधिकारी, ३१९ पर्यवेक्षक आणि ४,५५२ प्रशिक्षित लसीकरण कर्मचाऱ्यांची अधिकृत नियुक्ती करण्यात आली आहे.

या मोहिमेत महापालिकेच्या कर्मचाऱ्यांसह एएनएम, एमपीडब्ल्यू, आशा स्वयंसेविका, अंगणवाडी सेविका व मदतनीस, शहरातील विविध महाविद्यालयांतील विद्यार्थी स्वयंसेवक, महिला आरोग्य समिती सदस्य, रोटरी क्लबचे प्रतिनिधी आणि विविध सामाजिक संस्थांचे स्वयंसेवक खांद्याला खांदा लावून काम करणार आहेत.

शहरात या मोहिमेची माहिती पोहोचवण्यासाठी पत्रके, बॅनर्स, स्टीकर्स, भिंतीवरील चित्रे (वॉल पेंटिंग), शहरातील व्हीएमडी (VMD) डिस्प्ले आणि रिक्षांद्वारे ध्वनीक्षेपकावरून सातत्याने व्यापक जनजागृती केली जात आहे.

या महत्त्वपूर्ण मोहिमेबाबत नागरिकांना आणि पालकांना सतर्क राहण्याचे आवाहन करताना पिंपरी-चिंचवड महानगरपालिकेचे आयुक्त डॉ. विजय सूर्यवंशी म्हणाले:

“भारताने अत्यंत कठोर परिश्रमानंतर पोलिओवर पूर्णपणे विजय मिळवला आहे. मात्र, हा पोलिओमुक्त देशाचा दर्जा कायम राखण्यासाठी आपल्याला दरवर्षी ही प्रतिबंधात्मक मोहीम अत्यंत गांभीर्याने राबवावी लागते. शहरातील प्रत्येक सुजाण पालकाने आपल्या ० ते ५ वर्षे वयोगटातील बालकाला रविवार, २८ जून रोजी जवळील पोलिओ केंद्रावर नेऊन पोलिओ प्रतिबंधक लसीचे दोन थेंब नक्की पाजावेत. आपला सक्रिय सहभागच शहराला आणि देशाला पोलिओच्या धोक्यापासून कायमचे सुरक्षित ठेवेल.”

पालकांच्या मनातील गैरसमज दूर करताना महानगरपालिकेचे मुख्य आरोग्य व वैद्यकीय अधिकारी डॉ. लक्ष्मण गोफणे यांनी स्पष्ट केले की:

“अनेकदा मुले किरकोळ आजारी असतील किंवा नुकतीच जन्माला आलेली असतील, तर पालक त्यांना लस देण्यास टाळतात. परंतु, किरकोळ आजारी असलेल्या तसेच अगदी नवजात बालकांनाही ही पोलिओ लस देणे पूर्णपणे सुरक्षित आहे. यापूर्वी बालकाचे नियमित पोलिओ लसीकरण पूर्ण झालेले असले, तरीही राष्ट्रीय पल्स पोलिओ मोहिमेतील हे अतिरिक्त दोन थेंब पाजणे अत्यंत आवश्यक आहे. आपल्या परिसरात किंवा परिचयात एकही बालक या जीवनदायी लसीपासून वंचित राहणार नाही, याची काळजी प्रत्येकाने घ्यावी.”

© २०२६ मॅक्स मंथन डेली न्यूज. सर्व हक्क राखीव.