कॅनडा: कॅनडातील एडमॉन्टन शहरात असलेल्या नानकसर सिख गुरुद्वारात एका २७ वर्षीय माथेफिरू तरुणाने स्क्रू ड्रायव्हरने वार करून ५१ वर्षीय मुख्य पुजारी आणि ७५ वर्षीय ज्येष्ठ स्वयंसेवकाला गंभीर जखमी केल्याची धक्कादायक घटना घडली आहे. पहाटेच्या सुमारास घडलेल्या या घटनेने संपूर्ण शीख समाजात संतापाची लाट पसरली आहे.

शुक्रवारी पहाटे सुमारे ५ वाजण्याच्या सुमारास संशयित आरोपीने ईशान्य एडमॉन्टनमधील नानकसर गुरुद्वारात घुसखोरी केली. त्याने प्रार्थना गृहाच्या दिशेने जाण्याचा प्रयत्न केला असता तेथील कर्मचाऱ्यांनी व स्वयंसेवकांनी त्याला रोखण्याचा प्रयत्न केला. यावरून झालेल्या वादात संशयिताने खिशातील स्क्रू ड्रायव्हर काढून तेथील ५१ वर्षीय पुजारी आणि ७५ वर्षीय वृद्धावर सपासप वार केले.

प्रसंगावधान राखून तेथे उपस्थित असलेल्या प्रत्यक्षदर्शींनी आरोपीला पकडून ठेवले आणि तात्काळ पोलिसांच्या स्वाधीन केले. जखमींना त्वरित रुग्णालयात दाखल करण्यात आले असून त्यांची प्रकृती स्थिर असल्याचे सांगण्यात आले आहे. या घटनेत गुरुग्रंथ साहिब किंवा कोणत्याही धार्मिक ग्रंथाची हानी झालेली नाही.

एडमॉन्टन पोलीस सर्व्हिसने (EPS) दिलेल्या माहितीनुसार, आरोपी हा सराईत गुन्हेगार असून २०१५ सालापासून त्याच्यावर अनेक हिंसक गुन्ह्यांची नोंद आहे. विशेष म्हणजे, घटनेच्या आदल्या दिवशीच त्याची अल्बर्टातील केंद्रीय तुरुंगातून सुटका झाली होती. मात्र, त्याने ठरवून दिलेल्या पुनर्वसन केंद्रात (Halfway House) हजेरी न लावता गुरुद्वारात जाऊन हा हल्ला केला. हा हल्ला द्वेषयुक्त गुन्ह्यांतर्गत (Hate Crime) येतो का, याचा तपास पोलीस करत आहेत.

कॅनडाचे पंतप्रधान मार्क कार्नी यांनी या हल्ल्याचा तीव्र शब्दांत निषेध केला आहे. “कुणालाही आपल्या प्रार्थनास्थळी असुरक्षित वाटता कामा नये. या कठीण प्रसंगी माझी सहानुभूती जखमी आणि शीख समुदायासोबत आहे,” असे त्यांनी म्हटले आहे.

तर अल्बर्टाच्या मुख्यमंत्री डॅनिएल स्मिथ यांनी या घटनेचा निषेध करत, पॅरोल आणि जामीन कायद्यांत कडक सुधारणा करण्याची मागणी केंद्र सरकारकडे केली आहे.

कॅनडातील वर्ल्ड शीख ऑर्गनायझेशनने देशभरातील सर्व गुरुद्वारांना आपली सुरक्षा व्यवस्था मजबूत करण्याचे आणि सतर्क राहण्याचे आवाहन केले आहे.