आला हिवाळा, तब्बेत सांभाळा! सर्दी, फ्लू, न्यूमोनियाचा धोका; आरोग्य विभागाने सांगितल्या ‘या’ ९ महत्त्वाच्या उपाययोजना

थंडीत रोगप्रतिकारशक्ती कमी होते; डॉ. सुरेंद्र आसोले यांचे नागरिकांना ‘स्वच्छता आणि निरोगी जीवनशैली’ पाळण्याचे आवाहन

अमरावती, प्रतिनिधी अविनाश वानखेडे, दि. २५ नोव्हेंबर २०२५, मॅक्स मंथन डेली न्यूज:

हिवाळ्यात हवेतील आर्द्रता घटते, तापमान घसरते आणि नागरिक जास्तीत-जास्त वेळ घरात राहतात. या कारणामुळे अनेक आजारांचे प्रमाण वाढते. याच पार्श्वभूमीवर अमरावती येथील सार्वजनिक आरोग्य विभागाने नागरिकांना हिवाळ्यातील सामान्य आजार आणि त्यांना टाळण्यासाठीच्या महत्त्वाच्या प्रतिबंधात्मक उपाययोजनांचे पालन करण्याचे आवाहन केले आहे.

जिल्हा आरोग्य अधिकारी डॉ. सुरेंद्र आसोले यांनी सांगितले की, थंडी सहन करणे कठीण होऊन शरीराची रोगप्रतिकारशक्ती कमी होते आणि इतर आजारांचा धोका वाढतो.

हिवाळ्यात खालीलप्रमाणे विविध आजार सामान्यत: दिसून येतात:

या गंभीर आजारांवर नियंत्रण ठेवण्यासाठी सार्वजनिक आरोग्य विभागाने नागरिकांना खालील महत्त्वाचे उपाय पाळण्याचे आवाहन केले आहे:

१. हातांची स्वच्छता: सॅनिटायझर्सचा वापर करा किंवा हात साबणाने २० सेकंद धुवा.

२. माणसांचा निकटसंपर्क टाळा: आजारी व्यक्तींच्या संपर्कात येण्याचे टाळा.

३. रोगप्रतिकारशक्ती बळकट करा: संतुलित आहार, पुरेशी झोप आणि नियमित व्यायाम करा.

४. श्वसनसंस्थेचे आरोग्य सांभाळा: खोकताना तोंड आणि नाक झाकून घ्या.

५. भरपूर पाणी प्या: शरीराची आर्द्रता योग्य ठेवा.

६. स्पर्शाची योग्य पद्धत: वारंवार चेहऱ्याला हात लावण्याचे टाळा.

७. आजारी असाल तर घरीच राहा: लक्षणे दिसल्यास इतरांना संसर्गापासून वाचवा.

८. पृष्ठभागांचे निर्जंतुकीकरण करा: जिथे अन्न शिजवले जाते, अशा ठिकाणी स्वच्छता राखा.

९. धुराच्या संपर्कात येणे टाळा: तंबाखूच्या धुरासारख्या हवेतील प्रदूषकांपासून वाचण्याचा प्रयत्न करा.

जिल्हा आरोग्य अधिकारी डॉ. सुरेंद्र आसोले यांनी या उपाययोजना करून नागरिकांनी आपले आरोग्य राखावे, तसेच आजारी असलेल्या व्यक्तींनी इतरांच्या संपर्कात येणे टाळावे, असे आवाहन केले आहे.

© २०२५ मॅक्स मंथन डेली न्यूज. सर्व हक्क राखीव.