अहिल्यानगर: अहिल्यानगर (अहमदनगर) शहरातील भिंगार कॅम्प परिसरात गणेश विसर्जन मिरवणुकीदरम्यान एका ४९ वर्षीय कार्यकर्त्याचा संशयास्पद मृत्यू झाल्याने परिसरात मोठी खळबळ उडाली आहे. दीपक वागसकर (रा. भिंगार कॅम्प, सदस्य- शुक्लेश्वर युवक मित्र मंडळ) असे मृत पावलेल्या तरुणाचे नाव आहे. या घटनेनंतर पोलिसांच्या कथित लाठीचार्जमुळेच दीपक यांचा मृत्यू झाल्याचा आरोप करत स्थानिक नागरिक, गणेश मंडळाचे कार्यकर्ते आणि आमदार संग्राम जगताप यांनी आक्रमक भूमिका घेतली आहे.

शुक्रवारी पार पडलेल्या गणेश विसर्जन मिरवणुकीत गुलाल उधळण्यावरून आणि ट्रॅक्टर ट्रॉलीवर चढण्यावरून वाद निर्माण झाला होता. या दरम्यान पोलिसांनी जमावाला पांगवण्यासाठी सौम्य लाठीचार्ज केला, ज्यामध्ये दीपक वागसकर यांना दुखापत झाली आणि उपचारादरम्यान त्यांचा मृत्यू झाला, असा दावा आमदार संग्राम जगताप आणि मंडळाच्या कार्यकर्त्यांनी केला आहे.

या घटनेचा निषेध म्हणून आमदार संग्राम जगताप यांनी रात्री उशिरापर्यंत रस्त्यावर ठाण मांडून आंदोलन केले आणि दोषी पोलीस अधिकाऱ्यांवर तात्काळ कारवाई करण्याची मागणी केली. तसेच गुरुवारी भिंगार कॅम्प परिसरातील सर्व दुकाने बंद ठेवून कडकडीत बंद पाळण्यात आला होता. मृताच्या नातेवाईकांनी सुरुवातीला न्याय मिळेपर्यंत मृतदेह ताब्यात घेण्यास नकार दिला होता.

पोलीस प्रशासनाने लाठीचार्जमुळे मृत्यू झाल्याचे आरोप पूर्णपणे फेटाळून लावले आहेत. अहिल्यानगरचे पोलीस अधीक्षक आर. मुम्मका सुदर्शन यांनी दिलेल्या माहितीनुसार रात्री सुमारे ९:१० वाजता ट्रॅक्टर ट्रॉलीवरील लोकांना अपघात टाळण्यासाठी केवळ बाजूला करण्यात आले होते. मिरवणूक रात्री ९:३० वाजता शांततेत पार पडली.  मिरवणूक संपल्यानंतर घरी परतताना दीपक वागसकर यांनी पोलिसांशी आणि इतरांशी संवादही साधला होता. अचानक ते खाली कोसळले आणि त्यांना तात्काळ खाजगी रुग्णालयात नेण्यात आले, जिथे डॉक्टरांनी त्यांना मृत घोषित केले.

सिव्हिल सर्जन डॉ. संजय घोगरे यांनी दिलेल्या माहितीनुसार, दीपक यांच्या डोक्यावर वरवरची दुखापत दिसून आली आहे. परंतु, शवविच्छेदन (Postmortem) अहवाल अनिर्णीत राहिला असून रासायनिक पृथक्करण (Chemical Analysis) आणि फॉरेन्सिक अहवाल आल्यानंतरच मृत्यूचे खरे कारण स्पष्ट होईल.

या संपूर्ण प्रकरणाची पारदर्शक चौकशी करण्यासाठी श्रीरामपूरचे अप्पर पोलीस अधीक्षक सोमनाथ वाघचौरे यांची नियुक्ती करण्यात आली आहे. निष्पक्ष चौकशी व्हावी याकरिता घटनेच्या वेळी कर्तव्यावर असलेल्या संबंधित पोलीस कर्मचाऱ्यांना सक्तीच्या रजेवर पाठवण्यात आले आहे.