दिव्यांग विद्यार्थ्यांच्या सर्वांगीण विकासासाठी महापालिकेचे विविध उपक्रम राबवण्यास प्राधान्य देणार – महापौर रवि लांडगे
पिंपरी चिंचवड प्रतिनिधी बालाजी नवले, १७ एप्रिल २०२६ मॅक्स मंथन डेली न्यूज:
भोसरी: “दिव्यांग मुलांना जर योग्य संधी, प्रशिक्षण आणि प्रोत्साहन मिळाले, तर ही मुले प्रत्येक क्षेत्रात उल्लेखनीय यश संपादन करू शकतात. त्यांच्यातील जिद्द आणि चिकाटीला व्यासपीठ मिळवून देण्यासाठी पिंपरी चिंचवड महानगरपालिका नेहमीच कटिबद्ध आहे. या क्रीडा स्पर्धा केवळ खेळापुरत्या मर्यादित नसून, त्या दिव्यांगांच्या आत्मविश्वासाला नवी भरारी देणाऱ्या आहेत,” असे प्रतिपादन महापौर रवि लांडगे यांनी केले.
पिंपरी चिंचवड महानगरपालिकेतर्फे इंद्रायणी नगर येथील संत ज्ञानेश्वर महाराज क्रीडा संकुल येथे मतिमंद व दिव्यांग विद्यार्थ्यांच्या विविध क्रीडा स्पर्धा २०२६-२७ चे आयोजन करण्यात आले आहे. या स्पर्धांचे शानदार उद्घाटन महापौर रवि लांडगे यांच्या हस्ते पार पडले.
कार्यक्रमाची सुरुवात दिव्यांग खेळाडूंच्या हस्ते करण्यात आलेल्या मैदान पूजनाने झाली. यावेळी उपमहापौर शर्मिला बाबर, विरोधी पक्षनेते भाऊसाहेब भोईर, क्रीडा, कला, साहित्य व सांस्कृतिक समितीचे सभापती कैलास कुटे, नगरसदस्य तुषार सहाणे, उपायुक्त पंकज पाटील आणि जनता संपर्क अधिकारी प्रफुल्ल पुराणिक उपस्थित होते.
या क्रीडा स्पर्धांमध्ये धावणे, गोळाफेक, लांब उडी, सॉफ्ट बॉल यांसह विविध मैदानी खेळांचा समावेश करण्यात आला आहे. शहराच्या विविध भागांतून आलेल्या दिव्यांग व मतिमंद विद्यार्थ्यांनी अत्यंत उत्साहाने आणि जिद्दीने या स्पर्धांमध्ये सहभाग नोंदवला.
महापौर पुढे म्हणाले, “क्रीडा स्पर्धांच्या माध्यमातून या मुलांच्या अंगी असलेली क्रीडा कौशल्ये जगासमोर येतात. संकुलातील आनंद आणि उत्साह पाहून या मुलांच्या क्षमतेची प्रचिती येत आहे. भविष्यात अशा स्पर्धांचे आयोजन अधिक व्यापक स्वरूपात करून दिव्यांगांना मुख्य प्रवाहात आणण्यासाठी महापालिका विविध योजना राबवेल.”
कार्यक्रमाचे प्रास्ताविक उपायुक्त पंकज पाटील यांनी केले, तर सूत्रसंचालन आणि आभार प्रदर्शन प्रफुल्ल पुराणिक यांनी केले. या सोहळ्यासाठी विविध शाळांचे शिक्षक, प्रशिक्षक आणि नागरिक मोठ्या संख्येने उपस्थित होते. क्रीडा संकुलात पसरलेल्या सकारात्मक ऊर्जेने उपस्थित प्रेक्षकांचीही मने जिंकली.
© २०२६ मॅक्स मंथन डेली न्यूज. सर्व हक्क राखीव.
