थेरगावमध्ये लाडशाखीय वाणी समाजाचा उपवर-वधू मेळावा उत्साहात! २७०० समाजबांधवांची उपस्थिती; ९८० उपवर-वधूंचा परिचय आणि पुस्तिकेचे प्रकाशन

थेरगाव प्रतिनिधी :बालाजी नवले, २४ मार्च २०२६ | मॅक्स मंथन विशेष:

थेरगाव : अखिल भारतीय लाडशाखीय वाणी समाजातर्फे आयोजित करण्यात आलेले भव्य ‘उपवर-वधू परिचय संमेलन २०२६’ शनिवारी (२१ मार्च) थेरगाव येथील स्व. शंकर अण्णा गावडे स्मृती कामगार भवन येथे अत्यंत शिस्तबद्ध वातावरणात पार पडले. या संमेलनाला संपूर्ण महाराष्ट्रातून सुमारे २७०० समाजबांधवांनी उपस्थिती लावली, ज्यात ९८० उपवर आणि उपवधूंचा समावेश होता.

कार्यक्रमाचे उद्घाटन मावळ लोकसभेचे खासदार श्रीरंग आप्पा बारणे आणि भाजप शहराध्यक्ष शत्रुघ्न बापू काटे यांच्या हस्ते दीपप्रज्वलनाने करण्यात आले.

संमेलनाचे प्रमुख मार्गदर्शक मनोज ब्राह्मणकार आणि राजेंद्र महालपुरे यांच्या अध्यक्षतेखाली झालेल्या या कार्यक्रमात लग्नाळू तरुण-तरुणींना आपले विचार मांडण्यासाठी व्यासपीठ उपलब्ध करून देण्यात आले. यावेळी मान्यवरांनी मार्गदर्शन करताना सांगितले की, “पारंपारिक विवाह पद्धतीसोबतच आधुनिक विचारांची सांगड घालणे आजच्या काळाची गरज आहे.” वाढते घटस्फोट आणि समाजाबाहेरील विवाह यांसारख्या गंभीर विषयांवरही यावेळी चिंतन करण्यात आले.

याप्रसंगी सुमारे ९५० परिचय पत्रकांचा समावेश असलेल्या माहिती पुस्तिकेचे प्रकाशन मान्यवरांच्या हस्ते करण्यात आले.

• ओळख सत्र: प्रत्येक वधू-वराला स्वतःची ओळख आणि अपेक्षा सांगण्याची संधी देण्यात आली.

• परस्पर संवाद: पालक आणि मुलांसाठी सविस्तर चर्चेसाठी स्वतंत्र वेळ आणि जागा उपलब्ध करून देण्यात आली होती.

• गुरुजींची सोय: कुंडली गुणमिलनासाठी अनुभवी गुरुजींची व्यवस्था जागेवरच करण्यात आली होती.

यावेळी नगरसेविका सौ. कुंदाताई भिसे, सौ. अनिताताई काटे, नगरसेवक माऊलीशेठ जगताप यांच्यासह समाजातील प्रतिष्ठित नागरिक मोठ्या संख्येने उपस्थित होते.

संमेलनाच्या यशस्वीतेसाठी कार्याध्यक्ष नितीन देव, उपाध्यक्ष योगेश मोराणकर, नितीन वाणी, सोपान पितृभक्त, सनी शिरोडे, तैलेश बामणकर आणि किशोर ब्राह्मणकर यांनी विशेष परिश्रम घेतले. कार्यक्रमाचे नेटके सूत्रसंचालन सौ. रत्ना दहिवेलकर यांनी केले, तर भामरे सर यांनी उपस्थितांचे आभार मानले.

© २०२६ मॅक्स मंथन डेली न्यूज. सर्व हक्क राखीव।