प्रशासकीय सहकार्यानंतर पुणे जिल्ह्यातील आरएमसी (RMC) उद्योग पुन्हा सुरू; आरएमसी असोसिएशनतर्फे कृतज्ञता व्यक्त

पुणे/पिंपरी प्रतिनिधी बालाजी नवले, ९ मे २०२६ मॅक्स मंथन डेली न्यूज:

पुणे: पुणे जिल्ह्यातील रेडी मिक्स काँक्रीट (RMC) उद्योगासमोरील अडचणी सोडवण्यासाठी जिल्हा प्रशासन आणि विविध प्राधिकरणांनी सकारात्मक भूमिका घेतल्याबद्दल पुणे आरएमसी असोसिएशनतर्फे आभार व्यक्त करण्यात आले आहेत. प्रशासनासोबत झालेल्या यशस्वी चर्चेनंतर, पुणे जिल्ह्यातील आरएमसी उद्योग आज, ०९ मे २०२६ पासून पुन्हा सुरू करण्यात येत असल्याची अधिकृत घोषणा असोसिएशनचे अध्यक्ष प्रदीप पोपटराव वाल्हेकर यांनी केली आहे.

पुणे आरएमसी उद्योगासाठी एकसमान आणि व्यवहार्य मानक कार्यपद्धती (SOP) तयार करण्यासाठी जिल्हाधिकारी जितेंद्र दुड्डी, पुणे महापालिका आयुक्त नवल किशोर राम, वाहतूक विभागाचे सहाय्यक पोलीस आयुक्त मनोज पाटील तसेच महाराष्ट्र प्रदूषण नियंत्रण मंडळ (MPCB), पीसीएमसी (PCMC) आणि पीएमआरडीए (PMRDA) या सर्व विभागांनी घेतलेल्या निर्णयांबद्दल असोसिएशनने कृतज्ञता व्यक्त केली आहे.

३०० हून अधिक सदस्यांशी चर्चा केल्यानंतर आजपासून सर्व आरएमसी प्लांट पुन्हा सुरू होतील. प्रशासनाने दिलेल्या नियम व मार्गदर्शक सूचनांचे कडक पालन करण्याचे आश्वासन असोसिएशनने दिले आहे. सुरक्षा आणि पर्यावरण रक्षणासाठी असोसिएशन लवकरच एक टोल-फ्री हेल्पलाइन क्रमांक जाहीर करणार आहे. वाहतूक नियमांचे उल्लंघन, धोकादायक वाहन चालवणे किंवा आरएमसी प्लांटमुळे प्रदूषण होत असल्यास नागरिक या क्रमांकावर तक्रार करू शकतील. जिल्ह्यातील स्थानिक आणि राष्ट्रीय स्तरावरील आरएमसी प्लांट मालकांनी दाखवलेल्या शिस्तबद्धतेबद्दल त्यांचे अभिनंदन करण्यात आले आहे.

काँक्रीट हा जगात पाण्यानंतर सर्वाधिक वापरला जाणारा पदार्थ असून तो ‘perishable’ (लवकर खराब होणारा) आहे. त्यामुळे आरएमसी उद्योग हा शाश्वत बांधकाम क्षेत्राचा अविभाज्य भाग आहे. शाश्वत विकास, पर्यावरण संरक्षण आणि पायाभूत सुविधांच्या विकासासाठी असोसिएशन कटिबद्ध असल्याचे यावेळी स्पष्ट करण्यात आले.

या प्रक्रियेत सहकार्य करणाऱ्या NAREDCO, CREDAI, MBVA, BAI, PESA, CCPA, ICI आणि ISSE यांसारख्या विविध संघटनांचेही विशेष आभार मानण्यात आले आहेत.

© २०२६ मॅक्स मंथन डेली न्यूज. सर्व हक्क राखीव.