पिंपरी-चिंचवड महानगरपालिकेच्या सर्वसाधारण सभेत भारतीय जनता पक्षाच्या ज्येष्ठ नगरसेविका व माजी उपमहापौर शैलजा मोरे यांनी शहरातील स्मशानभूमींच्या दुरवस्थेवरून तीव्र संताप व्यक्त करत ठेकेदाराला “जिवंत जाळून टाकीन” असा वादग्रस्त इशारा दिला आहे. या वक्तव्यामुळे पिंपरी-चिंचवडच्या राजकीय वर्तुळात मोठे वादळ उठले असून, विरोधकांबरोबरच सत्ताधारी भाजपच्या नेत्यांनीही या भाषेबद्दल तीव्र नाराजी व्यक्त केली आहे.

महानगरपालिकेच्या सर्वसाधारण सभेत बोलताना निगडी आणि परिसरातील स्मशानभूमींच्या अस्वच्छता व अपुऱ्या सुविधांवर शैलजा मोरे यांनी प्रशासनाला धारेवर धरले. त्या म्हणाल्या, “निगडी येथील विद्युत दाहिनी आणि स्मशानभूमीची अवस्था अत्यंत बिकट झाली आहे. पाणी, वीज आणि कर्मचाऱ्यांची प्रचंड कमतरता आहे. १० कर्मचाऱ्यांची आवश्यकता असताना ठेकेदार केवळ २ कर्मचारी पुरवतो. स्मशानभूमीत सर्वत्र चिखल साचला आहे. या संदर्भात मी पाच महिन्यांपूर्वी महापौर आणि आयुक्तांना पत्र दिले होते, तरीही कोणतीही कारवाई झाली नाही.”

आपला संताप व्यक्त करताना त्या पुढे म्हणाल्या, “मला त्या ठेकेदाराचे नाव द्या, मी त्याला जिवंत जाळून टाकीन!” या वक्तव्यानंतर महासभेत एकच खळबळ उडाली.

या विधानाबाबत वृत्तपत्रांनी शैलजा मोरे यांच्याशी संपर्क साधला असता, त्यांचे पुत्र अनूप मोरे यांनी प्रतिक्रिया दिली. “माझ्या आईने शहरातील स्मशानभूमींच्या दुरवस्थेबाबत नागरिकांचा राग व्यक्त केला. मात्र, भावनांच्या भरात बोलताना त्यांच्याकडून चुकीचे शब्द वापरले गेले,” असे स्पष्टीकरण त्यांनी दिले.

स्मशानभूमीतील समस्यांवरून सुरू झालेल्या या राजकीय नाट्यामुळे पालिका वर्तुळात लोकप्रतिनिधींच्या भाषेच्या मर्यादेवर मोठी चर्चा सुरू झाली आहे.