पर्यटन क्षेत्रात ‘महिला राज’! ‘आई’ धोरणातून जिल्ह्यात १६० महिला होणार आत्मनिर्भर

अमरावती, प्रतिनिधी विलास सावळे , १७ मे २०२६ मॅक्स मंथन डेली न्यूज:

अमरावती: पर्यटन क्षेत्रात महिलांचा सहभाग वाढवून त्यांना नेतृत्व आणि उद्योजकतेच्या संधी उपलब्ध करून देण्यासाठी महाराष्ट्र शासनाच्या पर्यटन संचालनालयामार्फत ‘आई’ हे महिला केंद्रित पर्यटन धोरण प्रभावीपणे राबविण्यात येत आहे. या धोरणांतर्गत अमरावती जिल्ह्यातील सुमारे १६० महिलांनी हॉटेल, होमस्टे आणि वेलनेस सेंटर्स यांसारख्या विविध व्यवसायांसाठी आपली नोंदणी पूर्ण केली आहे.

महिलांना आर्थिकदृष्ट्या सक्षम करण्यासाठी या धोरणांतर्गत विशेष पंचसुत्री आणि आर्थिक सवलती जाहीर करण्यात आल्या आहेत.

या धोरणाचे सर्वात मोठे आकर्षण म्हणजे महिला उद्योजकांना मिळणारा आर्थिक आधार. पर्यटन व्यवसायासाठी महिलांनी मान्यताप्राप्त बँकांकडून १५ लाख रुपयांपर्यंत कर्ज घेतल्यास, त्यावरील १२ टक्क्यांपर्यंतच्या व्याजाचा परतावा पर्यटन संचालनालयामार्फत थेट लाभार्थ्याच्या बँक खात्यात जमा केला जातो. हा लाभ ७ वर्षांच्या कालावधीसाठी किंवा व्याजाची रक्कम ५ लाख रुपये पूर्ण होईपर्यंत लागू राहील.

या योजनेअंतर्गत सुमारे ३० प्रकारचे व्यवसाय पात्र आहेत, ज्यात प्रामुख्याने:

• होम स्टे, रिसॉर्ट आणि हॉटेल.

• कृषी पर्यटन केंद्र आणि साहसी पर्यटन.

• ट्रॅव्हल एजन्सी आणि टूर ऑपरेटर.

• आयुर्वेद, योग केंद्र आणि वेलनेस सेंटर.

• हस्तकला दुकाने आणि आदिवासी निसर्ग पर्यटन प्रकल्प.

योजनेच्या अटी व शर्ती:

• व्यवसायाची मालकी पूर्णपणे महिलेकडे असणे अनिवार्य आहे.

• संबंधित व्यवसाय पर्यटन संचालनालयाकडे नोंदणीकृत असावा.

• हॉटेल किंवा ट्रॅव्हल एजन्सीमध्ये ५० टक्के व्यवस्थापकीय व इतर कर्मचारी महिला असणे बंधनकारक आहे.

• कर्जाचे हप्ते वेळेत भरणे आवश्यक आहे.

इच्छुक महिला उद्योजकांनी पर्यटन विभागाच्या अधिकृत संकेतस्थळावर (www.maharashtratourism.gov.in) ऑनलाईन नोंदणी करणे आवश्यक आहे. अर्जासोबत पॅन कार्ड, ओळखपत्र, बँक पासबुक, जागेचा पुरावा आणि प्रकल्पाची संक्षिप्त माहिती यांसारखी कागदपत्रे अपलोड करावी लागतील.

या क्रांतीकारी धोरणामुळे राज्यातील महिलांना केवळ रोजगाराच्या संधीच मिळत नसून, पर्यटन क्षेत्राच्या विकासामध्ये त्यांचा सक्रिय वाटा निश्चित होत आहे. अधिक माहितीसाठी अमरावती येथील पर्यटन उपसंचालक कार्यालयाशी संपर्क साधण्याचे आवाहन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.