दिवंगत अजितदादा पवार यांच्या जयंतीनिमित्त पिंपरी-चिंचवडमध्ये कष्टकरी व रिक्षाचालकांकडून भावपूर्ण अभिवादन!
पिंपरी चिंचवड प्रतिनिधी बालाजी नवले, २२ जुलै २०२६ मॅक्स मंथन डेली न्यूज:
पिंपरी चिंचवड: महाराष्ट्राचे माजी उपमुख्यमंत्री दिवंगत अजितदादा पवार यांच्या जयंतीच्या औचित्याने पिंपरी-चिंचवड शहरातील कष्टकरी, कामगार, रिक्षा-टॅक्सी चालक आणि फेरीवाला बांधवांच्या वतीने दादांच्या स्मृतीस भावपूर्ण अभिवादन करण्यात आले. ‘कष्टकरी संघर्ष महासंघ महाराष्ट्र’, ‘कष्टकरी रिक्षा-टॅक्सी चालक संघर्ष महासंघ’ व त्यांच्या सहयोगी संघटनांच्या संयुक्त विद्यमाने आयोजित या कार्यक्रमात अजितदादांच्या प्रतिमेस पुष्पहार अर्पण करून आदरांजली वाहण्यात आली.
यावेळी उपस्थितांना संबोधित करताना ज्येष्ठ कामगार नेते काशिनाथ नखाते यांनी दिवंगत अजितदादा पवार यांच्या प्रशासकीय आणि सामाजिक कार्याचा मनःपूर्वक गौरव केला. काशिनाथ नखाते म्हणाले:
“महाराष्ट्राच्या सर्वांगीण विकासात अजितदादांचे योगदान अद्वितिय आणि मोलाचे राहिले आहे. सिंचन, पायाभूत सुविधा, उद्योग, कृषी, सहकार आणि शहरी विकास अशा विविध क्षेत्रांत त्यांनी दूरदृष्टीने अनेक क्रांतीकारी निर्णय घेतले. प्रशासनावरील मजबूत पकड, कामाचा प्रचंड वेग आणि जनतेच्या प्रश्नांवर तात्काळ निर्णय घेण्याची त्यांची शैली सर्वांसाठीच आदर्श होती.”
अजितदादांनी नेहमीच कष्टकरी, कामगार, रिक्षाचालक, फेरीवाले आणि सर्वसामान्य घटकांच्या प्रश्नांवर अत्यंत संवेदनशीलतेने मार्ग काढला. विकासाच्या प्रवाहात शेवटच्या घटकाला सोबत घेऊन जाण्याची त्यांची भूमिका कायम स्मरणात राहील आणि त्यांच्या या कार्यातून येणाऱ्या नव्या पिढीला अखंड प्रेरणा मिळत राहील, असे मतही यावेळी विविध वक्त्यांनी व्यक्त केले.
या अभिवादन सोहळ्याला कष्टकरी संघर्ष महासंघाचे सर्व प्रमुख पदाधिकारी, कार्यकर्ते, महिला प्रतिनिधी तसेच विविध सहयोगी संघटनांचे प्रतिनिधी आणि नागरिक मोठ्या संख्येने उपस्थित होते. सर्वांनी दादांच्या प्रतिमेला पुष्प वाहून ‘अजितदादा अमर रहे’च्या घोषणा दिल्या.
© २०२६ मॅक्स मंथन डेली न्यूज. सर्व हक्क राखीव.
