पीएमपीएमएलचा मोठा निर्णय: ६० वर्षांवरील ज्येष्ठ नागरिकांना बस पासमध्ये ५०% सवलत; अपघातातील मृतांच्या वारसांना ३ लाखांची मदत

पुणे/पिंपरी प्रतिनिधी लक्ष्मण प्रधान , दि. २४ ऑगस्ट २०२६ मॅक्स मंथन डेली न्यूज:

“ज्येष्ठ नागरिकांना बस पासमध्ये ५० टक्के सवलत देण्याचा आणि अपघातग्रस्तांना ३ लाखांपर्यंत आर्थिक मदत देण्याचा निर्णय अत्यंत स्वागतार्ह आहे. यामुळे प्रवाशांना ठोस सुरक्षाकवच मिळेल. पिंपरी-चिंचवड आणि पुण्यातील नागरिकांना सुरक्षित, वेळेवर आणि सुलभ वाहतूक सेवा मिळावी यासाठी महामंडळाची कार्यक्षमता वाढवण्यावर आमचा भर राहील.”

— रवि लांडगे (महापौर, पिंपरी-चिंचवड महानगरपालिका)

“शहराचा वेगाने होणारा विस्तार लक्षात घेता उपलब्ध बस ताफ्याचा प्रभावी वापर, मेट्रो फीडर सेवेचे जाळे आणि बस ब्रेकडाऊनचे प्रमाण कमी करणे गरजेचे आहे. प्रवासीहिताचे हे सर्व निर्णय धरातलावर प्रभावीपणे राबवले जावेत यासाठी आम्ही सातत्याने पाठपुरावा करू.”

— अभिषेक बारणे (सभापती, स्थायी समिती, पिंपरी-चिंचवड मनपा)

राहुल गांधींचा पुण्यात ‘मनुस्मृती’च्या मानसिकतेवर जोरदार हल्ला; तर भाजपकडून निधीच्या स्रोतावरून ५ गंभीर प्रश्न!

पुणे/पिंपरी प्रतिनिधी बालाजी नवले, दि. २३ ऑगस्ट २०२६ मॅक्स मंथन डेली न्यूज:

“मोठी स्वप्ने पाहा, न्यायाधीश व्हा आणि समाजासाठी जगा”; जिल्हा सत्र न्यायाधीश अरविंद वानखेडे यांनी उलगडला बालगृहातील मुलींसमोर जीवनप्रवास!

पुणे/पिंपरी, प्रतिनिधी बालाजी नवले दि. ३१ जुलै २०२६ मॅक्स मंथन डेली न्यूज:

पुणे: “मुलींनो, मी माझेच उदाहरण तुम्हाला देतो… मी आठवी-नवीत शिकत असताना आमच्या शेतात जाण्याचा रस्ता बसस्थानकावरून जात असे. तिथून लाल दिव्याची एक गाडी जाताना दिसायची. ती कलेक्टरची गाडी असल्याचे बाबांनी सांगितले आणि त्याच क्षणी माझ्या मनात कलेक्टर होण्याचे स्वप्न निर्माण झाले. दुर्दैवाने कलेक्टर-आयएएस अधिकारी होण्याचे स्वप्न पूर्ण झाले नाही, पण जिद्द सोडली नाही. त्याच चिकाटीमुळे आज मला जिल्हा सत्र न्यायाधीश या सर्वोच्च सांविधानिक पदावर सेवा करण्याची संधी मिळाली. त्यामुळे परिस्थिती कितीही कठीण असली तरी हार मानू नका,” अशा अत्यंत भावनिक आणि प्रेरणादायी शब्दांत पुणे जिल्ह्याचे प्रमुख जिल्हा व सत्र न्यायाधीश न्या. अरविंद वानखेडे यांनी बालगृहातील विद्यार्थिनींसमोर आपल्या आयुष्याचा प्रवास उलगडला.

पद्मश्री डॉ. सिंधुताई सपकाळ यांच्या कुंभारवळण येथील ‘ममता बाल सदन’ (बालगृह) येथे आयोजित “गुणवंत विद्यार्थी सत्कार सोहळ्यात” ते मुख्य अतिथी म्हणून बोलत होते. बुलढाणा जिल्ह्यातील एका छोट्या खेड्यातून सुरू झालेला त्यांचा हा जीवनप्रवास ऐकून उपस्थित विद्यार्थी, शिक्षक आणि मान्यवर भारावून गेले.

या सोहळ्यात शिक्षणात उल्लेखनीय यश संपादन करणाऱ्या गुणवंत विद्यार्थ्यांचा न्या. अरविंद वानखेडे यांच्या हस्ते प्रमाणपत्र देऊन सत्कार करण्यात आला. बालगृहातील मुलींशी आपुलकीने संवाद साधताना त्यांनी सांगितले, “तुमच्यापैकी अनेक मुली उद्या न्यायाधीश, प्रशासकीय अधिकारी, डॉक्टर किंवा समाजसेविका होऊ शकतात. स्वतःवर विश्वास ठेवा आणि शिक्षणाला कधीही सोडू नका. ‘मोठी स्वप्ने पाहा, न्यायाधीश व्हा आणि समाजासाठी जगा’.” तसेच जिल्हा विधी सेवा प्राधिकरणाच्या माध्यमातून विविध जनजागृती उपक्रम राबवले जात असून, माईंच्या (सिंधुताई सपकाळ) संस्थेला भविष्यातही सर्वतोपरी सहकार्य राहील, अशी ग्वाही त्यांनी दिली.

पुणे जिल्हा विधी सेवा प्राधिकरणाच्या सचिव मा. रेवती देशपांडे यांनी विद्यार्थ्यांना मार्गदर्शन करताना सांगितले, “अपयश हीच यशाची पहिली पायरी आहे. माईंच्या विचारांचा आणि संस्कारांचा अमूल्य ठेवा तुमच्याकडे आहे. सकारात्मक दृष्टिकोन आणि सातत्यपूर्ण प्रयत्न तुम्हाला निश्चितच यश मिळवून देतील.” कार्यक्रमाच्या अध्यक्षस्थानी पद्मश्री डॉ. सिंधुताई सपकाळ यांचे पहिले मानसपुत्र तथा ममता बाल सदनचे अध्यक्ष दीपक (दादा) गायकवाड होते. यावेळी सासवडचे दिवाणी न्यायाधीश टी. पी. मोटे, द्वितीय सह न्यायाधीश आर. ए. सावंत, सह न्यायाधीश एस. जी. सावंत, ममताताई सपकाळ, विनय सपकाळ, अनिल कुडीया आदी मान्यवर उपस्थित होते.

अनाथ, निराधार आणि निराश्रित मुलांकडे आधार कार्ड, जन्मदाखला किंवा जातीचा दाखला नसल्याने त्यांना शिक्षणापासून वंचित राहावे लागते, असा गंभीर प्रश्न अध्यक्ष दीपक गायकवाड यांनी मांडला. याची तातडीने दखल घेत, प्रमुख जिल्हा सत्र न्यायाधीश न्या. अरविंद वानखेडे यांनी संबंधित यंत्रणांची बैठक घेऊन पुणे जिल्हा विधी सेवा प्राधिकरणामार्फत हे सर्व दाखले मिळवून देण्यासाठी ठोस उपाययोजना करण्याची ग्वाही दिली. या निर्णयामुळे अनाथ मुलांच्या शिक्षणाचा मार्ग सुकर होणार आहे.

© २०२६ मॅक्स मंथन डेली न्यूज. सर्व हक्क राखीव.

“संत रोहिदास महाराज हे स्वातंत्र्य, समता व श्रमप्रतिष्ठेचे चिरंतन दीपस्तंभ” — रवींद्र किरकोळे

पुणे/पिंपरी, प्रतिनिधी लक्ष्मण प्रधान  दि. ३० जुलै २०२६ मॅक्स मंथन डेली न्यूज:

पुणे: “संतश्रेष्ठ रोहिदास महाराजांनी तत्कालीन विषम सामाजिक व्यवस्थेतील वेदनांना निराशेचे रूप न देता त्या आपल्या वाणीचे, विचारांचे आणि भक्तीचे सामर्थ्य बनविले. त्यांच्या शब्दांतून केवळ एका संताचे जीवन व्यक्त होत नाही, तर शोषित, वंचित आणि श्रमजीवी समाजाच्या वेदनांना आवाज मिळतो. त्यांनी श्रमाला ईश्वरपूजेचे स्थान दिले आणि ‘कष्ट हेच खरे वैभव’ हा जीवनमंत्र जगासमोर ठेवला. त्यामुळे संत रोहिदास महाराज हे श्रमप्रतिष्ठेचे चिरंतन प्रतीक ठरले,” असे प्रभावी प्रतिपादन अखिल भारतीय समरसता गतिविधीचे सहसंयोजक रवींद्र किरकोळे यांनी केले.

श्री महागणेश अधिष्ठान विश्वस्त न्यास, पुणे (महाराष्ट्र) यांच्या वतीने संत शिरोमणी सद्गुरू श्री रोहिदास महाराज यांच्या ६५० व्या जन्मोत्सवानिमित्त आयोजित कीर्तन–प्रवचन–व्याख्यान महोत्सव आणि ‘६५१ पुष्प समर्पण अभियान’ संकल्प समारंभात अध्यक्षस्थानावरून ते बोलत होते. न्यू इंग्लिश स्कूलच्या गणेश हॉलमध्ये हा सोहळा अत्यंत उत्साहपूर्ण वातावरणात पार पडला.

रवींद्र किरकोळे पुढे म्हणाले, “संत रोहिदास महाराजांच्या दृष्टीने माणसाचे मोठेपण जन्मावर किंवा जातिव्यवस्थेवर नव्हे, तर कर्म, चारित्र्य आणि अंतःकरणाच्या निर्मळतेवर अवलंबून होते. त्यांनी भक्तीला समता, मानवता आणि आत्मसन्मानाची दिशा दिली. पारतंत्र्य आणि अन्यायाविरुद्ध स्वातंत्र्याचा पहिला निर्भय स्वर त्यांच्या वाणीतून उमटला. ‘जो पारतंत्र्यात राहतो, तो उपवासालाच पात्र ठरतो’ या विचारामधून त्यांनी मानवी प्रतिष्ठेचे महत्त्व अधोरेखित केले.”

कार्यक्रमाची सुरुवात ह.भ.प. मोरेश्वर जोशी यांच्या भावस्पर्शी कीर्तनाने झाली. समरसता गतिविधीचे महाराष्ट्र-गोवा क्षेत्र सदस्य निलेश गद्रे यांनी प्रास्ताविक केले, तर ॲड. आनंद गवळी यांनी संत रोहिदासांच्या विचारांचे समकालीन संदर्भांसह विशेष मार्गदर्शन केले.

या सोहळ्याच्या व्यासपीठावर ॲड. आनंद गवळी, ह.भ.प. मोरेश्वर जोशी आणि मुकुंद आफळे उपस्थित होते. तसेच विलास लांडगे, रवी ननावरे, गीतेश जोशी, डॉ. प्रसाद खंडागळे, आबा देशपांडे, अनिल भस्मे, गोरख शिंदे, विलास लांडगे, दत्ता वाळवेकर, राजेश मठपती, शरद शिंदे, ॲड. मुकुंद यदमळ, डॉ. माणिक सोनावणे, धनंजय खुडे, शुभांगी पोटभरे, प्रमोद पोटभरे, स्मिता देशपांडे, विलास देशपांडे, विकास माने, सुरेश महाले, प्रतिभा कुलकर्णी, ॲड. एकनाथ जावीर या सर्व मान्यवरांनी उपस्थिती दर्शविली.

या प्रसंगी संत रोहिदास महाराजांवरील माहितीपूर्ण पुस्तिकेचे प्रकाशन करण्यात आले. तसेच कार्यकारी मंडळ, कीर्तनकार आणि चरणसेवकांचा विशेष सन्मान करण्यात आला. कार्यक्रमाचे सूत्रसंचालन डॉ. धनंजय भिसे यांनी केले, तर आभार मुकुंद आफळे यांनी मानले.

भारतभरात संत रोहिदास महाराज यांच्या जीवन व कार्यावर कीर्तन, प्रवचन व व्याख्यानांच्या माध्यमातून ६५१ कार्यक्रमांचा संकल्प सोडण्यात आला आहे. या माध्यमातून समता, श्रमप्रतिष्ठा, बंधुता, स्वातंत्र्य आणि मानवतेचा संदेश समाजाच्या तळागाळापर्यंत पोहोचविण्याचा निर्धार व्यक्त करण्यात आला.

“संत रोहिदास महाराजांनी मोगलांच्या काळातील धर्मांतराच्या प्रवृत्तीला निर्भीडपणे विरोध करत स्वधर्म आणि स्वाभिमानाचे रक्षण केले. त्यांच्या पवित्र रचनांना शीख धर्माच्या ‘गुरु ग्रंथ साहिब’मध्ये मानाचे स्थान प्राप्त झाले आहे. त्यांनी कर्मकांड आणि जातिभेदाला विरोध करून निर्मळ भक्तीला अध्यात्माचे अधिष्ठान मानले.”

— निलेश गद्रे (सदस्य, समरसता मंच – महाराष्ट्र व गोवा)

© २०२६ मॅक्स मंथन डेली न्यूज. सर्व हक्क राखीव.

‘तारपा’ हेच आमचे जीवन अन् वंशावळ; रुद्रांग वाद्यपथकाकडून पद्मश्री भिकल्या लाडक्या धिंडा यांचा भव्य सन्मान!

पुणे/पिंपरी चिंचवड प्रतिनिधी आकाश कांबळे दि. २७ जुलै २०२६ मॅक्स मंथन डेली न्यूज:

पुणे : “आमचे पणजोबा नवश्या, आजोबा धाकल्या हे तारपा वाद्य वाजवायचे. त्यानंतर धाकल्याचा मुलगा लाडक्या, आणि लाडक्याचा मुलगा मी, भिकल्या आज तारपा वाजवतो. ‘तारपा‘ हे केवळ वाद्य नसून आमची वंशावळ आहे. आता माझा नातू आणि पणतू हे वाद्य शिकत आहेत. मी त्यांच्यासोबतच साठ-सत्तर लोकांना हे वाद्य शिकवले आहे,” अशी अत्यंत भावुक आणि सार्थ अभिमानाची भावना प्रसिद्ध पद्मश्री तारपा वादक भिकल्या लाडक्या धिंडा यांनी व्यक्त केली.

रुद्रांग वाद्यपथक ट्रस्ट, पुणे यांच्या दशकपूर्ती निमित्त आयोजित भव्य वाद्यपूजन सोहळ्यात पद्मश्री भिकल्या लाडक्या धिंडा यांचा सत्कार करण्यात आला. याप्रसंगी उपस्थितांशी संवाद साधताना ते बोलत होते. “देवाने आपल्याला जन्म दिला आहे. मनाला विचारून आपण विचार करायचा असतो आणि विचारांनी आचार केला, तरच विकास होतो,” असा महत्त्वपूर्ण संदेशही त्यांनी यावेळी दिला.

पुण्याच्या गणेशोत्सवाची ख्याती जगभर पसरली असून ढोल-ताशा ही पुण्याची खास संस्कृती आहे. रुद्रांग वाद्यपथक ट्रस्टच्या दशकपूर्ती निमित्त एका वादक संस्कृतीकडून दुसऱ्या पारंपरिक वादक संस्कृतीचा सन्मान व्हावा, या उदात्त उद्देशाने पद्मश्री भिकल्या लाडक्या धिंडा यांचा सत्कार करण्यात आला, अशी माहिती ट्रस्टचे अध्यक्ष अमर भालेराव यांनी दिली.

या कार्यक्रमा प्रसंगी आमदार हेमंत रासने, दिपकभाऊ नागपुरे, नगरसेवक राजेंद्र काकडे, नगरसेवक अपूर्व खाडे, नगरसेविका पुजा जागडे, अभिनेते रमेश परदेशी (पिट्याभाई), नितीन पंडीत, आशिष कांटे, देवेंद्र वडके, अमित पळसकर, शिरीष थिटे, गणेश देशपांडे, मयुर ढमाले यांच्यासह शहरातील विविध वाद्यपथकांचे व गणेशोत्सव मंडळांचे पदाधिकारी मोठ्या संख्येने उपस्थित होते.

तारपा वाद्याचे वैशिष्ट्य सांगताना भिकल्या धिंडा म्हणाले, “आमचा तारपा देवासाठी वाजतो, हे देवकार्याचे वाद्य आहे. हे वाद्य श्वासाने वाजते. जसा वारा आल्यावर झाड हलते, तसा तारप्याला श्वास दिला की ते वाजते. माडाचे पान, दोन बांबू आणि त्याला दुधी भोपळा जोडून हे वाद्य बनवले जाते. तारप्यात नर आणि मादी अशा दोन नलिका असतात. शरीराला जेवढा श्वास लागतो, तेवढा श्वास या दोन्हींमध्ये भरावा लागतो.”

यावेळी बोलताना आमदार हेमंत रासने म्हणाले, “गणेशोत्सवाला १३५ वर्षांची भव्य परंपरा आहे. पूर्वी कार्यकर्ते स्वतः मंडप आणि सजावट करायचे. काळानुसार बदल होत गेले असले, तरी गणेशोत्सवाने कायम धर्म, संस्कृती आणि परंपरा जपण्याचे काम केले आहे.”

या कार्यक्रमात अध्यक्ष अमर भालेराव यांनी ट्रस्टच्या वतीने आयोजित करण्यात येणाऱ्या ‘इन्स्टाग्राम रील’ स्पर्धेची माहिती दिली. कार्यक्रमाचे आयोजन अध्यक्ष अमर भालेराव, श्रीनिवास निगडे, अमोल शुक्ल, तुषार दामगुडे, अमित घुले, निलेश वावरे यांनी केले असून, ढोल-ताशा महासंघाचे अध्यक्ष पराग ठाकूर यांचे या कार्यक्रमास विशेष मार्गदर्शन लाभले.

© २०२६ मॅक्स मंथन डेली न्यूज. सर्व हक्क राखीव.

सायना नेहवाल यांनी छत्रभुज नरसी स्कूल, पुणे येथे सुजय जयराज यांच्यासोबत साधला विद्यार्थ्यांशी दिलखुलास संवाद! ‘चॅम्पियन कनेक्ट’ उपक्रमात जागवल्या यशाच्या जिद्दीच्या आठवणी

पुणे/पिंपरी चिंचवड प्रतिनिधी बालाजी नवले, २६ जुलै २०२६ मॅक्स मंथन डेली न्यूज:

पुणे: पुण्यातील अमनोरा पार्क येथील छत्रभुज नरसी स्कूल (CNS) मध्ये ‘चॅम्पियन कनेक्ट’ (Champion Connect) या विशेष उपक्रमांतर्गत ऑलिम्पिक कांस्यपदक विजेती आणि माजी जागतिक अव्वल (World No. 1) बॅडमिंटनपटू सायना नेहवाल हिच्यासोबत प्रेरणादायी ‘फायरसाइड कन्व्हर्सेशन’ (दिलखुलास संवाद) पार पडला. छत्रभुज नरसी स्कूलचे अध्यक्ष सुजय जयराज यांनी या संवादाचे थेट सूत्रसंचालन केले. विद्यार्थी, पालक आणि शिक्षकांच्या उपस्थितीत रंगलेल्या या सत्रात सायनाने आपल्या क्रीडा प्रवासातील जिद्द, शिस्त आणि सातत्याचे महत्त्व उलगडून दाखवले.

या संवादात केवळ क्रीडा क्षेत्रातील यशावर भर न देता, सातत्यपूर्ण उत्कृष्टतेमागील विचारसरणी आणि मानसिकतेवर सविस्तर चर्चा करण्यात आली. सुजय जयराज यांनी यापूर्वी सायना नेहवालच्या जीवनावर आधारित गाजलेल्या चरित्रपटाची (बायोपिक) निर्मिती केली असल्याने, दोघांमधील संवाद अत्यंत मनमोकळा आणि भावूक ठरला.

सायनाने एका तरुण खेळाडूपासून ते देशातील अत्यंत प्रतिष्ठित क्रीडा व्यक्तिमत्त्व बनण्यापर्यंतचा प्रवास मांडताना अपयशातून मिळालेले धडे, तणावाचे व्यवस्थापन, आत्मविश्वास निर्माण करणे आणि यशाच्या शिखरावर पोहोचूनही जमिनीवर राहण्याचे महत्त्व याविषयी विद्यार्थ्यांना महत्त्वपूर्ण मार्गदर्शन केले.

सत्रानंतर सायनाने शाळेच्या कॅम्पसमध्ये, विशेषतः बॅडमिंटन कोर्टवर विद्यार्थ्यांशी प्रत्यक्ष संवाद साधला. क्रीडा असो किंवा शिक्षण, जीवनात कोणतेही यश झटपट मिळत नसून ते दररोजच्या सातत्यपूर्ण प्रयत्नांतूनच साध्य होते, याची जाणीव तिने विद्यार्थ्यांना करून दिली.

या वेळी छत्रभुज नरसी स्कूलचे अध्यक्ष सुजय जयराज म्हणाले, “आजच्या काळात तरुणांसमोर केवळ अंतिम यशाच्या कथा मांडल्या जातात. मात्र, प्रत्येक मोठे यश हे असंख्य साध्या दिवसांतील मेहनत, चिकाटी आणि सातत्यपूर्ण शिकण्याच्या प्रक्रियेवर उभे असते, हे अशा संवादांमधून स्पष्ट होते.”

“खेळाडू कितीही हुशार असला तरी त्याच्याकडे यश गाठण्याची जिद्द आणि प्रामाणिक कष्ट हवेत; तरच तो मोठे यश मिळवून देशाचे नाव उंचावू शकतो. जर पालकांना आपल्या मुलांचे उत्तुंग यश पाहायचे असेल, तर त्यांनी मुलांना लहानपणापासूनच शिस्त लावणे, तसेच त्यांना मनाने खंबीर आणि संयमी बनवणे अत्यंत महत्त्वाचे आहे.”

— सायना नेहवाल (ऑलिम्पिक पदक विजेती बॅडमिंटनपटू)

अमनोरा पार्क, पुणे येथील छत्रभुज नरसी स्कूल (CNS) ही संस्था विद्यार्थ्यांना शैक्षणिक उत्कृष्टतेबरोबरच क्रीडा, कला आणि विविध सहशालेय उपक्रमांच्या माध्यमातून संतुलित आणि सर्वसमावेशक शिक्षण देण्यासाठी कटिबद्ध आहे.

© २०२६ मॅक्स मंथन डेली न्यूज. सर्व हक्क राखीव.