संतांच्या भूमीत मिळालेला पुरस्कार म्हणजे आशिर्वादासारखा: कवी रामदास फुटाणे
‘महाराष्ट्रभर फिरून ग्रामीण कवींची फळी उभी करणारा महाराष्ट्राचा हासरा आरसा’ – आमदार अमित गोरखे यांची फुटाणेंना मानवंदना
पिंपरी चिंचवड, प्रतिनिधी बालाजी नवले, ११ ऑक्टोबर २०२५, मॅक्स मंथन डेली न्यूज:
पिंपरी चिंचवड महापालिकेने आयोजित केलेल्या ‘अभिजात मराठी भाषा सप्ताहा’ मध्ये ज्येष्ठ कवी आणि साहित्यिक रामदास फुटाणे यांना मानपत्र प्रदान करण्यात आले, तर राष्ट्रीय चित्रपट पुरस्कार विजेते युवा दिग्दर्शक सुजय डहाके यांचा विशेष सन्मान करण्यात आला. संत तुकाराम महाराज आणि संत ज्ञानेश्वर महाराज यांच्या पावन भूमीच्या परिसरातील पिंपरी-चिंचवड शहराने केलेला हा सन्मान ‘आशिर्वादासारखा’ असल्याचे रामदास फुटाणे यांनी नमूद केले.
महापालिकेच्या वतीने आयोजित या समारंभात, आमदार अमित गोरखे यांच्या उपस्थितीत अतिरिक्त आयुक्त तृप्ती सांडभोर यांनी फुटाणे यांना मानपत्र प्रदान केले.
‘ही भूमी मराठीची खरी विद्यापीठे’
आपले मनोगत व्यक्त करताना रामदास फुटाणे म्हणाले, “आळंदी आणि देहू ही केवळ तीर्थक्षेत्रे नाहीत, तर मराठी संस्कृतीची संस्कारक्षेत्रे आहेत. तुकाराम-ज्ञानेश्वरांच्या विचारांनी ही भूमी मराठीची खरी विद्यापीठे आहे. या विद्यापीठाच्या परिसरात असलेल्या पिंपरी चिंचवड या कामगार नगरीत मला पुरस्कार मिळतोय, हा माझ्या जीवनातील महत्त्वाचा क्षण असून, हा पुरस्कार मला आशिर्वादासारखा आहे.” कामगार नगरीने केलेला हा सन्मान आपल्यासाठी अविस्मरणीय पर्वणी असल्याचेही त्यांनी नमूद केले.
यावेळी फुटाणे यांनी महापालिकेच्या पुढाकाराचे कौतुक करत, अभिजात मराठी साहित्याचा आणि कलेचा आनंद घेण्यासोबतच, मराठी भाषा जतन करून तिचा वारसा नव्या पिढीकडे देण्याची मोठी जबाबदारी आपल्या सर्वांवर असल्याचे मत व्यक्त केले. त्यांनी आपल्या खुमासदार शैलीत सामाजिक परिस्थितीवर भाष्य करणाऱ्या विविध वात्रटिका आणि कवितांचे सादरीकरण करून रसिकांची वाहवा मिळवली.
फुटाणे म्हणजे महाराष्ट्राचा ‘हासरा आरसा’
आमदार अमित गोरखे यांनी कवी रामदास फुटाणे यांचा गौरव करताना त्यांना ‘महाराष्ट्राचा हासरा आरसा’ असे संबोधले. ते म्हणाले, “फुटाणे यांनी महाराष्ट्रभर फिरून ग्रामीण भागातील कवींची मोठी फळी उभी केली आहे. ‘सामना’ सारख्या अजरामर चित्रपटाची निर्मिती त्यांनी केली आहे. आपले मराठी साहित्य जागतिक पातळीवर नेण्यासाठी त्यांचे योगदान महत्त्वपूर्ण आहे.”
महापालिकेने फुटाणे यांच्यासोबत युवा दिग्दर्शक सुजय डहाके यांचाही सन्मान करून शहरातील कलाकारांना प्रोत्साहन देण्याचे व त्यांच्या कार्याचा गौरव करण्याचे काम केले आहे, असे गोरखे यांनी नमूद केले.
आंतरराष्ट्रीय चित्रपट महोत्सवाची मागणी
सन्मानाला उत्तर देताना राष्ट्रीय चित्रपट पुरस्कार प्राप्त ‘श्यामची आई’ चित्रपटाचे दिग्दर्शक सुजय डहाके म्हणाले, “जन्मभूमीत आपले कौतुक झाल्याने आज खूप छान वाटत आहे. आजचा सन्मान माझ्यासाठी प्रेरणादायी आहे.”
यावेळी त्यांनी पिंपरी-चिंचवड शहराच्या सांस्कृतिक चळवळीला अधिक चालना देण्यासाठी आंतरराष्ट्रीय चित्रपट महोत्सवाचे आयोजन करण्याची मागणी केली. या माध्यमातून जागतिक स्तरावरील कलाकारांना स्थानिक कलावंतांशी संवाद साधण्याची आणि नवोदित कलाकारांना एक आंतरराष्ट्रीय पातळीवरील व्यासपीठ मिळण्याची संधी मिळेल, असे मत त्यांनी व्यक्त केले.
माहिती सप्ताहाची माहिती: अतिरिक्त आयुक्त तृप्ती सांडभोर यांनी ते ऑक्टोबर या काळात राज्य सरकारच्या निर्देशानुसार आयोजित केलेल्या ‘अभिजात मराठी भाषा सप्ताहा’मध्ये झालेल्या विविध उपक्रमांची माहिती दिली. या सप्ताहाला अखिल भारतीय मराठी नाट्य परिषद (पिंपरी चिंचवड शाखा) आणि महाराष्ट्र साहित्य परिषद (पिंपरी चिंचवड शाखा) तसेच श्री भैरवनाथ सार्वजनिक ग्रंथालय आणि हुतात्मा चापेकर सार्वजनिक ग्रंथालयाने सहकार्य केले.
याप्रसंगी महापालिकेचे सह आयुक्त मनोज लोणकर, उपायुक्त अण्णा बोदडे, संदीप खोत, सहाय्यक आयुक्त अतुल पाटील, विशेष अधिकारी तथा मराठी भाषा समन्वय अधिकारी किरण गायकवाड, जनता संपर्क अधिकारी प्रफुल्ल पुराणिक, अखिल भारतीय मराठी नाट्य परिषद पिंपरी चिंचवड शाखेचे अध्यक्ष भाऊसाहेब भोईर आणि महाराष्ट्र साहित्य परिषद पिंपरी चिंचवड शाखेचे अध्यक्ष राजन लाखे यांची व्यासपीठावर उपस्थिती होती.
© मॅक्स मंथन डेली न्यूज. सर्व हक्क राखीव.
