पिंपरी-चिंचवड: शहराची जीवनवाहिनी असलेल्या पवना धरणाने १०० टक्के पाणीसाठा गाठल्याने पिंपरी-चिंचवड महानगरपालिकेच्या वतीने अत्यंत भक्तिभावाने व पारंपरिक पद्धतीने भव्य जलपूजन सोहळा पार पडला. शहराचे प्रथम नागरिक तथा महापौर रवी लांडगे यांच्या शुभहस्ते पवना धरणावर जलपूजन करून जलदेवतेप्रती कृतज्ञता व्यक्त करण्यात आली. या वेळी शहराला वर्षभर पुरेसा, नियमित आणि सुरळीत पाणीपुरवठा व्हावा, यासाठी विशेष प्रार्थना करण्यात आली.

पिंपरी-चिंचवड शहराचा झपाट्याने होणारा विस्तार आणि वाढती लोकसंख्या लक्षात घेता, पाणी व्यवस्थापनाचा प्रश्न नेहमीच अत्यंत संवेदनशील राहिला आहे. मात्र, महापौरपदाची सूत्रे स्वीकारल्यापासून महापौर रवी लांडगे यांनी शहराच्या मूलभूत गरजांना सर्वोच्च प्राधान्य देत पाणीपुरवठा अधिक सक्षम व नियोजनबद्ध करण्यावर भर दिला आहे. त्यांच्या या लोकभिमुख आणि दूरदृष्टीपूर्ण कार्यपद्धतीमुळे शहराच्या जलसुरक्षा आणि पायाभूत सुविधांच्या विकासाला मोठी गती मिळाली आहे. केवळ प्रशासकीय निर्णय न घेता, थेट धरण परिसरात जाऊन पाण्याचे नियोजन करणे, अधिकाऱ्यांना स्पष्ट सूचना देणे आणि नागरिकांच्या हिताला प्राधान्य देणे, या त्यांच्या कार्यशैलीमुळे पिंपरी-चिंचवडकरांमध्ये महापौरांच्या नेतृत्वाविषयी मोठा विश्वास निर्माण झाला आहे.

जलपूजनाच्या प्रसंगी उपस्थितांना संबोधित करताना महापौर रवी लांडगे यांनी शहराच्या भविष्यातील जलसुरक्षेचा रोडमॅप स्पष्ट केला. ते म्हणाले, “पवना धरण पूर्ण क्षमतेने भरल्यामुळे पिंपरी-चिंचवडकरांचा वर्षभराचा पाण्याचा प्रश्न मिटला असला, तरी पाणी ही अमूल्य नैसर्गिक संपत्ती आहे. शहराच्या भविष्यासाठी पाण्याचा काटकसरीने वापर करणे आणि उपलब्ध जलसाठ्याचे योग्य नियोजन करणे ही आपल्या सर्वांची सामूहिक जबाबदारी आहे. महापालिका प्रशासन पाणी पुरवठ्याचे सक्षम नियोजन करत असून, नागरिकांनीही पाणी बचतीची सवय अंगीकारावी.”

पर्यावरणपूरक पद्धतीने पार पडलेल्या या कार्यक्रमात नदीपात्राची स्वच्छता, जलप्रदूषण रोखणे आणि पवना नदीकाठाच्या संरक्षणासाठी महापालिका कटिबद्ध असल्याचे महापौरांनी आवर्जून नमूद केले.

या भव्य जलपूजन सोहळ्यास उपमहापौर शर्मिला बाबर, विरोधी पक्षनेते भाऊसाहेब भोईर, महापालिकेच्या पाणीपुरवठा विभागाचे सह शहर अभियंता अजय सूर्यवंशी, कार्यकारी अभियंता महेश बरीदे, जलसंपदा विभागाचे रजनीश भारिया यांच्यासह पिंपरी-चिंचवड शहर व परिसरातील पत्रकार, महापालिकेचे विविध अधिकारी आणि कर्मचारी मोठ्या संख्येने उपस्थित होते.

शहरातील प्रत्येक नागरिकाला पुरेसे आणि स्वच्छ पाणी मिळावे यासाठी पाणीपुरवठा सुधारणा योजना, जलवाहिन्यांची दुरुस्ती आणि भविष्यातील पाण्याचे स्रोत शोधण्यासाठी महापौर लांडगे सातत्याने प्रयत्नशील आहेत. पवना धरणावरील जलपूजनाच्या माध्यमातून त्यांनी ‘पाणी वाचवा, जलस्रोत जपा आणि भावी पिढ्यांसाठी जलसुरक्षित शहर घडवा’ असा सामाजिक संदेश देत आपल्या धोरणी व जनहितकारी नेतृत्वाची पुन्हा एकदा प्रचिती दिली आहे.