लोकशाही बळकटीकरणासाठी विद्यार्थ्यांचे ‘पत्रयुद्ध’! आई-वडिलांना मतदानाचे कर्तव्य बजावण्याची भावनिक साद

“प्रिय आई-बाबा, १५ जानेवारीला मतदान नक्की करा!” ५८ हजार विद्यार्थ्यांचा पालकांकडे मतदानासाठी ‘हट्ट’

पिंपरी-चिंचवड मनपाचा अनोखा उपक्रम; विद्यार्थ्यांच्या पत्रातून ५८ हजार पालकांपर्यंत पोहोचणार मतदानाचा संदेश

पिंपरी चिंचवड प्रतिनिधी बालाजी नवले, दि.२३ डिसेंबर २०२५, मॅक्स मंथन डेली न्यूज: 

पिंपरी (दि. २३ डिसेंबर २०२५): “जसा तुम्ही आई-वडिलांकडे खाऊसाठी किंवा उद्यानात जाण्यासाठी हट्ट करता, तसाच हट्ट आता मतदानासाठी करा. १५ जानेवारी २०२६ रोजी आधी मतदान आणि मगच इतर कामं, असा आग्रह पालकांकडे धरा,” असे भावनिक आवाहन पिंपरी-चिंचवड महानगरपालिकेच्या अतिरिक्त आयुक्त तृप्ती सांडभोर यांनी विद्यार्थ्यांना केले.

महानगरपालिका सार्वत्रिक निवडणूक २०२५-२६ च्या पार्श्वभूमीवर ‘स्वीप’ (SVEEP) अंतर्गत मतदान जनजागृती करण्यासाठी ‘प्रिय आई बाबा, पत्रास कारण की…’ हा अभिनव उपक्रम राबविण्यात येत आहे. या उपक्रमाची सुरुवात आज थेरगाव येथील पीएम श्री माध्यमिक विद्यालयात उत्साहात झाली.

महापालिकेच्या प्राथमिक व माध्यमिक शाळांमधील सुमारे ५८ हजार विद्यार्थी आपल्या पालकांना मतदानाचे महत्त्व समजावून सांगणारे एक पत्र देणार आहेत. या पत्राच्या माध्यमातून मुलांनी आपल्या पालकांना लोकशाहीच्या बळकटीकरणासाठी मतदानाचे कर्तव्य बजावण्याची विनंती केली आहे.

अतिरिक्त आयुक्त तृप्ती सांडभोर म्हणाल्या:

“लोकशाही अधिक बळकट करण्यासाठी मतदारांचा सक्रिय सहभाग आवश्यक आहे. विद्यार्थ्यांच्या माध्यमातून कुटुंबांपर्यंत मतदानाचे महत्त्व पोहोचवण्याचा हा एक प्रभावी मार्ग आहे. मुले जेव्हा आपल्या आई-वडिलांना जबाबदार नागरिक म्हणून मतदान करताना पाहतील, तेव्हा त्यांनाही लोकशाहीचे महत्त्व कृतीतून समजेल.”

विद्यार्थ्यांनी आपल्या पालकांना दिलेल्या पत्रात म्हटले आहे की, “आई-बाबा, तुमचं एक मत माझं उद्याचं स्वप्न घडवेल. तुम्ही आम्हाला नेहमीच जबाबदार नागरिक होण्याचे महत्त्व शिकवले आहे. आता १५ जानेवारीला स्वतः मतदान केंद्रावर जाऊन आम्हाला लोकशाहीचे खरे महत्त्व कृतीतून शिकवा.”

या पत्राचे वाचन प्रसिद्ध रील स्टार शंभू महाजन आणि विद्यार्थी परमवीर आव्हाड यांनी केले, ज्याने उपस्थितांची मने जिंकली.

या कार्यक्रमाला महानगरपालिका उपायुक्त अण्णा बोदडे, जनता संपर्क अधिकारी प्रफुल्ल पुराणिक, मुख्याध्यापक बाळासाहेब राठोड, पर्यवेक्षक मंजुषा टिळेकर, हर्षदा राऊत आणि मोठ्या संख्येने शिक्षक व विद्यार्थी उपस्थित होते. उपायुक्त अण्णा बोदडे यांनी यावेळी सांगितले की, मतदान हा लोकशाहीचा कणा असून सशक्त लोकशाहीसाठी हा उपक्रम मैलाचा दगड ठरेल.

शहराचा विकास, स्वच्छता, शिक्षण आणि आरोग्य यांसाठी पालकांनी १५ जानेवारी २०२६ रोजी मतदान करावे, यासाठी आता संपूर्ण पिंपरी-चिंचवडमधील शाळकरी मुले सक्रिय झाली आहेत.

© २०२५ मॅक्स मंथन डेली न्यूज. सर्व हक्क राखीव.