पीसीएमसी स्थायी समितीचा मोठा निर्णय! नवीन मालमत्ता शोधणाऱ्या महिलांना मिळणार विशेष मानधन; पाणीपुरवठा आणि पायाभूत सुविधांच्या कामांना कोट्यवधींची मंजुरी

पिंपरी प्रतिनिधी आकाश कांबळे, ११ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या स्थायी समितीच्या बैठकीत आज शहराच्या विकासाच्या दृष्टीने अनेक महत्त्वाचे निर्णय घेण्यात आले. अध्यक्ष अभिषेक बारणे यांच्या अध्यक्षतेखाली झालेल्या या बैठकीत मालमत्ता कराचे संकलन वाढवण्यासाठी ‘नवीन मालमत्ता’ शोधून देणाऱ्या महिला बचत गटांना विशेष मानधन देण्याच्या उपसूचनेला मंजुरी देण्यात आली. तसेच शहराचा पाणीपुरवठा सक्षम करण्यासाठी ‘भामा आसखेड’ प्रकल्पातील अडथळे दूर करण्यासह विविध विकासकामांना हिरवा कंदील दाखवण्यात आला.

या बैठकीस आयुक्त श्रावण हर्डीकर, अतिरिक्त आयुक्त विजयकुमार खोराटे, तृप्ती सांडभोर, विक्रांत बगाडे आणि नगरसचिव मुकेश कोळप उपस्थित होते.

• मालमत्ता कर प्रोत्साहन: महापालिका हद्दीतील मालमत्ता कराची बिले वाटप करणाऱ्या महिलांनी जर कर जाळ्याबाहेरील नवीन मालमत्ता शोधून काढल्या, तर त्यांना कर संकलन विभागाच्या मंजूर दराने अतिरिक्त मानधन दिले जाणार आहे.

• लाडकी बहीण योजना: ‘मुख्यमंत्री – माझी लाडकी बहीण’ योजनेचे अर्ज भरून घेणाऱ्या महिला आर्थिक विकास महामंडळाच्या बचत गटांतील महिलांना जुलै ते सप्टेंबर २०२४ या कालावधीतील प्रोत्साहन भत्ता अदा करण्याच्या विषयासही मान्यता देण्यात आली.

बैठकीत पाणीपुरवठा विभागाच्या अनेक प्रलंबित कामांना गती देण्यात आली:

१. भामा आसखेड प्रकल्प: अशुद्ध जलउपसा केंद्र ते चिखली जलशुद्धीकरण केंद्रापर्यंत जलवाहिनी टाकताना अडथळा ठरणारे उच्चदाब खांब आणि तारांचे स्थलांतर करण्यास मंजुरी देण्यात आली.

२. नवीन पाईपलाईन: घरकुल ते जाधववाडी पंप हाऊस आणि कुदळवाडी एसटीपी ते लक्ष्मी चौक (देहू-आळंदी रोड) दरम्यान नवीन पाईपलाईन टाकली जाणार आहे.

३. स्वच्छता: मनपा शाळा, दवाखाने आणि कार्यालयांमधील पाण्याच्या टाक्यांची शास्त्रोक्त पद्धतीने साफसफाई केली जाईल.

• शहर सुशोभीकरण: प्रभाग १ आणि १२ मधील प्रमुख चौक व कमानींचे सुशोभीकरण केले जाणार आहे.

• विद्युत व्यवस्था: काळेवाडी, प्रभाग १६, १७ मधील पथदिव्यांची दुरुस्ती, तसेच भक्ती-शक्ती चौकातील बस टर्मिनल येथे ईव्ही (EV) चार्जिंग स्टेशन उभारले जाईल.

• स्मशानभूमी देखभाल: निगडी, दापोडी, दिघी आणि चिंचवड येथील मुस्लिम, ख्रिश्चन व लिंगायत दफनभूमींच्या काळजीवाहक संस्थांना मुदतवाढ देण्यात आली आहे.

• जनित्र संच (Generators): यमुनानगर रुग्णालय आणि निगडी अमरधाम स्मशानभूमी येथे नवीन जनरेटर संच बसवले जातील.

या बैठकीत ‘स्व. यशवंतराव चव्हाण स्मारक समिती’ला अनुदान देण्याच्या महत्त्वपूर्ण उपसूचनेलाही मंजुरी देण्यात आली, तसेच नगररचना आणि नगरसचिव विभागातील कर्मचाऱ्यांच्या खर्चांना प्रशासकीय मान्यता देण्यात आली.

© २०२६ मॅक्स मंथन डेली न्यूज. सर्व हक्क राखीव।