पिंपरी-चिंचवडनंतर मायभूमीच्या सेवेसाठी मारुती भापकर सरसावले! श्रीगोंद्यात खरातवाडीच्या शेतकऱ्यांच्या हक्काच्या पाण्यासाठीचे आमरण उपोषण ७ तासांत यशस्वी

श्रीगोंदा (अहिल्यानगर) प्रतिनिधी बालाजी नवले , २२ जून २०२६ मॅक्स मंथन डेली न्यूज:

श्रीगोंदा: पिंपरी-चिंचवड शहराच्या सामाजिक आणि राजकीय पटलावर आपल्या अत्यंत आक्रमक, प्रामाणिक आणि जनहितैषी आंदोलनांनी ऐतिहासिक कायापालट घडवून आणणारे ज्येष्ठ समाजसेवक श्री. मारुती भापकर आता आपल्या मूळ जन्मभूमी आणि कर्मभूमी असलेल्या श्रीगोंदा तालुक्याच्या शाश्वत विकासासाठी पूर्ण ताकदीने मैदानात उतरले आहेत. खरातवाडी (पिंपळगाव पिसा) येथील शेतकऱ्यांना कुकडीच्या हक्काच्या पाण्यापासून वंचित ठेवणाऱ्या प्रशासकीय हलगर्जीपणा आणि स्थानिक अडवणुकीच्या विरोधात मारुती भापकर आणि कृष्णा यादव यांच्या नेतृत्वाखाली आज सोमवार (दि. २२ जून २०२६) रोजी सकाळी १०:०० वाजता श्रीगोंदा तहसील कार्यालयाच्या दारात शेतकऱ्यांनी थेट “आमरण उपोषण” सुरू केले.

शेतकऱ्यांच्या या वज्रमुठीपुढे अखेर पाटबंधारे प्रशासनाने अवघ्या ७ तासांत गुडघे टेकले असून, मागण्या तातडीने पूर्ण करण्याचे लेखी आश्वासन दिल्यानंतर उपोषण यशस्वीरित्या मागे घेण्यात आले.

सोमवारी सकाळी ठीक १०:०० वाजता खरातवाडी येथील शेकडो शेतकरी आपल्या हक्काच्या पाण्यासाठी तहसील कचेरीच्या बाहेर ठिय्या मांडून बसले. या आमरण उपोषणात मारुती भापकर आणि कृष्णा यादव यांच्या खांद्याला खांदा लावून  प्रमुख शेतकरी आक्रमकपणे सहभागी झाले होते. सुभाष पंदरकर, दत्तात्रय पंदरकर, अनंता कदम, शिवाजी भोर, रंगनाथ कदम, सुभाष गलबले, गणपत गलबले, गणपत नलगे, अमोल पंदरकर, शिवाजी भापकर, युवराज भापकर, सुदाम रणसिंग आणि पिंटू नलगे या उपोषणकर्त्यांना बळ देण्यासाठी पिंपळगाव खरातवाडीचे माजी सरपंच सूर्यजीत पवार, माजी उपसरपंच लक्ष्मण इथापे आणि नाना इथापे यांनी आंदोलनस्थळी वैयक्तिक भेट देऊन पाठिंबा दर्शविला.

१) हंगा डीओ (Hanga DO) येथे पक्के लोखंडी गेट: हंगा डिओ या ठिकाणी कायमस्वरूपी लोखंडी पक्के गेट बसवण्यात यावे, जेणेकरून पाण्याचे योग्य नियंत्रण होईल. या न्याय्य मागणीकडे वारंवार दुर्लक्ष होत होते. २) पोटचारी क्र. १ पोलीस बंदोबस्तात पूर्ववत सुरू करा: कुकडी डावा कालवा सुरू झाल्यापासून कार्यान्वित असलेली ‘डीवाय ८’ चारीची सब मायनर पोटचारी क्र. १ काही स्वार्थी शेतकऱ्यांनी बेकायदेशीरपणे बंद केली आहे. यामुळे खरातवाडीचे शेतकरी कुकडीच्या पाण्याच्या प्रत्येक आवर्तनापासून (रोटेशन) वंचित राहत आहेत. या चारीचे काम पोलीस बंदोबस्तात तातडीने पूर्ण व्हावे. ३) मायनर चारी क्र. ४५ ची दुरुस्ती: ही संपूर्ण चारी अत्यंत नादुरुस्त आणि लिकेज झाली आहे. यामुळे पाण्याचा अपव्यय होऊन पाणी शेवटपर्यंत पोहोचत नाही. या चारीचे दुरुस्तीचे काम तातडीने हाती घेण्यात यावे.

उपोषण सुरू होताच तालुक्यात आणि पाटबंधारे विभागात मोठी खळबळ उडाली. मारुती भापकर यांच्या आंदोलनाचा आवाका पाहून प्रशासकीय चक्र वेगाने फिरली. सायंकाळी ५:३० वाजता कुकडी पाटबंधारे विभाग २ श्रीगोंदा चे कार्यक्षम कार्यकारी अभियंता मा. प्रवीण घोरपडे, उपअभियंता मा. बबनराव वाळके आणि श्री. शेलार यांनी उपोषण स्थळी धाव घेतली. त्यांनी मारुती भापकर आणि शेतकऱ्यांसोबत मागण्यांवर अत्यंत सविस्तर व सकारात्मक चर्चा केली. तसेच खालील मुद्द्यांवर लेखी आश्वासन दिले.

• यांत्रिकी विभागाकडून तात्काळ दुरुस्ती: मायनर १ व मायनर ४५ या दोन्ही चाऱ्यांच्या कामाबाबत तात्काळ यांत्रिकी विभागाला लेखी निर्देश देण्यात आले असून, येत्या आवर्तनापूर्वी (रोटेशन) दोन्ही चाऱ्या दुरुस्त करून शेतकऱ्यांना शेतीसाठी पाणी दिले जाईल.
• हंगा गेटचे काम तात्काळ: हंगा डीओच्या पक्क्या लोखंडी गेटचे काम देखील प्राधान्याने हाती घेऊन युद्धपातळीवर पूर्ण केले जाईल.

या लेखी आश्वासनानंतर मारुती भापकर व सर्व शेतकऱ्यांनी कार्यकारी अभियंता प्रवीण घोरपडे व उपअभियंता बबनराव वाळके यांच्या हस्ते सरबत घेऊन आपले उपोषण सोडले. पाण्याचा गंभीर प्रश्न तातडीने निकाली निघाल्याबद्दल सर्व शेतकऱ्यांनी प्रशासनाचे आणि आंदोलन यशस्वी केल्याबद्दल मारुती भापकर यांचे आभार मानले.

या यशस्वी आंदोलनानंतर आपल्या भावना मांडताना आणि श्रीगोंद्याच्या विकासाचा संकल्प सोडताना ज्येष्ठ समाजसेवक मारुती भापकर अत्यंत भावनिक व ठाम आवाजात म्हणाले:

“मी पिंपरी-चिंचवड शहराच्या नागरी अधिकारांसाठी आणि भ्रष्टाचाराविरुद्ध गेली अनेक दशके अहोरात्र संघर्ष केला, तिथे अनेक कायदेशीर व रस्त्यावरील लढाया जिंकल्या. मात्र, आज माझ्या जन्मभूमी आणि कर्मभूमी असलेल्या या श्रीगोंदा तालुक्यातील मायबाप बळीराजाला स्वतःच्या घामाच्या पैशातून उभा राहणाऱ्या पाण्यासाठी जर आमरण उपोषण करावे लागत असेल, तर ही अत्यंत गंभीर बाब आहे. शेतकरी हा या मातीचा देव आहे आणि त्यांच्या डोळ्यांतील अश्रू मी सहन करू शकत नाही. हा लढा केवळ पाण्याचा नव्हता, तर शेतकऱ्यांच्या अस्मितेचा होता. आज प्रशासनाने सकारात्मक लेखी आश्वासन दिले आहे, ही आनंदाची बाब आहे; मात्र कामात एक दिवसाचाही विलंब झाला तर आम्ही पुन्हा कडक आंदोलन छेडू. आता माझी स्वारी माझ्या या मायभूमीच्या कल्याणासाठी कायमची सज्ज झाली असून, तालुक्यातील रस्ते, पाणी, शिक्षण आणि गरिबांच्या हक्कासाठी मी अखेरच्या श्वासापर्यंत लढत राहीन!”

© २०२६ मॅक्स मंथन डेली न्यूज. सर्व हक्क राखीव.