आखाती युद्धाचा पिंपरी-चिंचवडच्या उद्योगांना मोठा तडाखा! औद्योगिक गॅस पुरवठा ठप्प; हजारो लघु उद्योग बंद पडण्याच्या वाटेवर

पिंपरी प्रतिनिधी आकाश कांबळे, ११ मार्च २०२६ | मॅक्स मंथन डेली न्यूज:

पिंपरी : आखाती देशांमधील इराण-इस्राईल आणि अमेरिका यांच्यातील वाढत्या युद्धजन्य परिस्थितीचा थेट फटका पिंपरी-चिंचवडच्या औद्योगिक नगरीला बसू लागला आहे. जागतिक पुरवठा साखळी विस्कळीत झाल्यामुळे कच्च्या मालाचे भाव गगनाला भिडले असून, त्यातच शासनाने औद्योगिक गॅसचा पुरवठा पूर्णतः थांबवल्याने सुमारे ७ ते ८ हजार सूक्ष्म व लघु उद्योजक संकटात सापडले आहेत.

“जर केंद्र व राज्य सरकारने तात्काळ औद्योगिक गॅसचा राखीव कोटा उपलब्ध करून दिला नाही, तर कारखाने बंद करण्याशिवाय आमच्यापुढे दुसरा पर्याय उरणार नाही,” असा गर्भित इशारा पिंपरी चिंचवड लघु उद्योग संघटनेचे अध्यक्ष संदीप बेलसरे यांनी दिला आहे.

• कच्च्या मालाचा तुटवडा: अल्युमिनियम, कॉपर आणि ब्रास यांसारख्या धातूंची आयात घटली असून बंदरांमध्ये माल पडून आहे. यामुळे उत्पादनावर विपरीत परिणाम होत आहे.

• गॅस पुरवठा ठप्प: फॅब्रिकेशन, पावडर कोटिंग आणि सीडी कोटिंगसाठी लागणाऱ्या एलपीजी गॅसचा पुरवठा सध्या बंद आहे. यामुळे दररोज कोट्यवधी रुपयांचे नुकसान होत आहे.

• आर्थिक कोंडी: जीएसटी, नोटाबंदी आणि कोरोनाच्या संकटातून सावरत असतानाच आता युद्धाच्या पार्श्वभूमीवर इंधन दरवाढ आणि तुटवड्यामुळे लघुउद्योजकांचे बँकांचे हप्ते थकण्याची भीती निर्माण झाली आहे.

संघटनेचे सचिव जयंत कड आणि उपाध्यक्ष संजय जगताप यांनी या पत्रकार परिषदेच्या माध्यमातून पंतप्रधान नरेंद्र मोदी आणि राज्याचे मुख्यमंत्री देवेंद्र फडणवीस यांना साकडे घातले आहे. “उद्योजक आणि लाखो कामगारांचे कुटुंब वाचवण्यासाठी केंद्र व राज्याने तातडीने हस्तक्षेप करावा आणि औद्योगिक गॅसचा राखीव कोटा मंजूर करावा,” अशी मागणी यावेळी करण्यात आली.

पिंपरी-चिंचवडसह तळेगाव, चाकण आणि रांजणगाव येथील लघु उद्योजक प्रामुख्याने बजाज, महिंद्रा, थरमॅक्स यांसारख्या मोठ्या ऑटोमोबाईल कंपन्यांचे व्हेंडर आहेत. लघु उद्योगांचे उत्पादन थांबल्यास याचा परिणाम मोठ्या कंपन्यांच्या ‘असेंब्ली लाईन’वर देखील होऊन संपूर्ण औद्योगिक चक्र थांबण्याची शक्यता संचालक संजय सातव यांनी व्यक्त केली.

या पत्रकार परिषदेला माजी अध्यक्ष तात्या सपकाळ, संचालक संजय सातव आणि संघटनेचे इतर प्रमुख पदाधिकारी उपस्थित होते.

© २०२६ मॅक्स मंथन डेली न्यूज. सर्व हक्क राखीव।