पिंपरी-चिंचवडकरांसाठी खूशखबर! मालमत्ता करात भरघोस सवलती जाहीर; ३० जूनपूर्वी कर भरण्याचे आवाहन

पिंपरी चिंचवड प्रतिनिधी आकाश कांबळे, १७ एप्रिल २०२६ मॅक्स मंथन डेली न्यूज:

पिंपरी: पिंपरी चिंचवड महानगरपालिकेच्या कर आकारणी व कर संकलन विभागाने सन २०२६-२७ या नवीन आर्थिक वर्षासाठी मालमत्ताधारकांना मोठा आर्थिक दिलासा दिला आहे. महानगरपालिकेने एकूण १६ प्रकारच्या सवलती जाहीर केल्या असून, नागरिकांनी ३० जून २०२६ पूर्वी आपल्या मालमत्ता कराचा भरणा केल्यास या सवलतींचा लाभ घेता येणार आहे.

शहराच्या सर्वांगीण विकासासाठी निधी उपलब्ध व्हावा आणि करदात्यांना प्रोत्साहन मिळावे, या दुहेरी उद्देशाने या योजना राबविण्यात येत आहेत. डिजिटल व्यवहारांना चालना देण्यासाठी ऑनलाइन कर भरणाऱ्यांना विशेष सवलत देण्यात आली आहे.

याव्यतिरिक्त शैक्षणिक संस्थांनी सौर ऊर्जा, रेन वॉटर हार्वेस्टिंग आणि झिरो वेस्ट उपक्रम राबविल्यास त्यांना ४% ते १०% पर्यंत विशेष सवलती दिल्या जाणार आहेत.

महानगरपालिका सध्या शहरात रस्ते विकास, पाणीपुरवठा, स्वच्छता आणि आरोग्य सुविधांची मोठी कामे करत आहे. या विकासकामांना गती देण्यासाठी कर संकलन हा कणा आहे. नागरिकांनी घरबसल्या सुलभ आणि पारदर्शक पद्धतीने ऑनलाइन कर भरून आपल्या वेळेची बचत करावी आणि सवलतींचा फायदा घ्यावा, असे आवाहन प्रशासनामार्फत करण्यात आले आहे.

“शहराच्या प्रगतीमध्ये करदात्यांचे योगदान मोलाचे आहे. रस्ते, पाणी आणि आरोग्य सुविधा सक्षम करण्यासाठी नियमित कर संकलन आवश्यक आहे. नागरिकांनी सुलभ अशा ऑनलाइन प्रक्रियेचा अवलंब करून सवलतींचा लाभ घ्यावा आणि शहराच्या विकासात सक्रिय सहभाग नोंदवावा.”

– रवि लांडगे, महापौर, पिंपरी चिंचवड महापालिका

“करदात्यांना प्रोत्साहन देण्यासाठी यंदा विविध सवलतींची व्याप्ती वाढवली आहे. ३० जून ही सवलतीचा लाभ घेण्याची अंतिम मुदत आहे. वेळेत कर भरल्यामुळे नागरिकांचा आर्थिक फायदा होईलच, पण महापालिकेला अधिक दर्जेदार सेवा देणेही शक्य होईल.”

– सचिन पवार, उपायुक्त, पिंपरी चिंचवड महापालिका

© २०२६ मॅक्स मंथन डेली न्यूज. सर्व हक्क राखीव.