श्रीहरिकोटा : भारतीय अंतराळ संशोधन संस्थेने (ISRO) देशातील पहिल्या जिओ-ऑर्बिट इमेजिंग सॅटेलाइट ‘EOS-05’ चे ‘GSLV-F17’ रॉकेटद्वारे यशस्वी प्रक्षेपण करून अंतराळ क्षेत्रात आणखी एक नवा इतिहास रचला आहे. या उत्कृष्ट कामगिरीबद्दल काँग्रेस पक्षाने इस्रोचे कौतुक केले आहे. त्याच वेळी, मोदी सरकार इस्रोची भूमिका बदलून संस्थेचे स्वरूप बदलण्याचा आणि अंतराळ क्षेत्राचे आक्रमक खाजगीकरण करण्याचा प्रयत्न करत असल्याचा गंभीर आरोप काँग्रेसने केला आहे.

श्रीहरिकोटा येथील अंतराळ केंद्रावरून २,३६७ किलोग्रॅम वजनाचा हा अत्याधुनिक उपग्रह यशस्वीरीत्या त्याच्या निर्धारित कक्षेत स्थापित करण्यात आला. वर्ष २०२६ मधील इस्रोचे हे पहिलेच मोठे यशस्वी प्रक्षेपण ठरले आहे.

काँग्रेस अध्यक्ष मल्लिकार्जुन खर्गे यांनी ‘एक्स’ (ट्विटर) वर पोस्ट करत इस्रोच्या संपूर्ण टीमचे अभिनंदन केले. “GSLV-F17/EOS-05 मिशनच्या यशस्वी प्रक्षेपणाबद्दल इस्रोच्या सर्व शास्त्रज्ञांचे, अभियंत्यांचे आणि संशोधकांचे मनःपूर्वक अभिनंदन! EOS-05 या भारताच्या पहिल्या जिओ-ऑर्बिट इमेजिंग उपग्रहामुळे आपल्या पृथ्वी निरीक्षण (Earth Observation) क्षमतेला अधिक बळ मिळेल. भारताच्या आधुनिक निर्मात्यांनी अंतराळ कार्यक्रमाची भक्कम पायाभरणी केली होती, ज्यावर आपल्या शास्त्रज्ञांनी सातत्याने नवे यश संपादन केले आहे,” असे खर्गे म्हणाले.

काँग्रेस सरचिटणीस प्रियंका गांधी वाड्रा यांनीही इस्रोच्या कामगिरीचे कौतुक करत हा प्रत्येक भारतीयासाठी अभिमानाचा क्षण असल्याचे म्हटले आहे.

काँग्रेसचे सरचिटणीस जयराम रमेश यांनी इस्रोच्या या यशाचे स्वागत करतानाच केंद्र सरकारच्या धोरणांवर कडाडून टीका केली. “ही एक ऐतिहासिक कामगिरी असून यामुळे देशाच्या धोरणात्मक आणि संरक्षण क्षमतेत मोठी भर पडणार आहे. गेल्या काही काळापासून विविध स्तरांतून टीका होत असताना या यशामुळे इस्रोच्या टीमचा आत्मविश्वास नक्कीच वाढेल,” असे त्यांनी नमूद केले.

पंतप्रधान कार्यालयाकडून (PMO) इस्रोच्या मूळ रचनेत आणि भूमिकेत केले जाणाऱ्या बदलांवर ताशेरे ओढत जयराम रमेश म्हणाले, “गेल्या सहा दशकांत विक्रम साराभाई, सतीश धवन, ब्रह्म प्रकाश, यू. आर. राव आणि एपीजे अब्दुल कलाम यांसारख्या महान शास्त्रज्ञांनी अथक परिश्रमाने उभी केलेली ही संस्था आज खाजगीकरणाच्या धोरणामुळे संकटात सापडली आहे. मोदी सरकार इस्रोचे पद्धतशीरपणे खच्चीकरण करत आहे.”

EOS-05 या उपग्रहाच्या यशस्वी प्रक्षेपणामुळे भारताला हवामान अंदाज, आपत्ती व्यवस्थापन, कृषी क्षेत्र आणि सीमा सुरक्षेच्या दृष्टीने अत्यंत अचूक अन् रिअल-टाईम प्रतिमा मिळवणे अधिक सुलभ होणार आहे. इस्रोच्या या ऐतिहासिक यशामुळे जगभरातून भारताच्या अंतराळ तंत्रज्ञानाचे कौतुक होत आहे.