विद्यार्थ्यांसाठी मोठी खुशखबर! पिंपरी-चिंचवड मनपाकडून ५ वी ते १० वीच्या विद्यार्थ्यांना मोफत बसपास योजना जाहीर; महापौर रवीभाऊ लांडगे यांचे पालकांना अर्ज करण्याचे आवाहन

पिंपरी चिंचवड प्रतिनिधी आकाश कांबळे, १५ जुलै २०२६ मॅक्स मंथन डेली न्यूज:

पिंपरी चिंचवड: नवीन शैक्षणिक वर्षाच्या सुरुवातीलाच पिंपरी-चिंचवड महानगरपालिकेने (PCMC) शहरातील शालेय विद्यार्थ्यांसाठी एक अत्यंत दिलासादायक आणि महत्त्वपूर्ण पाऊल उचलले आहे. महानगरपालिका हद्दीतील प्राथमिक व माध्यमिक शाळांमधील इयत्ता ५ वी ते १० वीच्या विद्यार्थ्यांना घरापासून शाळेत जाण्यासाठी आणि परत येण्यासाठी ‘पीएमपीएमएल’चा (PMPML) मोफत बसपास देण्याच्या कल्याणकारी योजनेला महापालिका सभेने अधिकृत मंजुरी दिली आहे.

या योजनेचा थेट लाभ महानगरपालिकेच्या सर्व शाळांमधील विद्यार्थ्यांसह शासनमान्य खासगी शाळांतील विद्यार्थ्यांनाही मिळणार आहे. यामुळे हजारो गरीब आणि मध्यमवर्गीय पालकांचा वाहतुकीचा मोठा आर्थिक खर्च वाचणार आहे.

महानगरपालिकेने बसपास वाटपासाठी पात्रता आणि निकष निश्चित केले आहेत. पिंपरी-चिंचवड पालिका हद्दीतील महानगरपालिकेच्या सर्व शाळा आणि सर्व शासनमान्य खासगी शाळांमधील इयत्ता ५ वी ते १० वीचे विद्यार्थी या योजनेसाठी पात्र असतील. विद्यार्थ्यांची मागील शैक्षणिक वर्षामध्ये शाळेत किमान ७५ टक्के उपस्थिती असणे अनिवार्य आहे.  विद्यार्थ्यांच्या घरापासून शाळेचे अंतर किमान २ किलोमीटर किंवा त्यापेक्षा जास्त असणे आवश्यक आहे. शासनमान्य खासगी शाळांतील विद्यार्थ्यांना बसपासच्या एकूण रकमेपैकी केवळ २५ टक्के रक्कम चलनाद्वारे महानगरपालिका कोषागारात किंवा पीएमपीएमएलच्या अधिकृत डेपोमध्ये भरावी लागेल. उर्वरित ७५ टक्के खर्च पालिका उचलणार आहे.  महानगरपालिकेच्या स्वतःच्या शाळांमध्ये शिकणाऱ्या विद्यार्थ्यांना हा बसपास पूर्णपणे मोफत (१०० टक्के सवलत) दिला जाणार आहे.

पात्र विद्यार्थ्यांनी निर्धारित नमुन्यातील अर्ज पूर्ण भरून त्यासोबत कागदपत्रे जोडून आपल्या शाळेत जमा करायची आहेत. १. रहिवासी पुरावा, २. ओळखपत्र (आधार कार्ड अथवा पत्ता असलेले शासकीय ओळखपत्र), ३. शाळेचे चालू वर्षाचे प्रमाणपत्र (किंवा बोनाफाइड), ४. दोन पासपोर्ट आकाराचे रंगीत फोटो

बसपास योजनेचे नियोजित वेळापत्रक:

या महत्त्वपूर्ण शैक्षणिक योजनेबाबत बोलताना महापौर रवी लांडगे म्हणाले, “शहरातील विद्यार्थ्यांचा शाळा प्रवेश सुलभ व्हावा आणि प्रवासाचा आर्थिक भार पालकांवर पडू नये यासाठी महापालिकेने ही मोफत बसपास योजना सुरू केली आहे. शहरातील सर्व शाळांच्या मुख्याध्यापकांनी आपल्या शाळेतील पात्र विद्यार्थ्यांची यादी तातडीने तयार करून अर्ज प्रक्रिया वेळेत पूर्ण करून घ्यावी, जेणेकरून एकही गरजू विद्यार्थी या सुविधेपासून वंचित राहणार नाही. तसेच, सर्व पालकांनीही विहित मुदतीत कागदपत्रांची पूर्तता करून या मोफत बसपास योजनेचा जास्तीत जास्त लाभ घ्यावा.”

© २०२६ मॅक्स मंथन डेली न्यूज. सर्व हक्क राखीव.