औद्योगिकनगरीचा सामाजिक बाणा! पिंपरी-चिंचवडच्या शाश्वत विकासात ‘सीएसआर’चे योगदान महत्त्वपूर्ण; देशपातळीवर आदर्श ठरलेल्या ‘दिव्यांग भवन’साठी उद्योगांनी सढळ हाताने मदत करण्याचे महापौर रवि लांडगे यांचे आवाहन
पिंपरी चिंचवड प्रतिनिधी लक्ष्मण प्रधान , ११ जून २०२६ मॅक्स मंथन डेली न्यूज:
पिंपरी: “पिंपरी-चिंचवड शहराची देशपातळीवरील अत्यंत वेगळी आणि वैशिष्ट्यपूर्ण ओळख ही येथील उत्कृष्ट, आधुनिक पायाभूत नागरी सुविधांमुळे निर्माण झाली आहे. शहराच्या या सर्वांगीण विकासात आणि नागरिकांना जागतिक दर्जाच्या नागरी सुविधा उपलब्ध करून देण्यात औद्योगिक क्षेत्रातील कॉर्पोरेट सोशल रिस्पॉन्सिबिलिटी (CSR) अर्थात उद्योगांच्या सामाजिक दायित्व निधीची भूमिका अत्यंत मोलाची राहिली आहे. शहरातील विविध नामांकित उद्योग समूहांनी नेहमीच आपली सामाजिक बांधिलकी जपली आहे. त्यांच्या आर्थिक व तांत्रिक सहकार्यामुळेच महापालिकेला अनेक महत्त्वाचे लोकाभिमुख उपक्रम आणि लोकोपयोगी विकासकामे यशस्वीपणे राबविता आली आहेत. हाच आदर्श डोळ्यांसमोर ठेवून आगामी काळातही उद्योग समूहांनी शहराच्या शाश्वत विकासासाठी महापालिकेच्या खांद्याला खांदा लावून उस्फूर्तपणे हातभार लावावा,” असे आग्रही आवाहन पिंपरी-चिंचवडचे महापौर रवि लांडगे यांनी केले.
पिंपरी-चिंचवड महानगरपालिकेच्या विशेष ‘सी.एस.आर. कक्ष’ अंतर्गत शहरातील राष्ट्रीय व आंतरराष्ट्रीय कंपन्यांच्या माध्यमातून प्राप्त होणारा सामाजिक दायित्व निधी मिळविणे, तसेच त्याचा अत्यंत सुयोग्य आणि पारदर्शक वापर करून शहराच्या शाश्वत विकासात हातभार लावणे या उद्देशाने मोरवाडी येथील प्रसिद्ध ‘दिव्यांग भवन फाउंडेशन’ येथे एका भव्य संवाद बैठकीचे आयोजन करण्यात आले होते. या बैठकीचे मुख्य मार्गदर्शक म्हणून मनोगत व्यक्त करताना महापौर रवि लांडगे बोलत होते.
या ऐतिहासिक संवाद बैठकीला पिंपरी-चिंचवड मनपाचे वरिष्ठ अधिकारी, लोकप्रतिनिधी आणि शहरातील सर्व मुख्य उद्योग समूहांचे सीएसआर प्रमुख उपस्थित होते. बैठकीला महानगरपालिकेचे कर्तव्यदक्ष महापौर रवि लांडगे, मनपा आयुक्त डॉ. विजय सूर्यवंशी, स्थायी समितीचे कार्यक्षम सभापती अभिषेक बारणे, सह आयुक्त मनोज लोणकर, दिव्यांग भवन फाउंडेशनचे व्यवस्थापकीय संचालक ओमप्रकाश देशमुख, मुख्य कार्यकारी अधिकारी परेश गांधी, जनता संपर्क अधिकारी (PRO) प्रफुल्ल पुराणिक, राष्ट्रीय शिक्षक पुरस्कार विजेते आदर्श शिक्षक वारे गुरुजी, सीएसआर कक्षाचे समन्वयक विजय वावरे आणि श्रुतिका मुंगी उपस्थित होते.
या बैठकीस शहरातील आणि देशातील आघाडीच्या खालील २९ मोठ्या कंपन्यांचे अधिकृत सीएसआर (CSR) प्रतिनिधी मोठ्या संख्येने उपस्थित होते: १) अल्फा लावल (Alfa Laval) २) एल्केजेन (ElcaGen) ३) एरॅमॉन्ड (Aramond) ४) ऍटलास कॉप्को (Atlas Copco) ५) ऍटकॉम लिमिटेड (Atcom Limited) ६) बजाज फायनान्स (Bajaj Finance) ७) बिसलेरी (Bisleri) ८) बीएमसी सॉफ्टवेअर (BMC Software) ९) ब्रिजस्टोन (Bridgestone) १०) सीआयई इंडिया (CIE India) ११) डीएएनए लिमिटेड (DANA Limited) १२) डेलोरोटो India (Dell’Orto India) १३) डायम डिस्प्ले (Diam Display) १४) डी-मार्ट (D-Mart) १५) फिआट (Fiat) १६) कावासाकी मोटर्स (Kawasaki Motors) १७) पदमजी (Padamjee) १८) सॅडविक कोरोमंट (Sandvik Coromant) १९) एसकेएफ इंडिया (SKF India) २०) टाटा मोटर्स (Tata Motors) २१) थरमॅक्स (Thermax) २२) टीकेआयएल (TKIL) २३) डब्ल्यूटीई इन्फ्रा (WTE Infra) २४) यझाकी (Yazaki) २५) ऍडियंट लिमिटेड (Adient Limited) २६) बजाज ऑटो (Bajaj Auto) २७) बॉश (Bosch) २८) गरवारे (Garware) २९) हुडको (HUDCO)
बैठकीत बोलताना महापौर रवि लांडगे यांनी औद्योगिकनगरीच्या दातृत्वाचे कौतुक केले. ते म्हणाले, “पिंपरी-चिंचवड हे देशातील सर्वात मोठे आणि प्रगत औद्योगिक केंद्र असून येथील कंपन्या व्यावसायिक प्रगतीसोबतच सामाजिक उत्तरदायित्व जपण्यात नेहमीच अग्रस्थानी राहिल्या आहेत. समाजाच्या सर्वांगीण कल्याणासाठी उद्योग क्षेत्र आणि स्थानिक स्वराज्य संस्था यांनी संयुक्तपणे एकत्र येऊन काम करणे ही आजच्या काळाची सर्वात मोठी गरज आहे. सीएसआर निधीच्या उपलब्धतेच्या दृष्टीने आपल्या शहरात खूप मोठी क्षमता (Potential) आहे. देशातील फार कमी शहरांमध्ये अशी क्षमता पाहायला मिळते.”
ते पुढे म्हणाले, “महानगरपालिकेच्या वतीने मोरवाडी येथे कोट्यवधी रुपये खर्च करून उभारण्यात आलेले ‘दिव्यांग भवन फाउंडेशन’ हे देशातील एकमेव, अद्वितीय आणि सर्वात प्रगत असे केंद्र आहे. हे केंद्र इतर सर्व महापालिकांसाठी एक आदर्श आणि प्रेरणादायी मॉडेल ठरत आहे. दिव्यांग नागरिकांच्या सक्षमीकरणासाठी, त्यांच्यावर योग्य वैद्यकीय उपचार, पुनर्वसन, कौशल्य विकास प्रशिक्षण आणि इतर सर्व अद्ययावत सुविधा एकाच छताखाली उपलब्ध करून दिल्या जात आहेत. या उपक्रमात जर औद्योगिक क्षेत्रातील कंपन्यांनी अधिक सक्रिय सहभाग घेतला, तर आपण आपल्या दिव्यांग बांधवांसाठी जगातील सर्वात अत्याधुनिक उपचार यंत्रणा आणि कल्याणकारी प्रकल्प उभे करू शकू.”
महानगरपालिका आयुक्त डॉ. विजय सूर्यवंशी यांनी सीएसआर निधीच्या योग्य विनियोगाबाबत समाधान व्यक्त केले. ते म्हणाले, “पिंपरी-चिंचवडमधील विविध औद्योगिक समूहांनी सीएसआर निधीच्या माध्यमातून शिक्षण, आरोग्य, वैद्यकीय सेवा आणि पायाभूत सुविधांच्या विकासात मोलाचे योगदान दिले आहे, ही आमच्यासाठी अत्यंत समाधानाची बाब आहे. ‘दिव्यांग भवन फाउंडेशन’ हा आमच्या महानगरपालिकेचा अत्यंत संवेदनशील, महत्त्वाचा आणि अभिमानाचा प्रकल्प आहे. हे केंद्र आज संपूर्ण भारतासाठी एक ‘रोल मॉडेल’ (Role Model) म्हणून उदयास आले आहे. येथील दिव्यांग बांधवांच्या खडतर जीवनमानात सकारात्मक आणि आशेचा बदल घडवून आणण्यासाठी उद्योगांची मदत मोलाची ठरेल. शहरातील जास्तीत जास्त कंपन्यांनी या राष्ट्रीय कार्यात पुढे येऊन महापालिकेला अधिक सहकार्य करावे.”
स्थायी समितीचे सभापती अभिषेक बारणे यांनी उद्योजकांना आवाहन करताना सांगितले की, “ज्या पिंपरी-चिंचवड शहराने आपल्या सर्वांच्या उद्योगांना एक जागतिक ओळख, व्यवसायाच्या अथांग संधी आणि प्रगतीचे एक भव्य व्यासपीठ उपलब्ध करून दिले, त्या शहराच्या कल्याणासाठी आणि प्रगतीसाठी आपणही आपले योगदान देणे हे आपले परम कर्तव्य आणि सामाजिक दायित्व आहे. मोरवाडीचे ‘दिव्यांग भवन’ हा संपूर्ण शहराचा अनमोल दागिना आहे. या केंद्राचा नावलौकिक केवळ राष्ट्रीय नव्हे, तर जागतिक स्तरावर पोहोचवण्यासाठी उद्योगांनी सीएसआर निधीच्या माध्यमातून आपले सर्वोत्तम सहकार्य करावे.”
सदर शानदार कार्यक्रमाचे अभ्यासपूर्ण प्रास्ताविक सीएसआर कक्षाचे विजय वावरे यांनी केले. तर कार्यक्रमाचे अत्यंत बहारदार व नेटके सूत्रसंचालन प्रफुल्ल पुराणिक यांनी केले आणि शेवटी उपस्थित सर्व उद्योजकांचे आणि मान्यवरांचे मनःपूर्वक आभार सह आयुक्त मनोज लोणकर यांनी मानले.
© २०२६ मॅक्स मंथन डेली न्यूज. सर्व हक्क राखीव.
