मोशीत विद्यार्थिनींच्या पुढाकारातून साकारला ‘शून्य कचरा’ वर्ग! साध्या कचऱ्यापासून खतनिर्मितीचा स्तुत्य उपक्रम

पिंपरी चिंचवड प्रतिनिधी लक्ष्मण प्रधान, १७ एप्रिल २०२६ मॅक्स मंथन डेली न्यूज:

मोशी: “कचरा ही समस्या नसून ते एक संसाधन आहे,” हा विचार प्रत्यक्षात उतरवत मोशी येथील सावित्रीबाई फुले प्राथमिक कन्या शाळा क्रमांक १०७ मधील विद्यार्थिनींनी आपल्या वर्गाला ‘शून्य कचरा वर्ग’ (Zero Waste Class) म्हणून विकसित केले आहे. इयत्ता सहावी ‘ब’ च्या विद्यार्थिनींनी राबविलेला हा उपक्रम शहरासाठी आदर्श ठरत आहे.

पिंपरी चिंचवड महानगरपालिका महापौर रवि लांडगे, आयुक्त डॉ. विजय सूर्यवंशी आणि शिक्षण विभागाच्या मार्गदर्शनाखाली शहरात राबविण्यात येत असलेल्या शून्य कचरा प्रकल्पाला या शाळेत उत्स्फूर्त प्रतिसाद मिळत आहे.

या अभिनव उपक्रमांतर्गत वर्गातील ४५ विद्यार्थिनींनी कचरा व्यवस्थापनाची जबाबदारी स्वतःच्या खांद्यावर घेतली आहे. वर्गातील कचरा कमी करण्यासाठी खालील उपाययोजना केल्या जात आहेत:

• पुनर्वापर: प्लास्टिक आणि कागदाचा अपव्यय टाळून, फाटलेले कागद पुनर्वापरासाठी स्वतंत्र बॉक्समध्ये साठवले जातात.

• कचऱ्यापासून खत: पेन्सिलचा कचरा एका वेगळ्या बरणीत गोळा केला जातो. या कचऱ्यापासून खत तयार करून ते शाळेतील झाडांना घातले जाते.

• वर्गीकरण: घातक कचरा आणि सुका कचरा यासाठी स्वतंत्र व्यवस्था करण्यात आली आहे.

वर्गातील शिस्त आणि स्वच्छतेवर देखरेख ठेवण्यासाठी अवनी पेंडसे, तन्वी येंधे आणि शैलजा सोनकांबळे या तीन ‘स्वच्छता मॉनिटर’ची नियुक्ती करण्यात आली आहे. या विद्यार्थिनी इतर सहकाऱ्यांना कचरा व्यवस्थापनाबाबत मार्गदर्शन करत आहेत.

हा उपक्रम यशस्वी करण्यासाठी मोशी विभागाच्या पर्यवेक्षिका सुनीता गीते, मुख्याध्यापिका सुरेखा डांगे आणि वर्गशिक्षक संतोष अरुण पन्हाळे यांचे विशेष नेतृत्व लाभले आहे. तसेच प्रकल्पाच्या समन्वयक अर्चना मोरे यांनी विद्यार्थिनींना तांत्रिक मार्गदर्शन केले आहे.

कचरा कमी करणे आणि पुनर्वापर करणे ही सवय शालेय वयातच रुजल्यामुळे या विद्यार्थिनी भविष्यात पर्यावरणदूत म्हणून ओळखल्या जातील, असा विश्वास शाळा प्रशासनाने व्यक्त केला आहे.

© २०२६ मॅक्स मंथन डेली न्यूज. सर्व हक्क राखीव.