उत्तम कचरा व्यवस्थापन करा आणि मालमत्ता करात सूट मिळवा! पिंपरी-चिंचवड महापालिकेकडून सोसायट्यांना प्रोत्साहन

दैनिक १०० किलो कचरा निर्मिती करणाऱ्या संस्थांना स्वयंचलित व्यवस्थापनासाठी आवाहन; उपायुक्त डॉ. प्रदीप ठेंगल यांच्या मार्गदर्शनाखाली अभिनव उपक्रम

पिंपरी प्रतिनिधी शाम सोनवणे, दि. २६ नोव्हेंबर २०२५, मॅक्स मंथन डेली न्यूज: 

पिंपरी चिंचवड शहरात कचऱ्याचे प्रमाण कमी करून वसुंधरापूरक (पर्यावरणपूरक) वातावरण निर्मितीसाठी पिंपरी चिंचवड महानगरपालिका (PCMC) सातत्याने जनजागृती मोहीम राबवत आहे. महापालिकेने आता ज्या गृहनिर्माण संस्थांमधून दररोज १०० किलो किंवा त्याहून अधिक कचरा निर्माण होतो, अशा सोसायट्यांना स्वतःहून कचरा व्यवस्थापन करण्यासाठी प्रोत्साहनपर योजना जाहीर केली आहे. जास्तीतजास्त सोसायट्यांनी या उपक्रमाचा लाभ घ्यावा, असे आवाहन महापालिकेच्या वतीने करण्यात आले आहे.

महापालिकेकडून शहरातील कचऱ्याचे वसुंधरापूरक व्यवस्थापन करण्यासाठी आयुक्त श्रावण हर्डीकर, अतिरिक्त आयुक्त विजयकुमार खोराटे यांच्या मार्गदर्शनाखाली, तर उपायुक्त डॉ. प्रदीप ठेंगल आणि आरोग्य कार्यकारी अधिकारी अमित पंडित यांच्या अधिपत्याखाली विविध अभिनव उपक्रम राबविण्यात येत आहेत.

महापालिका नागरिकांमध्ये स्वच्छतेची सवय रुजविण्यासाठी खालील उपक्रम राबवत आहे:

• ओला-सुका कचरा विलगीकरण

• होम कम्पोस्टिंग

• शून्य कचरा प्रकल्प

• वस्तूंच्या पुनर्वापरासाठी आर.आर.आर. केंद्रे (RRR Centres)

महापालिकेकडून अशा पर्यावरणपूरक उपक्रम राबविणाऱ्या गृहनिर्माण संस्था, आस्थापने, हॉटेल व्यवसायिक आणि इतर मालमत्ता धारकांना प्रोत्साहन देण्यासाठी मालमत्ता कर भरताना सामान्य करात खालीलप्रमाणे सवलती देण्यात येत आहेत:

महापालिकेच्या या प्रोत्साहनपर उपक्रमामुळे शहरातील अनेक सोसायट्या, शाळा, आस्थापने आणि उद्योगसंस्था कचरा व्यवस्थापनाच्या दिशेने पुढाकार घेत आहेत. यामुळे शहरातील कचरा संकलनावरील ताण कमी होऊन शहराची वसुंधरापूरक आणि शाश्वत जीवनशैलीकडे वाटचाल सुरू झाली आहे.

डॉ. प्रदीप ठेंगल, उपायुक्त, पिंपरी चिंचवड महापालिका

“पिंपरी चिंचवड महापालिका ही वसुंधरास्नेही शहर घडविण्याच्या दिशेने शाश्वत पाऊले उचलत असून, कचरा व्यवस्थापनात नागरिक आणि सोसायट्यांचा सक्रिय सहभाग अत्यंत महत्त्वाचा आहे. स्वतःच्या परिसरात कचऱ्याचे कम्पोस्टिंग करणाऱ्या संस्था खरं तर शहराच्या स्वच्छतेच्या खऱ्या भागीदार आहेत. महापालिकेकडून अशा उपक्रमांना नेहमीच प्रोत्साहन आणि सहकार्य दिले जात आहे.”

© २०२५ मॅक्स मंथन डेली न्यूज. सर्व हक्क राखीव.