पिंपरी-चिंचवड पोलिसांची मोठी कारवाई! तब्बल ४० चोरीच्या दुचाकींसह सराईत गुन्हेगाराला ठोकल्या बेड्या; २१ लाखांचा मुद्देमाल जप्त

पिंपरी चिंचवड प्रतिनिधी: बालाजी नवले, ११ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड शहरात दुचाकी चोरीच्या वाढत्या घटनांना आळा घालण्यासाठी पोलीस आयुक्तांनी दिलेल्या आदेशानुसार, गुन्हे शाखा युनिट-२ ने अत्यंत धाडसी कामगिरी केली आहे. तब्बल ८० सीसीटीव्ही कॅमेऱ्यांचे फूटेज तपासून पोलिसांनी एका सराईत चोरट्याला अटक केली असून, त्याच्याकडून २१ लाख ६६ हजार रुपये किमतीच्या ४० मोटारसायकल जप्त केल्या आहेत.

या कारवाईमुळे पुणे जिल्ह्यासह जालना आणि परभणी येथील एकूण ३४ गुन्हे उघडकीस आले आहेत.

२ मार्च २०२६ रोजी बावधन पोलीस ठाण्याच्या हद्दीतील नांदे गावातून एक ‘स्प्लेंडर’ मोटारसायकल चोरीला गेली होती. या गुन्ह्याचा तांत्रिक तपास गुन्हे शाखा युनिट-२ कडे सोपवण्यात आला. वरिष्ठ पोलीस निरीक्षक अरविंद पवार यांच्या पथकाने चोरीच्या मार्गावरील ७० ते ८० सीसीटीव्ही कॅमेऱ्यांची तपासणी केली. गुप्त बातमीदाराकडून मिळालेल्या माहितीनुसार, पोलिसांनी बालेवाडी परिसरात सापळा रचून आशपाक इसाक पठाण (वय ३२, रा. पाथर्डी, अहिल्यानगर) याला शिताफीने ताब्यात घेतले.

पोलिसी खाक्या दाखवताच आरोपीने गुन्ह्याची कबुली दिली. तपासात समोर आलेली धक्कादायक माहिती:

• सराईत गुन्हेगार: आरोपी गेल्या २-३ वर्षांपासून पाथर्डीहून बसने पुण्यात येत असे आणि दुचाकी चोरून घेऊन जात असे.

• फायनान्सचे खोटे कारण: चोरीच्या गाड्या विकताना तो ग्राहकांना सांगायचा की, “या गाड्या फायनान्स कंपनीने हप्ते थकल्यामुळे जप्त केल्या आहेत,” ज्यामुळे लोक स्वस्तात गाड्या खरेदी करत असत.

• स्प्लेंडर प्रेम: आरोपीला विशेषतः ‘स्प्लेंडर’ गाडीची आवड असल्याने त्याने सर्वाधिक याच कंपनीच्या गाड्या चोरल्या.

• साथीदारालाही अटक: चोरीच्या गाड्या विकण्यास मदत करणारा त्याचा साथीदार मुकुंद उद्धवराव हारदास (वय २५, रा. परतूर, जि. जालना) यालाही पोलिसांनी अटक केली आहे.

पोलिसांनी जप्त केलेल्या ४० गाड्यांमुळे खालील पोलीस ठाण्यांमधील गुन्हे उघड झाले आहेत:

• पिंपरी-चिंचवड: बावधन, देहूरोड, चिखली, निगडी, हिंजवडी.

• पुणे शहर/ग्रामीण: चंदननगर (८ गुन्हे), खराडी (४ गुन्हे), लोणीकंद (३ गुन्हे), वाघोली (३ गुन्हे), शिक्रापूर, काळेपडळ, रांजणगाव, बाणेर.

• इतर जिल्हे: अंबड (जालना), दैठाणा (परभणी).

पोलीस आयुक्त विनय कुमार चौबे, सह-पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी, सारंग आव्हाड, पोलीस उप-आयुक्त डॉ. शिवाजी पवार, आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली:

वरिष्ठ पोलीस निरीक्षक अरविंद पवार, पीएसआय मयुरेश साळुंखे, दीपक खरात, प्रवीण दळे, नितीन ढोरे आणि त्यांच्या संपूर्ण पथकाने ही उल्लेखनीय कामगिरी केली आहे.

© २०२६ मॅक्स मंथन डेली न्यूज. सर्व हक्क राखीव।