पिंपळे सौदागरच्या शिरपेचात मानाचा तुरा! कु. रुग्वेद शेवाळेची ‘सैनिक शाळे’कडे झेप; शत्रुघ्न काटे यांच्या हस्ते यथोचित गौरव
पिंपरी चिंचवड प्रतिनिधी लक्ष्मण प्रधान, १३ एप्रिल २०२६ मॅक्स मंथन डेली न्यूज:
पिंपरी: जिद्द, चिकाटी आणि कठोर परिश्रमाच्या जोरावर पिंपळे सौदागर येथील अवघ्या एका बालकाने यशाचे उत्तुंग शिखर सर केले आहे. ‘साई वैभव’ (सेव्हन स्टार लेन) येथील कु. रुग्वेद शशिकांत शेवाळे याने अत्यंत कठीण समजली जाणारी ‘सैनिक शाळा प्रवेश परीक्षा २०२६’ पहिल्याच प्रयत्नात उत्तीर्ण होऊन तामिळनाडूतील अमरावतीनगर येथील सैनिक शाळेत आपले स्थान निश्चित केले आहे.
रुग्वेदच्या या गौरवशाली यशाबद्दल भाजप शहराध्यक्ष व नगरसेवक श्री. शत्रुघ्न (बापू) काटे यांच्या हस्ते त्याला सन्मानचिन्ह देऊन गौरविण्यात आले.
देशभरातून जवळपास २ लाख विद्यार्थ्यांनी ही परीक्षा दिली होती. त्यामधून रुग्वेदने केवळ लेखी परीक्षाच नव्हे, तर अत्यंत कठीण समजली जाणारी वैद्यकीय चाचणीही यशस्वीरीत्या पार केली. विशेष म्हणजे, त्याने केवळ सैनिक शाळाच नाही, तर जवाहर नवोदय विद्यालय आणि राष्ट्रीय मिलिटरी स्कूल या दोन्ही प्रतिष्ठित शाळांच्या प्रवेशासाठीही पात्रता सिद्ध करत यशाची ‘हॅट्ट्रिक’ साधली आहे.
या प्रसंगी बोलताना श्री. शत्रुघ्न काटे म्हणाले की, “आजच्या पिढीतील मुलांनी देशसेवेचे स्वप्न उराशी बाळगून अशा स्पर्धात्मक परीक्षांमध्ये यश मिळवणे, ही संपूर्ण पिंपरी-चिंचवड शहरासाठी अभिमानाची गोष्ट आहे. रुग्वेदने केवळ शेवाळे परिवाराचेच नव्हे, तर आपल्या परिसराचे नाव राष्ट्रीय पातळीवर पोहोचवले आहे. भविष्यात रुग्वेद एक उत्तम लष्करी अधिकारी बनून देशाची सेवा करेल, असा मला ठाम विश्वास आहे.”
या सोहळ्याला श्री. शशिकांत शेवाळे व शेवाळे परिवार तसेच परिसरातील नागरिक मोठ्या संख्येने उपस्थित होते. रुग्वेदच्या या अभूतपूर्व यशाचे सर्वत्र कौतुक होत असून, त्याने आपल्या कर्तृत्वाने इतर विद्यार्थ्यांसमोर एक नवा आदर्श निर्माण केला आहे.
© २०२६ मॅक्स मंथन डेली न्यूज. सर्व हक्क राखीव.
