कंत्राटी पद्धत बंद करून कामगारांना ‘समान काम, समान वेतन’ द्या; क्रांती दिनी ‘राष्ट्रीय श्रमिक आघाडी’चा एल्गार!

पिंपरी चिंचवड प्रतिनिधी लक्ष्मण प्रधान, दि. ११ ऑगस्ट २०२६ मॅक्स मंथन डेली न्यूज:

“गेल्या २६ ते ३० वर्षांत आम्ही संविधानाने दिलेले अधिकार मिळवण्यासाठी रस्त्यावरील आंदोलने, ७ वेळा उपोषणे आणि मुंबई उच्च न्यायालय, सर्वोच्च न्यायालय व कामगार न्यायालयात दाद मागितली. परंतु, न्यायालयीन फेऱ्यांमध्ये कामगारांचे आयुष्य जात आहे. तरीही आमचा संविधान, न्यायव्यवस्था आणि सरकारवर पूर्ण विश्वास असून लोकशाहीचे हे स्तंभ कामगारांना नक्कीच न्याय देतील.”

— यशवंतभाऊ भोसले, अध्यक्ष (राष्ट्रीय श्रमिक आघाडी, महाराष्ट्र राज्य)

या वेळी संघटनेच्या इतर प्रमुख वक्त्यांनीही प्रशासनाच्या कारभारावर व कंत्राटी पद्धतीवर कडक शब्दांत ताशेरे ओढले.

सुमित बनसोडे “जोपर्यंत कंत्राटी कामगार पद्धत बंद होत नाही, तोपर्यंत कामगारांचे शोषण थांबणार नाही. कामगारांच्या घरचे मरायला टेकले तरी न्यायव्यवस्था व प्रशासन ढिम्म आहे. कामगारांच्या बाजूने निकाल लागल्यास कामगार देशाच्या हितासाठी सर्वस्व पणाला लावेल.”

विजय भालेराव “गेल्या ३० वर्षांपासून सफाई कामगार कोर्टाच्या फेऱ्या मारत आहेत. सर्वोच्च न्यायालयाचा निकाल लागूनही पिंपरी-चिंचवड महापालिका अंमलबजावणी करत नाही. वयामुळे एक-एक सफाई कामगार दगावत आहे. मुख्यमंत्री देवेंद्र फडणवीस साहेब यांनी या प्रकरणात तातडीने हस्तक्षेप करून सफाई कामगारांना ‘समान काम समान वेतन’ तत्त्वावर सेवेत घ्यावे.”

सुनील चिकणे “कोरोनाच्या अत्यंत भीषण काळात आम्ही स्वतःचा जीव धोक्यात घालून मृतदेहांचे अंत्यसंस्कार व सर्व विधी पार पाडले. हे सरकार गोरगरीब जनतेचे आहे, मग आम्हाला न्याय कधी मिळणार? सरकारने राजकारणातून बाहेर पडून कोरोना योद्ध्यांच्या आणि कामगारांच्या हिताचा गांभीर्याने विचार करावा.”