पिंपरी-चिंचवडमध्ये ‘अभय’ योजनेचा धमाका! २० दिवसांत ८० कोटींचा कर जमा; थकबाकीदारांना १९ कोटींची सूट, ३१ मार्चपर्यंत सुवर्णसंधी

पिंपरी-चिंचवड प्रतिनिधी: बालाजी नवले, २१ मार्च २०२६ | मॅक्स मंथन विशेष:

पिंपरी : पिंपरी-चिंचवड महानगरपालिकेने थकबाकीदार मालमत्ताधारकांसाठी सुरू केलेल्या **’अभय योजने’**ला शहरात उत्स्फूर्त प्रतिसाद मिळत आहे. १ मार्चपासून लागू झालेल्या या योजनेचा अवघ्या २० दिवसांत २७ हजार ८४० नागरिकांनी लाभ घेतला असून, महापालिकेच्या तिजोरीत तब्बल ८० कोटींहून अधिक रक्कम जमा झाली आहे. विशेष म्हणजे, या योजनेअंतर्गत थकबाकीदारांना आतापर्यंत १९ कोटी १५ लाखांची भरघोस सवलत मिळाली आहे.

महापालिका आयुक्त डॉ. विजय सूर्यवंशी यांनी दिलेल्या माहितीनुसार, आतापर्यंत ५ लाखांहून अधिक मालमत्ताधारकांनी एकूण ८३० कोटी ५ लाख रुपयांचा कर भरला आहे.

• ९०% सवलत: मालमत्ता कराच्या थकबाकीवरील विलंब शुल्कात (Penal Interest) ९० टक्के सवलत दिली जात आहे.

• पात्रता: ही सवलत मिळवण्यासाठी आर्थिक वर्ष २०२५-२६ पर्यंतची संपूर्ण थकबाकी ३१ मार्च २०२६ पर्यंत एकरकमी भरणे अनिवार्य आहे.

• व्याप्ती: निवासी, बिगरनिवासी, औद्योगिक आणि मोकळ्या जागा अशा सर्व प्रकारच्या मालमत्तांना ही योजना लागू आहे.

नागरिकांची सोय लक्षात घेऊन महापालिकेने महत्त्वाचा निर्णय घेतला आहे. शनिवार आणि रविवारसह खालील सार्वजनिक सुट्ट्यांच्या दिवशीही सर्व कर संकलन केंद्रे सकाळी १० ते सायंकाळी ५ वाजेपर्यंत खुली राहतील:

• २१ मार्च: रमजान ईद

• २६ मार्च: श्री राम नवमी

• ३१ मार्च: महावीर जयंती (रात्री १२ वाजेपर्यंत ऑनलाईन सुविधा उपलब्ध)

“अभय योजनेमुळे थकबाकीदारांना मोठा आर्थिक दिलासा मिळत आहे. नागरिकांनी शेवटच्या क्षणाची वाट न पाहता ३१ मार्चपूर्वी आपल्या कराचा भरणा करावा. ऑनलाईन सुविधेसह सर्व केंद्रे सुट्टीच्या दिवशीही सुरू ठेवण्यात आली आहेत.”

— डॉ. विजय सूर्यवंशी, आयुक्त, पिंपरी-चिंचवड.

“नागरिकांचा हा उत्स्फूर्त प्रतिसाद प्रशासनावरील विश्वासाचे प्रतीक आहे. ज्यांनी अद्याप कर भरलेला नाही, त्यांनी या संधीचा लाभ घेऊन आपली आर्थिक बचत करावी.”

— रवि लांडगे, महापौर, पिंपरी-चिंचवड.

© २०२६ मॅक्स मंथन डेली न्यूज. सर्व हक्क राखीव।