चिखली घरकुल परिसरातील पाणी साचण्याच्या समस्येवर कायमस्वरूपी तोडगा काढणार! महापौर रवीभाऊ लांडगे यांनी अधिकाऱ्यांसह केली प्रत्यक्ष पाहणी; तातडीने उपाययोजना करण्याचे निर्देश
पिंपरी चिंचवड प्रतिनिधी लक्षण प्रधान, १६ जुलै २०२६ मॅक्स मंथन डेली न्यूज:
पिंपरी चिंचवड: मागील आठवड्यात शहरात झालेल्या अतिवृष्टीमुळे चिखली येथील घरकुल परिसरात मोठ्या प्रमाणावर पाणी साचून नागरिकांचे अतोनात नुकसान झाले होते. या गंभीर समस्येची दखल घेत पिंपरी-चिंचवड महानगरपालिकेचे महापौर रवी लांडगे यांनी आज महापालिकेच्या सर्व संबंधित विभागांच्या वरिष्ठ अधिकाऱ्यांच्या लवाजम्यासह घरकुल परिसराची सविस्तर पाहणी केली. पावसाळ्याच्या पार्श्वभूमीवर नागरिकांना दिलासा देण्यासाठी आणि या समस्येवर कायमस्वरूपी व शाश्वत तोडगा काढण्याच्या दृष्टीने महापौरांनी अधिकाऱ्यांना घटनास्थळीच खडे बोल सुनावत तातडीने काम सुरू करण्याचे स्पष्ट निर्देश दिले.
काही दिवसांपूर्वी जेव्हा घरकुल परिसरात पाणी साचले होते, तेव्हा महापौर रवी लांडगे यांनी बाधीत नागरिकांची भेट घेऊन त्यांचे सांत्वन केले होते. तसेच, “लवकरच सर्व संबंधित विभागांच्या वरिष्ठ अधिकाऱ्यांना सोबत घेऊन पुन्हा प्रत्यक्ष जागेवर येईन आणि समस्येचे मूळ कारण शोधून त्यावर कायमस्वरूपी उपाययोजना करेन,” असे आश्वासन दिले होते. त्यानुसार आज महापौरांनी आपला शब्द पाळत जलनिस्सारण (ड्रेनेज), स्थापत्य (सिव्हिल), पाणीपुरवठा आणि क्षेत्रीय कार्यालयाच्या सर्व प्रमुख अधिकाऱ्यांना घटनास्थळी आणून प्रत्यक्ष पाहणी केली.
पाहणी दौऱ्यादरम्यान महापौर आणि अधिकाऱ्यांनी घरकुल परिसरातील पाणी साचण्यामागील तांत्रिक कारणांचा सखोल आढावा घेतला. पावसाच्या पाण्याचा निचरा सुरळीत का होत नाही, यावर चर्चा करण्यात आली.
महापौरांनी अधिकाऱ्यांना दिलेले मुख्य निर्देश पावसाळी वाहिन्या आणि नैसर्गिक नाल्यांमध्ये असलेले सर्व तांत्रिक अडथळे तातडीने हटवण्यात यावेत. परिसरातील वाढत्या लोकसंख्येचा विचार करून जलवाहिन्या व ड्रेनेज लाईनची क्षमता वाढवण्याबाबत अंदाजपत्रक तयार करावे. भविष्यात कितीही मोठा पाऊस झाला तरी घरकुल परिसरात पाणी साचणार नाही, यासाठी स्थापत्य आणि जलनिस्सारण विभागाने संयुक्तपणे दीर्घकालीन आणि शाश्वत नियोजन करावे.
“घरांमध्ये पाणी शिरल्यामुळे सामान्य नागरिकांचे मोठे नुकसान होते. नागरिकांना पावसाळ्यात कोणताही त्रास होऊ नये यासाठी महानगरपालिका कटिबद्ध असून, कामचुकारपणा खपवून घेतला जाणार नाही. आवश्यक ती सर्व कामे युद्धपातळीवर पूर्ण करा,” असे महापौर यावेळी म्हणाले.
चिखली घरकुल परिसराच्या या महत्त्वपूर्ण पाहणी दौऱ्यादरम्यान स्थानिक लोकप्रतिनिधी आणि महापालिकेच्या वरिष्ठ प्रशासकीय अधिकाऱ्यांची फौज उपस्थित होती. यामध्ये प्रामुख्याने ‘फ’ प्रभाग अध्यक्षा शिवानी नरळे, नगरसदस्य कुंदन गायकवाड, निलेश नेवाळे, नगरसदस्या योगिता नागरगोजे, रिटा सानप, महापालिकेचे अतिरिक्त आयुक्त विक्रांत बगाडे, मुख्य अभियंता प्रमोद ओंभासे, सह शहर अभियंता अजय सूर्यवंशी, प्रेरणा सिनकर, उपायुक्त अण्णा बोदडे, क्षेत्रीय अधिकारी अतुल पाटील, कार्यकारी अभियंता शिवाजी चौरे, हरविंदर बन्सल, सोहन निकम आदी उपस्थित होते.
महापौरांच्या या आक्रमक भूमिकेमुळे आणि सर्व प्रमुख अधिकाऱ्यांनी प्रत्यक्ष जागेची पाहणी केल्यामुळे चिखली घरकुल परिसरातील पाणी साचण्याच्या जुन्या समस्येतून नागरिकांना लवकरच कायमस्वरूपी मुक्ती मिळेल, अशी आशा निर्माण झाली आहे.
© २०२६ मॅक्स मंथन डेली न्यूज. सर्व हक्क राखीव.
