प्रशासकीय कामाला मिळणार गती; पिंपरी-चिंचवड महापालिकेतील रिक्त पदे तातडीने भरण्याचे महापौर रवि लांडगे यांचे निर्देश

पिंपरी चिंचवड प्रतिनिधी बालाजी नवले, दिनांक: ०८ एप्रिल २०२६,मॅक्स मंथन डेली न्यूज:

पिंपरी: पिंपरी-चिंचवड महानगरपालिकेच्या विविध विभागांतील अधिकारी व कर्मचाऱ्यांच्या सेवानिवृत्तीमुळे रिक्त होत असलेल्या पदांचा प्रश्न आता मार्गी लागणार आहे. शहराचा वाढता विस्तार आणि लोकसंख्या विचारात घेता, नागरी सेवांवर याचा परिणाम होऊ नये यासाठी महापौर रवि लांडगे यांनी रिक्त पदे तातडीने भरण्याचे आदेश प्रशासनाला दिले आहेत.

महापालिकेच्या अनेक महत्त्वाच्या विभागांमध्ये सध्या मनुष्यबळाची कमतरता भासत आहे. अनेक अनुभवी अधिकारी निवृत्त झाल्याने कामाचा ताण वाढला असून, याचा फटका प्रत्यक्ष नागरी सुविधांना बसण्याची शक्यता आहे. ही बाब गांभीर्याने घेत महापौरांनी सर्व विभागप्रमुखांना सध्याची रिक्त पदे आणि आगामी काळात रिक्त होणाऱ्या जागांची सविस्तर माहिती तात्काळ सादर करण्यास सांगितले आहे.

रिक्त पदांच्या भरतीसाठी आवश्यक ते प्रस्ताव राज्य शासनाकडे पाठवून त्यास लवकरात लवकर मंजुरी मिळवण्यासाठी प्रशासनाने पाठपुरावा करावा, असेही महापौरांनी स्पष्ट केले आहे. महापालिका स्तरावर या प्रक्रियेत कोणताही तांत्रिक विलंब होऊ नये, यासाठी महापौर कार्यालय स्वतः या संपूर्ण प्रक्रियेवर नियमित लक्ष ठेवून राहणार आहे.

शहरात सुरू असलेले विविध विकासप्रकल्प आणि वाढती लोकसंख्या पाहता, प्रशासकीय यंत्रणा सक्षम असणे आवश्यक आहे. नवीन भरतीमुळे प्रशासनात नवी ऊर्जा येईल आणि नागरिकांची कामे अधिक वेगाने होतील, अशी अपेक्षा व्यक्त केली जात आहे.

मा. महापौर

“शहराचा झपाट्याने होत असलेला विकास आणि वाढती लोकसंख्या लक्षात घेता सक्षम प्रशासन ही काळाची गरज आहे. रिक्त पदांमुळे नागरिक सेवेत कोणताही अडथळा निर्माण होऊ नये, यासाठी आवश्यक त्या सर्व पदांची भरती तातडीने करण्यात यावी. तसेच या प्रक्रियेत कोणताही विलंब न होता शासनाकडे प्रस्ताव सादर करून मंजुरी मिळवावी, यावर महापालिकेने प्राधान्याने कार्यवाही करावी.”

— महापौर रवि लांडगे

© २०२६ मॅक्स मंथन डेली न्यूज. सर्व हक्क राखीव.