पुण्याने देशाला दिले कसलेले हॉकीपटू! ‘वर्ल्ड कप ट्रॉफी भारतातच राहील’ – राज्यमंत्री मुरलीधर मोहोळ

एफआयएच ज्युनियर वर्ल्ड कप २०२५ ट्रॉफीचे सेंट व्हिन्सेंट हायस्कूलमध्ये भव्य स्वागत; धनराज, विक्रम पिल्ले यांच्या कामगिरीचे कौतुक

पुणे,  दि. २३ नोव्हेंबर २०२५, मॅक्स मंथन डेली न्यूज:

तमिळनाडूमध्ये होणाऱ्या एफआयएच पुरुष हॉकी ज्युनियर वर्ल्ड कप २०२५ च्या प्रतिष्ठित ट्रॉफीचे आज (शनिवार, २२ नोव्हेंबर) पुण्यात अत्यंत उत्साहात आणि भव्य स्वागत करण्यात आले. सेंट व्हिन्सेंट हायस्कूलच्या मैदानावर आयोजित करण्यात आलेल्या या स्वागत सोहळ्याला राजकीय, पोलीस आणि क्रीडा क्षेत्रातील मान्यवरांची मांदियाळी उपस्थित होती.

राज्यमंत्री मुरलीधर मोहोळ यांनी यावेळी बोलताना “मी या वर्ल्ड कप ट्रॉफीसह आलेल्या सर्व मान्यवरांचे मनःपूर्वक स्वागत व अभिनंदन करतो. तसेच ही वर्ल्ड कप ट्रॉफी भारतातच राहील, अशी मी मनापासून अपेक्षा करतो,” असे विश्वासपूर्वक मत व्यक्त केले.

राज्यमंत्री मुरलीधर मोहोळ यांनी यावेळी पुण्याचे भारतीय हॉकीतील योगदान अधोरेखित केले. ते म्हणाले, “पुण्याने भारतीय हॉकीला नेहमीच गुणी, दिग्गज आणि अनुभवसंपन्न खेळाडू दिले आहेत. यात धनराज पिल्ले आणि विक्रम पिल्ले यांसारख्या खेळाडूंनी आंतरराष्ट्रीय पातळीवर पुण्याचे नाव उज्ज्वल केले आहे.”

• अभिमानास्पद बाब: मुरलीधर मोहोळ यांनी सांगितले की, “आज पुण्यातील दहा खेळाडू राष्ट्रीय निवड शिबिरात सहभागी आहेत, ही पुण्यासाठी अभिमानाची बाब आहे.”

• शासकीय मदत: पुण्यातील खेळाडूंना आवश्यक ती मदत राज्य शासन आणि महाराष्ट्र संघटना नक्कीच देईल, असे आश्वासन त्यांनी दिले.

कार्यक्रमाच्या अध्यक्षस्थानी कृष्ण प्रकाश (आयपीएस), अतिरिक्त पोलीस महासंचालक – फोर्स वन आणि अध्यक्ष हॉकी महाराष्ट्र हे होते. त्यांनी हॉकीचे महत्त्व पटवून दिले.

कृष्ण प्रकाश (आयपीएस) म्हणाले, “हॉकी हा फक्त खेळ नाही, तर ध्यान व अनुशासनाचा संगम आहे.” हॉकी ट्रॉफी टूरचा मुख्य उद्देश राष्ट्रीय खेळाचा प्रसार करणे आणि मेजर ध्यानचंद यांसारख्या महान खेळाडूंना आदरांजली वाहणे हा आहे. ते पुढे म्हणाले की, भारताची युवा शक्ती अपार आहे आणि येत्या काळात भारत आंतरराष्ट्रीय क्रीडा स्पर्धांमध्ये आणखी पदके जिंकेल, असा आम्हाला पूर्ण विश्वास आहे.

यावेळी हॉकी इंडियाचे सहयोगी उपाध्यक्ष मनोज भोरे आणि हॉकी महाराष्ट्रचे सरचिटणीस मनीष आनंद यांनीही ट्रॉफीचे स्वागत केले.

ट्रॉफी टूरची सुरुवात लोहेगाव येथील संत तुकाराम हायस्कूल येथे पारंपरिक पद्धतीने झाली. येथे तीन शाळांतील विद्यार्थ्यांनी उत्स्फूर्त स्वागत केले. त्यानंतर ट्रॉफीचा काफिला खडकीतील एक्सेलसियर थिएटर चौकात दाखल झाला आणि येथून रॅली निघाली. ही रॅली राजघरना, सलाम जनरल स्टोअर, गांधी चौक मार्ग ओलांडत कर्नल भगत हायस्कूल येथे पोहोचली. या रॅलीत स्थानिक युवक, प्रशिक्षक व ज्येष्ठ हॉकीपटू मोठ्या संख्येने सहभागी झाले होते.

सेंट व्हिन्सेंट हायस्कूल मैदानावर झालेल्या या सोहळ्यात विक्रम पिल्ले, रमेश पिल्ले, विकास पिल्ले, पूजा आनंद, वारिदा शेख, संजय शेट, मनीषा साखरे, फादर टायटस (प्राचार्य – सेंट व्हिन्सेंट हायस्कूल) आणि सिस्टर लैला (प्राचार्या – सेंट एन्स हायस्कूल) यांचा शाल व श्रीफळ देऊन विशेष सन्मान करण्यात आला.

पुण्यातील स्वागत सोहळ्यानंतर ही वर्ल्ड कप ट्रॉफी पुढील प्रवासासाठी हैदराबादकडे रवाना झाली.

© २०२५ मॅक्स मंथन डेली न्यूज. सर्व हक्क राखीव.