संघटन बळकटीसाठी संस्था व्यवस्थापन कार्यशाळा मार्गदर्शक ठरली; बडनेरा येथे महिलांचा उत्स्फूर्त प्रतिसाद

बडनेरा,अमरावती, २५ एप्रिल २०२६ मॅक्स मंथन डेली न्यूज:

बडनेरा: नवी वस्ती, बडनेरा येथील सिद्धार्थ बुद्ध विहार येथे DAY-NULM अंतर्गत आयोजित ‘संस्था व्यवस्थापन कार्यशाळा’ नुकतीच उत्साहात संपन्न झाली. या कार्यशाळेच्या माध्यमातून महिलांचे संघटन अधिक बळकट करण्यासाठी आणि त्यांना स्वावलंबी बनवण्यासाठी मोलाचे मार्गदर्शन करण्यात आले.

वसुंधरा शहरस्तर संघ, अमरावती यांच्या अध्यक्षा सुजाताताई गणेश यांच्या अध्यक्षतेखाली ही कार्यशाळा पार पडली. यावेळी शहर अभियान व्यवस्थापक भूषण बाळे आणि प्रफुल ठाकरे यांनी संस्थेचे प्रभावी व्यवस्थापन, संघटन कौशल्य, आर्थिक शिस्त आणि विविध शासकीय योजनांचा लाभ कसा मिळवावा, यावर सखोल मार्गदर्शन केले.

या कार्यशाळेत आदर्श, संघिणी, जनसेवा, लोकसेवा, नवनिर्माण, बुद्धछाया, आधार, सौमित्र, सावित्री, संकल्प, नारीशक्ती, संविधान आणि सहेली यांसारख्या विविध वस्तीस्तर संघांच्या पदाधिकाऱ्यांनी मोठ्या संख्येने उपस्थित राहून प्रशिक्षणाचा लाभ घेतला. समुदाय संसाधन व्यक्ती (CRP) म्हणून किरण दुपारे, जयश्री गडेकर, योगिता वडुरकर यांच्यासह अनेक सदस्यांनी सक्रिय सहभाग नोंदविला.

कार्यशाळेत प्रामुख्याने खालील विषयांवर भर देण्यात आला:

• संघ नोंदणी प्रक्रिया: कायदेशीर बाबी आणि नोंदणीचे महत्त्व.

• आर्थिक व्यवस्थापन: बैठकींचे नियोजन, लेखा व्यवस्थापन आणि बचत गटांचे सशक्तीकरण.

• स्वावलंबन: उपजीविकेच्या नव्या संधी निर्माण करणे.

सहभागी महिलांनी आपल्या कामकाजात येणाऱ्या अडचणी मांडल्या, ज्यावर तज्ज्ञांकडून समाधानकारक तोडगा सुचवण्यात आला.

“महिलांचे सशक्तीकरण हे सक्षम आणि संघटित संस्थांमधूनच साध्य होऊ शकते. वस्तीस्तर संघांनी एकजुटीने कार्य केल्यास समाजात सकारात्मक बदल घडवता येतो,” असे मत अध्यक्षा सुजाताताई गणेश यांनी आपल्या अध्यक्षीय मनोगतात व्यक्त केले.

कार्यक्रमाचे प्रास्ताविक प्राजक्ता गोबरे यांनी केले, सूत्रसंचालन उमा इंगोले यांनी तर आभारप्रदर्शन किरण दुपारे यांनी केले. या कार्यशाळेमुळे महिलांमध्ये नवा आत्मविश्वास निर्माण झाला असून, भविष्यात अधिक विस्तृत प्रशिक्षण कार्यक्रम राबविण्याचा निर्धार यावेळी व्यक्त करण्यात आला.

© २०२६ मॅक्स मंथन डेली न्यूज. सर्व हक्क राखीव.