‘सारथी’ नागरिक सेवा प्रणाली अधिक सक्षम करण्यासाठी महापौर रवि लांडगे यांचे कडक निर्देश

पिंपरी चिंचवड प्रतिनिधी लक्ष्मण प्रधान , १७ मे २०२६ मॅक्स मंथन डेली न्यूज:

पिंपरी: पिंपरी-चिंचवड महानगरपालिकेची ‘सारथी’ ही डिजिटल नागरिक सेवा प्रणाली अधिक कार्यक्षम, पारदर्शक आणि परिणामकारक करण्यासाठी महापौर रवि लांडगे यांनी प्रशासनाला कडक निर्देश दिले आहेत. नागरिकांच्या तक्रारींचे केवळ निवारण न होता ते समाधानकारक व्हावे, यासाठी आता अद्ययावत ‘सारथी २.०’ विकसित करण्याचा निर्णय घेण्यात आला आहे.

महापौरांनी आयुक्तांना पाठविलेल्या पत्रात सद्यस्थितीतील त्रुटींवर बोट ठेवले आहे. तक्रारींचे विलंबाने होणारे वर्गीकरण, प्रणालीमध्ये ‘Resolved’ दिसणारी स्थिती आणि प्रत्यक्षात प्रलंबित कामे, तसेच मोबाईल ॲपमधील तांत्रिक त्रुटी यांमुळे नागरिकांची गैरसोय होत असल्याचे त्यांनी नमूद केले.

प्रणाली अधिक सक्षम करण्यासाठी महापौरांनी खालील उपाययोजना सुचविल्या आहेत:

• थेट पडताळणी: तक्रार ‘सोडवली’ (Resolved) असे जाहीर करण्यापूर्वी प्रत्यक्ष क्षेत्रावर जाऊन (Field Verification) पडताळणी करणे अनिवार्य असेल.

• स्वयंचलित प्रणाली: तक्रारींचे वर्गीकरण आणि संबंधित विभागाकडे पाठविण्याची प्रक्रिया स्वयंचलित असावी.

• मूळ कारण विश्लेषण (RCA): केवळ वरवरची मलमपट्टी न करता तक्रारींच्या मुळाशी जाऊन कायमस्वरूपी उपाययोजना कराव्यात.

• अधिकारी माहिती: प्रत्येक विभागातील जबाबदार अधिकाऱ्यांची माहिती प्रणालीत समाविष्ट करावी.

• डेटा सुरक्षा: नागरिकांच्या माहितीची सुरक्षा आणि ‘डिझास्टर रिकव्हरी’ प्रणाली अधिक मजबूत करणे.

नव्याने विकसित होणाऱ्या या प्लॅटफॉर्ममध्ये AI (कृत्रिम बुद्धिमत्ता) आधारित तक्रार वर्गीकरण, चॅटबॉट (Chatbot) आणि प्रेडिक्टिव ॲनालिटिक्स यांसारख्या आधुनिक सुविधांचा समावेश असेल. यासाठी महापौरांनी प्रशासनाला ३० दिवसांत कृती आराखडा आणि ६० दिवसांत सुधारित प्रणालीचा रोडमॅप सादर करण्यास सांगितले आहे.

याबाबत बोलताना महापौर रवि लांडगे म्हणाले, “सारथी ही केवळ तक्रार नोंदणीची जागा नसून, तो नागरिक आणि प्रशासन यांच्यातील विश्वासाचा दुवा आहे. तंत्रज्ञानाचा वापर करून नागरिकांना जलद आणि पारदर्शक सेवा देणे हेच महापालिकेचे मुख्य उद्दिष्ट आहे.”

या निर्णयामुळे पिंपरी-चिंचवडकर नागरिकांना भविष्यात अधिक दर्जेदार आणि स्मार्ट सेवा मिळण्याचा मार्ग मोकळा झाला आहे.

© २०२६ मॅक्स मंथन डेली न्यूज. सर्व हक्क राखीव.